ຂປລ. ເນື່ອງໃນໂອກາດ ທີ່ວິທະຍຸ ໂທລະພາບ ສູນກາງຈີນ (CMG) ຈັດກອງປະຊຸມ ເວທີປຶກສາຫາລື ການປະດິດສ້າງ ສື່ມວນຊົນ ທົ່ວໂລກ ຄັ້ງທີ 5,ໂທລະພາບ ສາກົນຈີນ(CGTN) ໄດ້ຈັດ ການສຳຫລວດ ຄວາມຄິດເຫັນ ຂອງຊາວເນັດທົ່ວໂລກ,ຜູ້ຕອບແບບສອບຖາມເຫັນວ່າ ປັນຍາປະດິດໄດ້ເສີມຂະຫຍາຍບົດບາດ ໃນການຊຸກຍູ້ນັບມື້ ນັບສຳຄັນຕໍ່ການປ່ຽນແປງ ກຳລັງການ ຜະລິດ ຄັ້ງໃໝ່ ຂອງສື່ມວນຊົນ. ໃນການສຳຫລວດ, ຜູ້ຕອບແບບສອບຖາມ 78,2% ເຫັນວ່າ ວິທີລາຍງານຂ່າວໃນຍຸກສື່ອັດສະລິຍະ ໄດ້ເກີດມີການປ່ຽນແປງຢ່າງເລິກເຊິ່ງ. ນອກນີ້,ຜູ້ຕອບແບບ ສອບຖາມ 71,7% ເຫັນວ່າ: ບົດບາດໃນດ້ານການສືບທອດອະລິຍະທຳ ແລະ ການເຜີຍແຜ່ວັດທະນະທຳ ຂອງສື່ມວນຊົນ ໃນຍຸກອັດສະລິຍະ ຈະຍົກສູງຂຶ້ນຕື່ມອີກ, ການສື່ສານຂ້າມພາສາ ແລະ ຂ້າມວັດ ທະນະທຳ ທີ່ບໍ່ມີສິ່ງກີດຂວາງ, ການປົກປັກຮັກສາພາສາ ແລະ ວັດທະນະທຳທ້ອງຖິ່ນ ທີ່ໃກ້ຈະສູນພັນ ການປັບປ່ຽນມໍລະດົກ ວັດທະນະທຳ ໃຫ້ເປັນດີຈີຕອນ ແລະ ການເລົ່າເລື່ອງ ດ້ວຍຮູບແບບ ອັດສະລິຍະຖືກຈັດເປັນ 3 ບົດບາດທຳອິດ ທີ່ຄວາມຫວັງ. ພ້ອມກັນນັ້ນ,ຜູ້ຕອບແບບສອບຖາມກໍ່ມີທ່າທີລະມັດລະວັງ ຕໍ່ຄວາມສ່ຽງທີ່ອາດຈະເກີດຂຶ້ນ ຈາກເຕັກໂນໂລຊີ ປັນຍາປະດິດ ຕໍ່ສື່ ມວນຊົນ.ໃນນັ້ນ,ຄວາມຖືກຕ້ອງຂອງຂໍ້ມູນຂ່າວສານ,ປັນຍາປະດິດອາດຈະເລັ່ງລັດໃຫ້ຄວາມສາມາດການປະດິດສ້າງຂອງມວນມະນຸດຊຸດໂຊມລົງ ລວມເຖິງການໃຊ້ຂໍ້ມູນສ່ວນຕົວໃນທາງທີ່ຜິດ ຖືກ ຈັດຢູ່ 3 ຄວາມກັງວົນອັນດັບຕົ້ນ. ຜູ້ຕອບແບບສອບຖາມ 95,9% ມີຄວາມເຫັນຄວນຈຳແນກ ແລະ ໃສ່ເຄື່ອງໝາຍຢ່າງຈະແຈ້ງ ຕໍ່ຜະລິດຕະພັນສື່ ທີ່ຜະລິດດ້ວຍເຕັກໂລໂລຊີ ປັນຍາປະດິດ, 92% ຮຽກຮ້ອງໃຫ້ສື່ມວນຊົນ ປັບປຸງກົນໄກ ການສຳຫລວດ ຄືນຕໍ່ເນື້ອໃນ ທີ່ຜະລິດ ດ້ວຍປັນຍາປະດິດ, 91,1% ຮຽກຮ້ອງ ໃຫ້ມີກົດໝາຍ ແລະ ລະບຽບການເພື່ອກຳນົດລະບຽບ ແບບແຜນໃນ ການນຳ ໃຊ້ ປັນຍາປະດິດ ໃນສື່ມວນຊົນ ເພື່ອຮັບປະກັນສະພາບແວດລ້ອມ ສື່ມວນຊົນ ທີ່ປອດໃສ ແລະ ຫລາກຫລາຍ. ນອກນີ້,ຍັງມີຜູ້ຕອບແບບສອບຖາມ 77,4% ເຫັນວ່າ: ການເພີ່ມທະວີ ການ ຮ່ວມ ມືສາກົນ ລະຫວ່າງ ສື່ມວນຊົນ ຈະມີຜົນດີ ໃນການຊ່ວຍກັນ ຮັບມືກັບສິ່ງທ້າທາຍໃນຍຸກປັນຍາປະດິດ ແລະ ເປັນແນວທາງ ໃນການສ້າງສະພາບແວດລ້ອມ ສື່ມວນຊົນທົ່ວໂລກ ທີ່ໝັ້ນໜຽວກວ່າ ເກົ່າ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL