ຂປລ ວິທະຍຸ ໂທລະພາບ ສູນກາງຈີນ, ວັນ​ທີ 17 ກໍ​ລະ​ກົດ​ນີ້, ທ່ານ ​ສີ ​ຈິ້ນ​ຜິງ ປະ​ທານ​ປະ​ເທດ​ຈີນ​ ໄດ້ເຂົ້າ​ຮ່ວມພິ​ທີ​ໄຂ​ ກອງ​ປະ​ຊຸມ ​ປັນ​ຍາ​ປະ​ດິ​ດ​ໂລກ 2026 ກໍ​ຄື ​ກອງ​ປະ​ຊຸມ​ຂັ້ນ​ສູງ ວ່າ​ດ້ວຍ​ ການ​​ຄຸ້ມ​ຄອງ ​ປັນ​ຍາ​ປະ​ດິດ​ໂລກ​ ທີ່​ຈັດ​ຂຶ້ນ ​ຢູ່​ນະ​ຄອນ​ຊຽງ​ໄຮ້ ພາຍ​ໃຕ້​ຫົວ​ຂໍ້ “ຮ່ວມ​ກັນ​ສ້າງ​ລະ​ບົບ​​ການ​ຄຸ້ມ​ຄອງ ​ປັນ​ຍາ​ປະ​ດິດ​ທົ່ວ​ໂລກ ທີ່​ມີ​ຄວາມ​ຍຸ​ຕິ​ທຳ ແລະ ສົມ​ເຫດ​ສົມ​ຜົນ”.ໃນໂອກາດນີ້ ທ່ານ ​ສີ ​ຈິ້ນ​ຜິງ​ ໄດ້ກ່າວ​ເຖິງ​ ເນື້ອ​ໃນ​ສຳ​ຄັນ ຄື: ​ສປ ຈີນ​ ເຫັນ​ວ່າ ປະ​ເທດ​ຕ່າງໆ ​ຄວນ​ຍຶດ​ໝັ້ນ ​ຖື​ຄົນ​ເປັນ​ກົກ ແລະ ຍຶດ​ໝັ້ນ​ແນວ​ຄວາມ​ຄິດ​ ທີ່ສ້າງ​​ສັນ ເພື່ອ​ເຮັດ​ໃຫ້​ປັນ​ຍາ​ປະ​ດິດ​ ກາຍ​ເປັນ​ແຫລ່ງ​ພະ​ລັງ​ຂັບ​ເຄື່ອນ​ສຳ​ຄັນ ທີ່​ຊຸກ​ຍູ້​ຄວາມ​ຈະ​ເລີນ ​ຮຸ່ງ​ເຮືອງ​ຮ່ວມ​ກັນ ແລະ ປົກ​ປັກ​ຮັກ​ສາ​ ຄວາມ​ໝັ້ນ​ຄົງ​ຮ່ວມ​ກັນ, ຮ່ວມ​ກັນ​ສ້າງ​ລະ​ບົບ​ການຄຸ້ມ​ຄອງ ​ປັນ​ຍາ​ປະ​ດິດ​ທົ່ວ​ໂລກ ທີ່​ມີ​ຄວາມ​ຍຸ​ຕິ​ທຳ ແລະ ສົມ​ເຫດ​ສົມ​ຜົນ. ສປ ຈີນ​ ຍິນ​ດີ​ຮ່ວມ​ກັບ​ຝ່າຍ​ຕ່າງໆ ​ສ້າງໂອ​ກາດ ແລະ ຮັບ​ມື​ກັບ​ສິ່ງ​ທ້າ​ທາຍ​ແຫ່ງ​ ການ​ພັດ​ທະ​ນາ​ປັນ​ຍາ​ປະ​ດິດ ດ້ວຍ​ທ່າ​ທີ​ທີ່​ເປີດກວ້າງກວ່າ​ເກົ່າ, ການ​ເຄື່ອນ​ໄຫວ ​ທີ່​ຕິດ​ແທດ​ຕົວ​ຈິງ ກວ່າ​ເກົ່າ ແລະ ມີ​ສາຍ​ຕາເບິ່ງກວ້າງ ເຫັນ​ໄກ ​ກວ່າ​ເກົ່າ ເພື່ອ​ຮ່ວມ​ກັນ​ສ້າງ​ ອະ​ນາ​ຄົດ ​ທີ່​ດີ​ງາມກວ່າ​ເກົ່າ​ ໃຫ້​ແກ່​ສັງ​ຄົມ​ມະ​ນຸດ.ທ່ານ ​ສີ ​ຈິ້ນ​ຜິງ​ ໄດ້​ສະ​ເໜີ 4 ຂໍ້​ສະ​ເໜີ ຄື: ໜຶ່ງ, ຍຶດ​ໝັ້ນ​ເປີດ​ປະ​ຕູ​ສູ່​ພາ​ນອກ,  ຮ່ວມ​ມື​ກັນ​​ແບບ ​ຕ່າງ​ຝ່າຍ​ຕ່າງ​ໄດ້​ຮັບ​ຜົນ​ປະ​ໂຫຍດ ແລະ ຂັບ​ເຄື່ອນ​ການ​ພັດ​ທະ​ນາ​ ດ້ວຍ​ຫົວ​ຄິດ​ປະ​ດິດ​ສ້າງ; ສອງ, ເພີ່ມ​ສະ​ຕິ​ຄວາມ​ສ່ຽງ ແລະ ຮັບ​ປະ​ກັນ​ການ​ຄວບ​ຄຸມ ​ຕໍ່​ຄວາມ​ໝັ້ນ​ຄົງ; ສາມ, ສົ່ງ​ເສີມ​ຄວາມກວມ​ລວມ ແລະ ຊຸກ​ຍູ້​ການ​ຮຽນ​ຮູ້​ ເຊິ່ງ​ກັນ ​ແລະ​ ກັນ ​ລະ​ຫວ່າງ ອະ​ລິ​ຍະ​ທຳ​ຕ່າງໆ; ສີ, ສົ່ງ​ເສີມ​ຮ່ວມ​ແຮງ​ ຮ່ວມ​ໃຈ​ກັນ ແລະ ປັບ​ປຸງ​ການ​ບໍ​ລິ​ຫານ​ທົ່ວ​ໂລກ. ກອງ​ປະ​ຊຸມ​ໄດ້​ເຜີຍ​ແຜ່ “ຖະ​ແຫລງ​ການ​ປະ​ທານກອງ​ປະ​ຊຸມ ປັນ​ຍາ​ປະ​ດິ​ດ​ໂລກ 2026 ກໍ​ຄື ​ກອງ​ປະ​ຊຸມ​ຂັ້ນ​ສູງ ວ່າ​ດ້ວຍ​ການ​​ຄຸ້ມ​ຄອງ ​ປັນ​ຍາ​ປະ​ດິດໂລກ”./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL