ຂປລ
ຂປລ. ໃນປັດຈຸບັນ ການນຳໃຊ້ສານເຄມີເຂົ້າໃນການຜະລິດກະສິກຳ ບໍ່ວ່າຈະເປັນການປູກພືດ ຫລື ການລ້ຽງສັດ ໄດ້ແຜ່ຫລາຍຂຶ້ນຢ່າງຕໍ່ເນື່ອງ.
ຂປລ. ໃນປັດຈຸບັນ ການນຳໃຊ້ສານເຄມີເຂົ້າໃນການຜະລິດກະສິກຳ ບໍ່ວ່າຈະເປັນການປູກພືດ ຫລື ການລ້ຽງສັດ ໄດ້ແຜ່ຫລາຍຂຶ້ນຢ່າງຕໍ່ເນື່ອງ. ເຖິງແມ່ນວ່າສານເຄມີຊ່ວຍເພີ່ມຜົນຜະລິດ ແລະ ຫລຸດຄວາມເສຍຫາຍຈາກສັດຕູພືດ ແຕ່ການໃຊ້ຢ່າງບໍ່ຖືກວິທີ ຫລື ເກີນປະລິມານ ໂດຍສະເພາະຢາຂ້າຫຍ້າ ແລະ ຢາປາບສັດຕູພືດ ກຳລັງກາຍເປັນບັນຫາທີ່ໜ້າເປັນຫວ່ງ ເນື່ອງຈາກສົ່ງຜົນກະທົບໂດຍກົງຕໍ່ສຸຂະພາບຂອງຜູ້ຜະລິດ,ຜູ້ບໍລິໂພກ ແລະ ສິ່ງແວດລ້ອມ.
ມື້ນີ້ ຄໍລຳ “ສຶກສາຫາຄວາມຮູ້” ຈຶ່ງໄດ້ເອົາຂໍ້ມູນກ່ຽວກັບຜົນກະທົບ ແລະ ຄວາມອັນຕະລາຍຂອງການນຳໃຊ້ສານເຄມີເຂົາໃນການຜະລິດກະສິກຳມານຳສະເໜີ ຊຶ່ງທາງອົງການອາຫານ ແລະ ການກະເສດ ໄດ້ໃຫ້ຮູ້ວ່າ: ການນຳໃຊ້ສານເຄມີເຂົ້າໃນການຜະລິດກະສິກຳຫລາຍເກີນໄປ ໂດຍສະເພາະແມ່ນຢາຂ້າຫຍ້າ ແລະ ຢາປາບສັດຕູພືດ ຈະສົ່ງຜົນກະທົບຕໍ່ສຸຂະພາບຂອງຄົນ, ສັດ ແລະ ສິ່ງແວດລ້ອມ ເມື່ອສານດັ່ງກ່າວເຂົ້າສູ່ຮ່າງກາຍອາດເກີດອາຫານພິດແບບສະເພາະໜ້າ ເຊັ່ນ: ຈະມີອາການເຈັບຫົວ, ເຈັບທ້ອງ, ປວດຮາກ, ວິນຫົວ, ປຸ້ນທ້ອງ, ເຈັບກ້າມຊີ້ນ ແລະ ຖ້າມີການສະສົມໃນຮ່າງກາຍເປັນເວລາດົນແມ່ນມີຄວາມສ່ຽງສູງທີ່ຈະເປັນມະເຮັງປອດ, ຜິວໜັງ, ເມັດເລືອດ, ລຳໃສ້, ສະໝອງ, ເບົາຫວານ, ອຳມະພາດ, ອຳມະພຶກ, ພະຍາດຜິວໜັງ ແລະ ອື່ນໆ. ນອກຈາກສົ່ງຜົນກະທົບຕໍ່ມະນຸດແລ້ວ, ການໃຊ້ສານເຄມີຢ່າງບໍ່ເໝາະສົມ ຍັງເຮັດໃຫ້ດິນເສື່ອມຄຸນນະພາບ, ປົນເປື້ອນແຫລ່ງນ້ຳ, ທຳລາຍສັດ ແລະ ສິ່ງມີຊີວິດທີ່ເປັນປະໂຫຍດລວມທັງຜົນກະທົບຕໍ່ຄວາມສົມດຸນຂອງລະບົບນິເວດ. ໃນໄລຍະຍາວ ບັນຫາດັ່ງກ່າວຍັງກະທົບຕໍ່ການພັດທະນາດ້ານເສດຖະກິດ-ສັງຄົມ ແລະ ຄຸນນະພາບຊີວິດຂອງປະຊາຊົນ. ດັ່ງນັ້ນ, ການຫັນມາຜະລິດກະສິກຳສະອາດ ແລະ ກະສິກຳປອດສານພິດ ຄວບຄູ່ກັບການນຳໃຊ້ສານເຄມີຢ່າງຖືກວິທີ ແລະ ຕາມຄຳແນະນຳຂອງຜູ້ຊ່ຽວຊານແມ່ນທາງເລືອກທີ່ສຳຄັນ. ນອກຈາກຈະຊ່ວຍປົກປ້ອງສຸຂະພາບຂອງຜູ້ປະລິດ ແລະ ຜູ້ບໍລິໂພກແລ້ວ, ຍັງຊ່ວຍອະນຸລັກສິ່ງແວດລ້ອມ, ສ້າງລາຍຮັບທີ່ຍືນຍົງ ແລະ ສົ່ງເສີມການພັດທະນາກະສິກຳຢ່າງຍືນຍົງໃນອະນາຄົດ.
ເມື່ອຮູ້ແນວນີ້ ຜູ້ປະກອບການທັງຫລາຍ ລວມທັງຜູ້ບໍລິໂພກ ຄວນຫັນມາຜະລິດ ແລະ ບໍລິໂພກກະສິກຳສະອາດ, ກະສິກຳປອດສານຜິດໃຫ້ຫລາຍຂຶ້ນ ນອກຈາກຈະມີຜົນດີຕໍ່ສຸຂະພາບແລ້ວ ຍັງສາມາດສ້າງລາຍຮັບໃຫ້ແກ່ຄອບຄົວໃນໄລຍະຍາວ ທັງເປັນມິດກັບສິ່ງແວດລ້ອມອີກ.
KPL
