ຂປລ
ຂປລ. ໃນປັດຈຸບັນ, ການປ່ຽນແປງສະພາບພູມອາກາດຂອງໂລກ ເຮັດໃຫ້ເກີດໄພພິບັດທາງທຳມະຊາດ ເຊັ່ນ: ອຸທົກກະໄພ (ນ້ຳຖ້ວມ), ພາຍຸລົມແຮງ, ສັດຕູພືດ ແລະ ໄພແຫ້ງແລ້ງ ມີຄວາມຮຸນແຮງ ແລະ ຄາດເດົາໄດ້ຍາກຂຶ້ນ.
ຂປລ. ໃນປັດຈຸບັນ, ການປ່ຽນແປງສະພາບພູມອາກາດຂອງໂລກ ເຮັດໃຫ້ເກີດໄພພິບັດທາງທຳມະຊາດ ເຊັ່ນ: ອຸທົກກະໄພ (ນ້ຳຖ້ວມ), ພາຍຸລົມແຮງ, ສັດຕູພືດ ແລະ ໄພແຫ້ງແລ້ງ ມີຄວາມຮຸນແຮງ ແລະ ຄາດເດົາໄດ້ຍາກຂຶ້ນ. ເນື່ອງຈາກພວກເຮົາບໍ່ສາມາດຫ້າມທຳມະຊາດໄດ້, ສິ່ງທີ່ສຳຄັນທີ່ສຸດຄື "ການຮຽນຮູ້ທີ່ຈະຢູ່ລອດ ແລະ ຮັບມືຢ່າງມີສະຕິ". ສະນັ້ນ, ຄໍລຳ “ສິ່ງແວດລ້ອມ” ໜັງສືພິມປະເທດລາວ ຂໍຍົກເອົາ 3 ຂັ້ນຕອນຫລັກໃນການຮັບມືກັບໄພທຳມະຊາດ ເພື່ອເປັນບົດຮຽນໃຫ້ແກ່ພວກເຮົາ ທັງກະກຽມຄວາມພ້ອມຮັບມືກັບໄພທຳມະຊາດທີ່ອາດເກີດຂຶ້ນໃນລະດູຝົນຄືປັດຈຸບັນນີ້.
ອັນໜຶ່ງ: ການກຽມພ້ອມກ່ອນເກີດໄພພິບັດ (ກຽມກາຍ ແລະ ໃຈ); ການປ້ອງກັນ ແລະ ກຽມພ້ອມລ່ວງໜ້າ ແມ່ນວິທີທີ່ຫລຸດຜ່ອນຄວາມເສຍຫາຍໄດ້ດີທີ່ສຸດ: ພວກເຮົາຕ້ອງຕິດຕາມຂ່າວສານເປັນປະຈຳ, ໝັ່ນຕິດຕາມການແຈ້ງເຕືອນສະພາບອາກາດ ຈາກກົມອຸຕຸນິຍົມ ແລະ ອຸທົກກະສາດຢ່າງໃກ້ຊິດໂດຍສະເພາະໃນລະດູຝົນຄືປັດຈຸບັນ; ກຽມກະເປົາສຸກເສີນ: ຄວນມີກະເປົາທີ່ຮວບຮວມສິ່ງຈຳເປັນ ທີ່ສາມາດຫິ້ວໜີໄດ້ທັນທີເຊັ່ນ: ນ້ຳດື່ມ, ອາຫານແຫ້ງ, ຢາປະຈຳຕົວ, ໄຟສາຍ, ໝໍ້ໄຟສຳຮອງ (Power bank), ເອກະສານສຳຄັນ (ໃສ່ຖົງຢາງກັນນ້ຳ) ແລະ ເງິນສົດຈຳນວນໜຶ່ງ; ວາງແຜນໃນຄອບຄົວ: ກຳນົດຈຸດນັດພົບທີ່ປອດໄພຮ່ວມກັນໃນຄອບຄົວ ຫາກເກີດເຫດການທີ່ຕ້ອງໄດ້ອົບພະຍົບ ແລະ ແຍກທາງກັນ.
ອັນທີສອງ: ການປະຕິບັດຕົວລະຫວ່າງເກີດໄພພິບັດ (ມີສະຕິ ແລະ ເອົາຕົວລອດ) ເມື່ອເກີດເຫດການຂຶ້ນ ສິ່ງທຳອິດທີ່ຕ້ອງເຮັດຄື: "ຕັ້ງສະຕິ ບໍ່ແຕກຕື່ນ": ກໍລະນີນ້ຳຖ້ວມຊືກຊົນ/ນ້ຳປ່າໄຫລຊຸ ກໍຟ້າວຍົກຍ້າຍສິ່ງຂອງ ແລະ ສັດ ລ້ຽງຂຶ້ນບ່ອນສູງ; ຕັດກະແສໄຟຟ້າ (ສະວິດໄຟ) ໃນເຮືອນທັນທີ ເພື່ອປ້ອງກັນໄຟດູດ; ຫລີກລ່ຽງການຍ່າງ ຫລືຂັບຂີ່ພາ ຫະນະຝ່ານ້ຳໄຫລຊຸ; ກໍລະນີພາຍຸລົມແຮງ ຕ້ອງຫລົບຢູ່ແຕ່ໃນອາຄານທີ່ໝັ້ນຄົງຖາວອນ, ຫ້າມຢູ່ໃກ້ປ່ອງຢ້ຽມແກ້ວ; ຢູ່ຫ່າງຈາກຕົ້ນໄມ້ໃຫຍ່, ປ້າຍໂຄສະນາ ແລະ ເສົາໄຟຟ້າ ເພາະອາດຫັກລົງມາທັບໄດ້.
ອັນທີສາມ: ການຟື້ນຟູ ແລະ ປະຕິບັດຕົວຫລັງເກີດໄພພິບັດ (ກວດເຊັກ ແລະ ລະວັງ) ຫລັງຈາກສະຖານະການຫລຸດລົງ ຍັງມີສິ່ງທີ່ຕ້ອງລະມັດລະວັງເພີ່ມເຕີມຄື: ກວດສອບຄວາມປອດໄພຂອງເຮືອນເປັນຕົ້ນແມ່ນໂຄງສ້າງເຮືອນ, ລະບົບໄຟຟ້າ ແລະ ລະບົບນ້ຳ ກ່ອນຈະເປີດນຳໃຊ້ ຫລື ເຂົ້າໄປຢູ່ອາໄສ; ລະວັງພະຍາດ ໄພໄຂ້ເຈັບເປັນ ພາຍຫລັງນ້ຳຖ້ວມມັກຈະເກີດພະຍາດເຊັ່ນ: ພະຍາດຖອກທ້ອງ, ໄຂ້ຍຸງ ແລະ ພະຍາດສັດກັດຕອດ (ງູ ຫລື ແມງງອດ ທີ່ໜີນ້ຳມາ); ຄວນກິນອາຫານທີ່ປຸງສຸກໃໝ່ໆ ແລະ ດື່ມນ້ຳສະອາດ.
ນອກຈາກນີ້, ຕ້ອງໄດ້ຟື້ນຟູສະພາບຈິດໃຈ,ໃຫ້ກຳລັງໃຈເຊິ່ງກັນ ແລະ ກັນໃນຄອບຄົວ ແລະ ຊຸມຊົນ ເພື່ອຮ່ວມກັນເລີ່ມຕົ້ນໃໝ່. ຂະນະທີ່ໄພພິບັດທາງທຳມະຊາດເປັນສິ່ງທີ່ພວກເຮົາຫລີກລ່ຽງບໍ່ໄດ້, ແຕ່ ຄວາມບໍ່ປະໝາດ ແລະ ການມີສະຕິ ຈະເປັນການປ້ອງກັນທີ່ດີທີ່ສຸດ. ການຮຽນຮູ້ວິທີຮັບມືຢ່າງຖືກຕ້ອງ ບໍ່ພຽງແຕ່ຊ່ວຍປົກປ້ອງຊັບສິນເທົ່ານັ້ນ, ແຕ່ມັນໝາຍເຖິງການຮັກສາຊີວິດຂອງຕົວເຮົາ ແລະ ຄົນທີ່ເຮົາຮັກໃຫ້ປອດໄພ.
ໂດຍ: ຢ່າຕົ່ງ
KPL
