ຂປລ
ພິທີເຊັນສັນຍາສ້າງຕັ້ງ ອົງການຮ່ວມມື ປັນຍາປະດິດໂລກ ໄດ້ຈັດຂຶ້ນ ຢູ່ນະຄອນຊຽງໄຮ້, ທ່ານ ຫວາງຢີ້ ກຳມະການກົມການເມືອງ ສູນກາງພັກ ກອມມູນິດຈີນ ລັດຖະມົນຕີກະຊວງການຕ່າງປະເທດຈີນ ໄດ້ຕາງໜ້າລັດຖະບານຈີນ ເຊັນສັນຍາສະບັບນີ້.
ຂປລ ວິທະຍຸ ໂທລະພາບ ສູນກາງຈີນ, ວັນທີ 16 ກໍລະກົດນີ້, ພິທີເຊັນສັນຍາສ້າງຕັ້ງ ອົງການຮ່ວມມື ປັນຍາປະດິດໂລກ ໄດ້ຈັດຂຶ້ນ ຢູ່ນະຄອນຊຽງໄຮ້, ທ່ານ ຫວາງຢີ້ ກຳມະການກົມການເມືອງ ສູນກາງພັກ ກອມມູນິດຈີນ ລັດຖະມົນຕີກະຊວງການຕ່າງປະເທດຈີນ ໄດ້ຕາງໜ້າລັດຖະບານຈີນ ເຊັນສັນຍາສະບັບນີ້. ສັນຍາດັ່ງກ່າວ ລະບຸຢ່າງຈະແຈ້ງວ່າ: ອົງການຮ່ວມມື ປັນຍາປະດິດໂລກ ແມ່ນອົງການຈັດຕັ້ງສາກົນ ລະຫວ່າງ ລັດຖະບານ ທີ່ອິດສະຫລະ, ເຄົາລົບ “ກົດບັດສະຫະປະຊາຊາດ”, ຍຶດໝັ້ນແນວຄວາມຄິດ ປຶກສາຫາລືຮ່ວມກັນ, ສ້າງສາຮ່ວມກັນ ແລະ ຊົມໃຊ້ຮ່ວມກັນ, ຍຶດໝັ້ນຖືຄົນ ເປັນກົກ ເຊິ່ງມີຈຸດປະສົງຊຸກຍູ້ ການຮ່ວມມືສາກົນ ແລະ ການບໍລິຫານທົ່ວໂລກໃນດ້ານປັນຍາປະດິດ ເພື່ອຮັບປະກັນໃຫ້ປັນຍາປະດິດ ຂະຫຍາຍຕົວຢ່າງປອດໃສ ແລະ ເປັນລະບຽບຮຽບຮ້ອຍ ຕາມທິດທາງສ້າງຜົນປະໂຫຍດ, ປອດໄພ ແລະ ຍຸຕິທຳ ພ້ອມທັງ ສ້າງຄວາມສຸກໃຫ້ແກ່ ມວນມະນຸດ. ສຳນັກງານອົງການຕັ້ງຢູ່ນະຄອນຊຽງໄຮ້. ທ່ານ ທອງສະຫວັນ ພົມວິຫານ ຮອງນາຍົກລັດຖະມົນຕີ ທັງເປັນ ລັດຖະມົນຕີກະຊວງການຕ່າງປະເທດຂອງ ສປປ ລາວ ພ້ອມດ້ວຍ ຜູ້ຕາງໜ້າຂອງອີກ 28 ປະເທດ ເຊັ່ນ: ຣັດເຊຍ, ກາຊັກສະຖານ, ປາກິດສະຖານ ແລະ ອິນໂດເນເຊຍເປັນຕົ້ນໄດ້ລົງນາມ ໃນສັນຍາສະບັບດັ່ງກ່າວ ແລະ ກາຍເປັນປະເທດ ສ້າງຕັ້ງອົງການ. ຜູ້ຕາງໜ້າຈາກ ຫລາຍປະເທດ ແລະ ອົງການຈັດຕັ້ງສາກົນຕ່າງໆ ເຊັ່ນ: ທ່ານ ອັນໂຕນິໂອ ກູເຕີເຣດສ ເລຂາທິການໃຫຍ່ ອົງການ ສະຫະ ປະຊາຊາດເປັນຕົ້ນໄດ້ເຂົ້າຮ່ວມພິທີ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
