ຂປລ
ຂປລ. ຖ້າຫາກທ່ານມີໂອກາດໄດ້ເດີນທາງໄປຢ້ຽມຢາມ ແຂວງຫລວງພະບາງ ແລະ ຂຶ້ນໄປຊົມທິວທັດ ອັນສວຍສົດງົດງາມ ຈາກຍອດພູສີແລ້ວ ເມື່ອແນມລົງມາເບື້ອງລຸ່ມ ທ່ານຈະເຫັນອາຄານຫລັງຄາຊົງລາວບູຮານມຸງດ້ວຍກະເບື້ອງສີແດງ ຕັ້ງໂດດເດັ່ນທາມກາງຕົ້ນຕານໃຫຍ່
ຂປລ. ຖ້າຫາກທ່ານມີໂອກາດໄດ້ເດີນທາງໄປຢ້ຽມຢາມ ແຂວງຫລວງພະບາງ ແລະ ຂຶ້ນໄປຊົມທິວທັດ ອັນສວຍສົດງົດງາມ ຈາກຍອດພູສີແລ້ວ ເມື່ອແນມລົງມາເບື້ອງລຸ່ມ ທ່ານຈະເຫັນອາຄານຫລັງຄາຊົງລາວບູຮານມຸງດ້ວຍກະເບື້ອງສີແດງ ຕັ້ງໂດດເດັ່ນທາມກາງຕົ້ນຕານໃຫຍ່ ຊຶ່ງສະຖານທີ່ແຫ່ງນັ້ນຄື: "ພະລາດຊະວັງເກົ່າ" ຫລື ປັດຈຸບັນຖືກປ່ຽນເປັນ "ຫໍພິພິທະພັນແຫ່ງຊາດ ຫລວງພະບາງ" ຈຸດໝາຍປາຍທາງທີ່ຫ້າມພາດ ເພາະເປັນ ສະຖານທີ່ທ່ອງທ່ຽວທີ່ສຳຄັນອັນໄດ້ຮວບຮວມເລື່ອງລາວທາງປະຫວັດສາດ, ວັດທະນະທຳ ແລະ ສິລະປະອັນລ້ຳຄ່າຂອງລາວໄວ້ຢ່າງຄົບຖ້ວນ.
ພະລາດຊະວັງແຫ່ງນີ້ ສ້າງຂຶ້ນໃນປີ ພສ 2447 (ຄສ 1904) ໃນຄອງລາດຂອງເຈົ້າຊີວິດສີສະຫວ່າງວົງ ເພື່ອໃຊ້ເປັນພະລາດຊະວັງປະທັບ. ໂດຍຄວາມໂດດເດັ່ນຂອງພະລາດຊະວັງຄືການປະສົມປະສານລະຫວ່າງສິລະປະແບບລາວດັ້ງເດີມກັບສະຖາປັດຕະຍະກຳແບບບູຮານຂອງຝຣັ່ງຢ່າງກົມກຽ. ຕົວອາຄານຍົກພື້ນສູງ ແຕ່ມີຫລັງຄາຊົງຊໍ່ຟ້າ 3 ຊັ້ນ ຕາມແບບສິລະປະລ້ານຊ້າງ ທີ່ສະທ້ອນເອກະລັກ ແລະ ຄວາມສະຫງ່າງາມຂອງສະຖາປັດຕະຍະກຳລາວ, ເມື່ອຍ່າງຜ່ານປະຕູທາງເຂົ້າດ້ານໜ້າ ສິ່ງທຳອິດທີ່ດຶງດູດສາຍຕາຄື G “ຫໍພະບາງ” ອາຄານຊົງເຈດີສີທອງອັນງົດງາມ ທີ່ຕັ້ງຢູ່ທາງທິດເໜືອຂອງພະລາດຊະວັງ ເປັນບ່ອນປະດິດສະຖານ “ພະບາງ” ແມ່ນພະທີ່ຫລໍ່ດ້ວຍທອງຄຳປະສົມ (ສຳລິດ) ຊຶ່ງເປັນພະພຸດທະຮູບສັກສິດຄູ່ບ້ານຄູ່ເມືອງ ແລະ ເປັນທີ່ມາຂອງຊື່ “ເມືອງຫລວງພະບາງ”. ນັກທ່ອງທ່ຽວສາມາດເຂົ້າໄປກາບໄຫວ້ຂໍພອນເພື່ອຄວາມເປັນສິລິມົງຄຸນໄດ້ຢູ່ຈຸດນີ້. ເມື່ອຍ່າງເຂົ້າໄປພາຍໃນຕົວອາຄານໃຫຍ່ ທ່ານຈະໄດ້ສຳຜັດກັບບັນຍາກາດຄວາມຮຸ່ງເຮືອງໃນອະດີດ ໂດຍເພິ່ນໄດ້ຈັດສະແດງຫ້ອງຕ່າງໆ ໄວ້ຄືເກົ່າ ເຊັ່ນ: ຫ້ອງຮັບແຂກຂອງເຈົ້າຊີວິດ ໂດດເດັ່ນດ້ວຍພາບຈິດກຳຝາຜະໜັງ (Murals) ຝີມືຈິດຕະກອນຊາວຝຣັ່ງ ທີ່ບອກເລົ່າວິຖີຊີວິດຂອງຊາວລາວໃນອະດີດ ໂດຍສີຂອງພາບຈະປ່ຽນໄປຕາມແສງທຳມະຊາດທີ່ສ່ອງເຂົ້າມາ. ສ່ວນທ້ອງພະໂລງ (ຫ້ອງບັນລັງ) ແມ່ນບ່ອນຕັ້ງພະລາຊະບັນລັງຂອງເຈົ້າຊີວິດ, ຝາຜະໜັງປະດັບດ້ວຍແກ້ວສີ (Mosaic) ບອກເລົ່ານິທານພື້ນບ້ານ ແລະ ວັນນະຄະດີລາວ ຢ່າງປະນີດງົດງາມ. ນອກຈາກນີ້, ຢູ່ທາງດ້ານຫລັງຂອງພະລາດຊະວັງ ຍັງມີອາຄານຈັດສະແດງ ລົດພາຫະນະ (ລົດບູຮານຂອງເຈົ້າຊີວິດ) ໃຫ້ໄດ້ຊົມອີກດ້ວຍ.
ສໍາລັບນັກທ່ອງທ່ຽວ ທີ່ຈະເຂົ້າມາສໍາຜັດສະຖານທີ່ປະຫວັດສາດແຫ່ງນີ້ ຕ້ອງແຕ່ງກາຍສຸພາບຮຽບຮ້ອຍ (ຫ້າມນຸ່ງສົ້ງຂາສັ້ນ, ສິ້ນເຂີນ, ເສື້ອສາຍດ່ຽວ ຫລື ເສື້ອແຂນກຸດ), ຖ້ານຸ່ງເຄື່ອງບໍ່ສຸພາບ ເພີ່ນຈະມີບໍລິການໃຫ້ເຊົ່າ ເພື່ອຄວາມເປັນລະບຽບຮຽບຮ້ອຍ ແລະ ເປັນການເຄົາລົບສະຖານທີ່ປະຫວັດສາດແຫ່ງນີ້ ເນື່ອງຈາກວ່າ ພະລາດຊະວັງເກົ່າ ບໍ່ ພຽງແຕ່ແມ່ນສະຖານທີ່ທ່ອງທ່ຽວທີ່ສວຍງາມ, ແຕ່ມັນເປັນສະຖານທີ່ທີ່ນຳພານັກທ່ອງທ່ຽວຍ້ອນເວລາກັບໄປສຳຜັດກັບກິ່ນອາຍ, ວັດທະນະທຳ ແລະ ປະຫວັດສາດອັນຍິ່ງໃຫຍ່ຂອງລາຊະອານາຈັກລາວໃນອະດີດ.
ປັດຈຸບັນ ຫໍພິພິທະພັນແຫ່ງຊາດ ຫລວງພະບາງ ແມ່ນເປີດບໍລິການທຸກມື້ (ຍົກເວັ້ນວັນອັງຄານ) ແຕ່ 8:00 ໂມງເຊົ້າ -16:00 ໂມງແລງ.
ໂດຍ: ມາລີດາ
KPL
