ຂປລ
ຂໍ້ລິເລີ່ມ ວ່າດ້ວຍ ການພັດທະນາທົ່ວໂລກ ແລະ ແຜນການຍຸດທະສາດ ຂອງອາຊຽນ ຫລາຍໂຄງການ ມີຄວາມສອດຄ່ອງກັນ ໃນລະດັບສູງ, ກວມເອົາ ການກໍ່ສ້າງ ພື້ນຖານໂຄງລ່າງ, ລະບຽບການ, ດີຈີຕອນ, ການພັດທະນາສີຂຽວ, ການບົ່ມເພາະ ສ້າງບຸກຄະລາກອນ ແລະ ຂົງເຂດອື່ນໆ
ຂປລ.ວິທະຍຸ ໂທລະພາບ ສູນກາງຈີນ, ວັນທີ 11 ສິງຫານີ້, ທ່ານ ນາງ ໂຈແອນ ລິນ ເວີຍຫລີງ ນັກຄົ້ນຄວ້າອາວຸໂສ ຈາກສະຖາບັນຄົ້ນຄວ້າ ອາຊີ ຕາເວັນອອກ ສຽງໃຕ້ ຢຸໂຊຟ ອິຊັກ ສິງກະໂປ ໄດ້ລົງບົດຄວາມຜ່ານ ໜັງສືພິມລາຍວັນຈີນ ໂດຍລະບຸວ່າ: ຂໍ້ລິເລີ່ມ ວ່າດ້ວຍ ການພັດທະນາທົ່ວໂລກ ແລະ ແຜນການຍຸດທະສາດ ຂອງອາຊຽນ ຫລາຍໂຄງການ ມີຄວາມສອດຄ່ອງກັນ ໃນລະດັບສູງ, ກວມເອົາ ການກໍ່ສ້າງ ພື້ນຖານໂຄງລ່າງ, ລະບຽບການ, ດີຈີຕອນ, ການພັດທະນາສີຂຽວ, ການບົ່ມເພາະ ສ້າງບຸກຄະລາກອນ ແລະ ຂົງເຂດອື່ນໆ, ມີຜົນດີ ຕໍ່ການຍົກລະດັບ ຄວາມສາມາດປະຕິບັດງານຂອງການເຊື່ອມໂຍງເຂົ້າກັນ ຂອງພາກພື້ນ ແລະ ຊຸກຍູ້ ໃຫ້ສ້າງອາຊີຕາເວັນອອກສຽງໃຕ້ ທີ່ມີຄວາມໜຽວແໜ້ນ, ກວມລວມ ແລະ ມີຄວາມຍືນຍົງ ຫລາຍກວ່າເກົ່າ.ປັດຈຸບັນ, ອາຊຽນ ພວມປະເຊີນໜ້າກັບ ການປ່ຽນແປງຂອງດິນຟ້າອາກາດ, ການປະຕິວັດ ດ້ານເຕັກໂນໂລຊີ, ຕ່ອງໂສ້ການສະໜອງ ມີຄວາມອ່ອນແອ, ຄວາມສາມາດ ຂອງບັນດາປະເທດສະມາຊິກ ບໍ່ສະໝ່ຳ ສະເໝີ ແລະ ສິ່ງທ້າທາຍອື່ນໆ ເຊິ່ງຕ້ອງການເພີ່ມທະວີ ການປະສານສົມທົບ ດ້ານລະບຽບການ ແລະ ການເຊື່ອມຕໍ່ ຂ້າມຊາຍແດນ ຢ່າງຮີບດ່ວນ. ຂໍ້ລິເລີ່ມ ວ່າດ້ວຍການພັດທະນາ ທົ່ວໂລກ ສາມາດຕອບສະໜອງກັບຄວາມຕ້ອງການຂອງອາຊຽນ ໃນດ້ານການຫລຸດຜ່ອນ ຄວາມທຸກຍາກ, ຄວາມໝັ້ນຄົງ ດ້ານສະບຽງອາຫານ, ເສດຖະກິດດີຈີຕອນ, ການດຳເນີນງານ ດ້ານດິນຟ້າອາກາດ ແລະ ຂົງເຂດອື່ນໆ, ທ່າແຮງດ້ານທຶນຮອນ,ເຕັກໂນໂລຊີ ແລະ ປະສົບການຈາກຂໍ້ລິເລີ່ມດັ່ງກ່າວ ໄດ້ສະໜອງການຄ້ຳປະກັນຕົວຈິງ ໃຫ້ແກ່ ການຈັດຕັ້ງປະຕິບັດ ຄຳໝັ້ນສັນຍາໃນພາກພື້ນ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
