ຂປລ
ທ່ານ ຫລີສຽງ ນາຍົກລັດຖະມົນຕີຈີນ ໄດ້ພົບປະກັບ ທ່ານ ຮຸນມາເນດ ນາຍົກລັດຖະມົນຕີກຳປູເຈຍ ທີ່ເດີນທາງເຂົ້າຮ່ວມກອງປະຊຸມປັນຍາປະດິດໂລກ 2026 ແລະ ຢ້ຽມຢາມ ສປ ຈີນ ທາງລັດຖະກິດ.
ຂປລ ວິທະຍຸ ໂທລະພາບ ສູນກາງຈີນ, ໃນວັນທີ 16 ກໍລະກົດນີ້, ຢູ່ນະຄອນຫລວງປັກກິ່ງ, ທ່ານ ຫລີສຽງ ນາຍົກລັດຖະມົນຕີຈີນ ໄດ້ພົບປະກັບ ທ່ານ ຮຸນມາເນດ ນາຍົກລັດຖະມົນຕີກຳປູເຈຍ ທີ່ເດີນທາງເຂົ້າຮ່ວມກອງປະຊຸມປັນຍາປະດິດໂລກ 2026 ແລະ ຢ້ຽມຢາມ ສປ ຈີນ ທາງລັດຖະກິດ.
ທ່ານ ຫລີສຽງ ກ່າວວ່າ: ສປ ຈີນ ຍິນດີຮ່ວມກັບ ກຳປູເຈຍ ສ້າງສາພັດທະນາ ໂຄງການພື້ນຖານໂຄງລ່າງ ທີ່ສຳຄັນໃຫ້ດີ ແລະ ເປີດກວ້າງການຄ້າ ລະຫວ່າງ ສອງຝ່າຍ ຢ່າງຕໍ່ເນື່ອງ. ສປ ຈີນ ສະໜັບສະໜູນ ວິສາຫະກິດຈີນ ທີ່ມີກຳລັງແຮງ ຕົວຈິງໄປລົງທຶນ ໃນຂົງເຂດພັດທະນາໃໝ່ ເຊັ່ນ: ພະລັງງານໃໝ່ ແລະ ປັນຍາປະດິດ ເປັນຕົ້ນຢູ່ ກຳປູເຈຍ ໃຫ້ຫລາຍກວ່າເກົ່າ. ເພີ່ມທະວີ ການຮ່ວມມື ດ້ານວັດທະນະທຳ ແລະ ຮ່ວມກັນປາບປາມ ການພະນັນ ທາງອິນເຕີເນັດ ແລະ ອາຊະຍາກຳ ຫລອກລວງ ທາງໂທລະຄົມ. ໂດຍຜະເຊີນໜ້າກັບ ສະຖານະການສາກົນ ທີ່ປັ່ນປ່ວນ ວຸ່ນວາຍ, ສປ ຈີນ ແລະ ກຳປູເຈຍ ຄວນເພີ່ມທະວີ ການປະສານງານກັນ, ປົກປັກຮັກສາ ລະບຽບການຄ້າ ຫລາຍຝ່າຍ, ສົ່ງເສີມຍຸຕິທຳ ແລະ ຄວາມເປັນທຳ.
ທ່ານ ຮຸນມາ ເນດກ່າວວ່າ: ບໍ່ວ່າສະຖານະການສາກົນ ຈະເກີດມີການປ່ຽນແປງແນວໃດ, ລັດຖະບານ ກຳປູເຈຍ ລ້ວນແຕ່ຍຶດໝັ້ນ ໃນການປະຕິບັດ ນະໂຍບາຍ ມີມິດຕະພາບຕໍ່ ສປ ຈີນ ຢ່າງໝັ້ນໜຽວ ບໍ່ປ່ຽນແປງ, ຍຶດໝັ້ນຫລັກການ ປະເທດຈີນດຽວ ຢ່າງໝັ້ນໜຽວ ບໍ່ປ່ຽນແປງ. ກຳປູເຈຍ ຍິນດີເພີ່ມທະວີ ການຮ່ວມມື ໃນດ້ານການຄ້າ, ການລົງທຶນ, ການກໍ່ສ້າງພື້ນຖານໂຄງລ່າງ, ພະລັງງານໃໝ່, ເຊື່ອມໂຍງ ເຊື່ອມຈອດກັນ ແລະ ການປະຕິບັດກົດໝາຍ ດ້ານຄວາມໝັ້ນຄົງ ເພື່ອຊຸກຍູ້ ການສ້າງຄູ່ ຮ່ວມຊາຕາກຳ ສອງປະເທດ ໃຫ້ໄດ້ຮັບໝາກຜົນຕົວຈິງ ແລະ ຮັດແໜ້ນ ການປະສານງານໃນ ດ້ານວຽກງານຫລາຍຝ່າຍ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
