ຂປລ. ແຕ່ອະດີດຈົນເຖິງປັດຈຸບັນປາແດກແມ່ນອາຫານຊະນິດໜຶ່ງທີ່ຢູ່ຄຽງຄູ່ກັບຄົນລາວເຮົາມາແຕ່ສະໄໝປູ່ຍ່າຕາຍາຍເພາະສະໄໝກ່ອນແຕ່ລະຄອບຄົວແມ່ນຈະໝັກປາແດກໄວ້ກິນເອງ ເພື່ອເປັນສ່ວນປະກອບໃນການປຸງແຕ່ງ ອາຫານໄດ້ຢ່າງແຊບຊ້ອຍ. ມາໃນຍຸກປັດຈຸບັນ ອີງໃສ່ຄວາມຮຽກຮ້ອງຕ້ອງການຂອງຜູ້ບໍລິໂພກທີ່ຕ້ອງການຄວາມສະດວກສະບາຍ ຈຶ່ງມີໂຮງງານຜະລິດນ້ຳປາແດກ ອອກມາຫລາຍສົມຄວນມີຫລາຍຍີ່ຫໍ້ໃຫ້ໄດ້ເລືອກບໍລິໂພກ ໜຶ່ງໃນນັ້ນກໍແມ່ນ ປາແດກຮຸ່ງເຮືອງສີນ  ຢູ່ບ້ານຈອມເພັດເໜືອ ເມືອງສີສັດຕະນາກ ນະຄອນຫລວງວຽງຈັນ ກໍເປັນຜະລິດຕະພັນໜຶ່ງຂອງຄົນລາວ ມີໂຮງງານຜະລິດເອງ ແລະ ໄດ້ຮັບຄວາມນິຍົມຈາກສັງຄົມຢ່າງກວ້າງຂວາງຈົນມີຊື່ສຽງໂດ່ງດັງບໍ່ແພ້ໃຜ ດ້ວຍ​ລົດ​ຊາດ​, ​ຄຸນ​ນະພາ​ບ ​ແລະ ສິນຄ້າ​ທີ່​ຫລາກ​ຫລາຍ​ບໍ່ວ່າ​ຈະ​ເປັ​ນປາ​ແດກ ດິບ, ສຸກ, ໜ່ຽວ, ຝຸ່ນ. ນອກຈາກນີ້, ຍັງມີແຈ່ວພັນ, ແຈ່ວຊີ້ນດາດ-ແຈ່ວລູກຊີ້ນ ​ແລະ ອື່ນໆອີກຫລາຍ​ຢ່າງ ​ເຊິ່ງ​​ບອກໄດ້​ເລີຍ​ວ່າ​ລົດ​ຊາດ​ແຊບ ຖືກ​ໃຈ ​ໃນ​ລາຄາ​ບໍໍ່ແພງ.

ທ່ານ ນາງ ວິໄລສິນ ເຕີນຕານ ໄດ້ໃຫ້ສຳພາດ ວ່າ:  ກ່ອນຈະ​ມາ​ເຮັດອາຊີບ​ນີ້ ແມ່ນເປັນແມ່ຄ້າຂາຍຜັກຢູ່ຕະຫລາດ, ຫຍິບເຄື່ອງນຸ່ງ ແຕ່ລາຍຮັບໜ້ອຍກວ່າລາຍຈ່າຍ ຊຶ່ງເຮັດໃຫ້ຄອບຄົວບໍ່ມີການພັດທະນາ, ບໍ່ກຸ້ມກິນ, ບໍ່ມີເງິນແຮໄວ້ໃນຄອບຄົວ. ມາຮອດປີ 1988 ຈຶ່ງລອງເຮັດປາແດກຂາຍ ແລະ ເຫັນໄດ້ວ່າມີການຕອບຮັບຈາກລູກຄ້າ ຈຶ່ງໄດ້ປຶກສາຫາລືກັນເພື່ອຫັນປ່ຽນອາຊີບ ເພື່ອຢາກໃຫ້ມີລາຍຮັບເຂົ້າສູ່ຄອບຄົວ ຈຶ່ງໄດ້ຕົກລົງກັນ ແລະ ລົງມືຜະລິດປາແດກອອກສູ່ສັງຄົມເປັນວົງກວ້າງ ໃນປີ 2004, ມີລູກຄ້າສົນໃຈ ແລະ ສັ່ງຊື້ເພີ່ມຂຶ້ນເລື້ອຍໆ. ມາຮອດປີ 2007 ໄດ້ສ້າງຕັ້ງໂຮງງານປາແດກຮຸ່ງເຮືອງສີນຂຶ້ນ, ມີພະນັກງານ 12 ຄົນ. ປັດຈຸບັນ ​ໂຮງງານ​ປາ​ແດກ​ຮຸ່ງ​ເຮືອ​ງສີນ ມີ​ຫລາຍ​ຜະລິດ​ຕະພັນ​ເປັນ​ຕົ້ນ​ແມ່ນ ປາແດກນ້ຳສຸກ (ສຳລັບໃຊ້ປຸງແຕ່ງອາຫານທົ່ວໄປ), ປາ​ແດກ​ຕໍາ,ໜຽວ , ຝຸ່ນ,ປາແດກ, ແຈ່ວພັນ, ແຈ່ວຊີ້ນດາດ-ແຈ່ວລູກຊີ້ນ. ສໍາລັບລາຄາ​ຂາຍ​ແມ່ນ ປາແດກຕົ້ມສຸກປຸງສຳເລັດຮູບສຳລັບໃສ່ຕຳ ຂະໜາດ 800 ml ຕຸກ 30.000 ກີບ, ປາແດກຕົ້ມສຸກປຸງສຳເລັດຮູບສຳລັບໃສ່ອາຫານທົ່ວໄປ ຂະໜາດ 700 ml ຕຸກ 20.000 ກີບ, 400 ml ຕຸກ 12.000 ກີບ , ແຈ່ວພັນໝ້ຽງພັນປາ, ຂະໜາດ 700 ml ຕຸກ 20.000 ກີບ, 250 ml ຕຸກ 10.000 ກີບ, ແຈ່ວຊີ້ນຈຸ່ມ+ດາດ, 700 ml ຕຸກ 25.000 ກີບ, 250 ml ຕຸກ 12.000 ກີບ, ປາແດກຝຸ່ນ 200 ກຣາມ 50.000ກີບ, ປາແດກໜຽວ 200 ກຣາມ 50.000 ກີບ.

ທ່ານ ນາງ ວິໄລສິນ ເຕີນຕານ ຍັງໄດ້ກ່າວຕື່ມອີກວ່າ: ຜ່ານການສູ້ຊົນສ້າງເສດຖະກິດມາຮອດປັດຈຸບັນ ຊີວິດການເປັນຢູ່ຂອງຄອບຄົວ ໄດ້ຮັບການພັດທະນາດີຂຶ້ນເປັນກ້າວໆ ແລະ ມີລາຍຮັບໝັ້ນຄົງ ສະມາຊິກພາຍໃນຄອບຄົວ ມີຄວາມສາມັກຄີ, ມີຄວາມດຸໝັ່ນ, ເປັນຈິດໜຶ່ງໃຈດຽວ ພ້ອມກັນເຮັດພ້ອມກັນສ້າງ ຈຶ່ງໄດ້ຮັບຜົນສຳເລັດຄືດັ່ງກ່າວ; ປັດຈຸບັນມີເຮືອນຢູ່ຖາວອນ, ລົດໃຫຍ່, ລົດຈັກ, ມີໂຮງງານຜະລິດແຈ່ວປາແດກ, ມີທຶນການສຶກສາສົ່ງລູກ­ຮຽນ ແລະ ມີທຶນໝູນວຽນພາຍໃນຄອບຄົວຈຳນວນໜຶ່ງ ແລະ ກາຍເປັນຄອບຄົວຕົວແບບ.  ສຳລັບທິດທາງ ແລະ ແຜນການໃນຕໍ່ໜ້າຈະສືບຕໍ່ຜະລິດປາແດກໃຫ້ຫລາຍຂຶ້ນ ເພື່ອຮອງຮັບກັບຄວາມຮຽກຮ້ອງຕ້ອງການຂອງຜູ້ບໍລິໂພກ ກໍຄືລູກຄ້າ ເນື່ອງຈາກວ່າປາແດກເຮົາ ເປັນສິນຄ້າໂອດັອບໜຶ່ງເມືອງໜຶ່ງຜະລິດຕະພັນ ແລະ ເປັນສິນຄ້າທີ່ຫລາຍໆຄົນນິຍົມກິນ

ສໍາລັບ ທ່ານ​ທີ່​ສົນ​ໃຈ​ຢາກ​ໄດ້​ປາ​ແດກ​ແຊ​ບ ​ໄວ້​ກິນ ​ຫລື ​ນໍາ​ໄປ​ຂາຍ​ກໍ​ສາມາດ​ຕິດຕໍ່ສອບ​ຖາມ​ໄດ້​ທີ​ເບີ 020 9615737.

KPL