ຂປລ
ຂປລ. ອາທິດຜ່ານມາ ພະແນກວັດທະນະທຳ ແລະ ການທ່ອງທ່ຽວ ເມືອງຮຸນ ແຂວງອຸດົມໄຊ ໄດ້ຈັດກອງປະຊຸມທົບທວນຄືນຄວາມຄືບໜ້າໂຄງການພັດທະນາແຫລ່ງທ່ອງທ່ຽວ ຕາດນ້ຳແຮງ ເພື່ອປະເມີນຄືນຜົນການເຄື່ອນໄຫວ ຈັດຕັ້ງປະຕິບັດວຽກງານກ່ຽວກັບການພັດທະນາ ແຫລ່ງທ່ອງທ່ຽວ ຕາດນຳ້ແຮງ ເມືອງຮຸນ ແຂວງອຸດົມໄຊ
ຂປລ. ອາທິດຜ່ານມາ ພະແນກວັດທະນະທຳ ແລະ ການທ່ອງທ່ຽວ ເມືອງຮຸນ ແຂວງອຸດົມໄຊ ໄດ້ຈັດກອງປະຊຸມທົບທວນຄືນຄວາມຄືບໜ້າໂຄງການພັດທະນາແຫລ່ງທ່ອງທ່ຽວ ຕາດນ້ຳແຮງ ເພື່ອປະເມີນຄືນຜົນການເຄື່ອນໄຫວ ຈັດຕັ້ງປະຕິບັດວຽກງານກ່ຽວກັບການພັດທະນາ ແຫລ່ງທ່ອງທ່ຽວ ຕາດນຳ້ແຮງ ເມືອງຮຸນ ແຂວງອຸດົມໄຊ ທີ່ໄດ້ຮັບການລົງນາມໃນສັນຍາອະນຸຍາດການລົງທຶນ ຕັ້ງແຕ່ປີ 2019 ເປັນຕົ້ນມາ ໂດຍແມ່ນບໍລິສັດ ເກດມະນີ ກຣຸບ ຈຳກັດຜູ້ດຽວ ເປັນຜູ້ທີ່ໄດ້ຮັບອະນຸຍາດ ສຳປະທານ ໃນການພັດທະນາແຫລ່ງທ່ອງທ່ຽວດັ່ງກ່າວ. ພ້ອມທັງ ຍົກໃຫ້ເຫັນຜົນສຳເລັດຂອງການຈັດຕັ້ງປະຕິບັດວຽກງານແຕ່ລະດ້ານ ລວມທັງຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍ ແລະ ຈຸດອ່ອນຂໍ້ຄົງຄ້າງໆ ຂອງບັນດາໜ້າວຽກທີ່ຈັດຕັ້ງບໍ່ທັນສຳເລັດ. ໂດຍແນໃສ່ເຮັດໃຫ້ໂຄງການພັດທະນາແຫລ່ງທ່ອງທ່ຽວ ຕາດນ້ຳແຮງ ເມືອງຮຸນ ແຂວງອຸດົມໄຊ ໄດ້ຮັບການຈັດຕັ້ງປະຕິບັດໄປຕາມທິດທາງແຜນການ, ວັນເວລາ ທີ່ໄດ້ກຳນົດໄວ້ໃນສັນຍາ.
ທ່ານນາງ ເກດມະນີ ຫານຊະນະ ອຳນວຍການ ບໍລິສັດ ເກດມະນີ ກຣຸບ ຈຳກັດຜູ້ດຽວ ເຫັນວ່າໂຄງການພັດທະນາ ແຫ່ງທ່ອງທ່ຽວ ຕາດນ້ຳແຮງ ເມືອງຮຸນ ແຂວງອຸດົມໄຊ ມາຮອດປັດຈຸບັນ ແມ່ນຍັງຢູ່ໃນຂັ້ນຕອນຂອງການກໍ່ສ້າງ ເປັນຕົ້ນແມ່ນອາຄານທີ່ພັກ, ສິ່ງອຳນວຍຄວາມສະດວກ, ການປັບປຸງເສັ້ນທາງ ແລະ ການສົມທົບກັບການນຳເມືອງ, ຂະແໜງການກ່ຽວຂ້ອງຂັ້ນເມືອງ ເພື່ອແກ້ໄຂບັນຫາຮ່ວມກັບປະຊາຊົນທີ່ໄດ້ຮັບຜົນກະທົບ. ໂດຍລວມແລ້ວ ຖືວ່າ ການຈັດຕັ້ງປະຕິບັດໂຄງການດັ່ງກ່າວ ແມ່ນມີຄວາມລ້າຊ້າ. ດັ່ງນັ້ນ, ບັນດາຂະແໜງການກ່ຽວຂ້ອງ ທັງຂັ້ນແຂວງ,ເມືອງ ໄດ້ພ້ອມກັນປຶກສາຫາລື ແລະ ປະກອບຄຳຄິດຄຳເຫັນ ເພື່ອຊອກຫາແນວທາງໃນການແກ້ໄຂ ແລະ ກະຕຸກຊຸກຍູ້ໃຫ້ບໍລິສັດ ທີ່ໄດ້ຮັບການສຳປະທານໂຄງການດັ່ງກ່າວ ຮີບຮ້ອນ ຈັດຕັ້ງປະຕິບັດ ແລະ ດຳເນີນການພັດທະນາ ແຫລ່ງທ່ອງທ່ຽວ ຕາດນ້ຳແຮງ ເມືອງຮຸນ ແຂວງອຸດົມໄຊ ໃຫ້ສຳເລັດຕາມແຜນການ ແລະ ດຳເນີນການບໍລິການ ຕາມວັນເວລາທີ່ກຳນົດໄວ້ ໂດຍຕິດພັນກັບການປົກປັກຮັກສາທຳມະຊາດ, ສະພາບແວດລ້ອມ ແລະ ປະກອບສ່ວນເຂົ້າໃນການພັດທະນາ ຂອບເຂດດັ່ງກ່າວ ໃຫ້ມີຄວາມຈະເລີ່ນຮຸ່ງເຮືອງ,ປະຊາຊົນມີວຽກເຮັດງານທຳ ແລະ ມີຊີວິດການເປັນຢູ່ທີ່ດີຂຶ້ນເທື່ອລະກ້າວ.
ນ້ຳຕົກຕາດນ້ຳແຮງ ບ້ານກະຕາງຢາ ຕັ້ງຢູ່ຫ່າງຈາກເທສະບານ ເມືອງຮຸນ ປະມານ 24 ກິໂລແມັດ. ເປັນເສັ້ນທາງປູຢາງ 4 ກິໂລແມັດ ຈາກນັ້ນເຂົ້າເປັນເສັ້ນທາງຍົກລະດັບປູຫີນແຮ່ ແລະ ດິນແດງທ່ຽວໄດ້ໃນລະດູແລ້ງເທົ່ານັ້ນ, ທ່າແຮງຂອງຕາດແມ່ນເປັນສະຖານທີ່ທ່ອງທ່ຽວທີ່ສວຍງາມອີກແຫ່ງໜຶ່ງຂອງແຂວງອຸດົມໄຊ ທີ່ອຸດົມສົນບູນດ້ວຍທຳມະຊາດ, ຊີວະນາໆພັນ, ຕາດມີຫລາຍພັກເປັນຊັ້ນ ແລະ ມີລັກສະນະເນີນຂຶ້ນໄປ, ແຕ່ລະພັກສາມາດລົງຫລິ້ນນ້ຳໄດ້, ນອກຈາກນີ້ ທ່ານຈະໄດ້ສໍາຜັດວິຖີຊີວິດຂອງປະຊາຊົນທີ່ຢູ່ໃກ້ຄຽງອີກດ້ວຍ.
ໂດຍ: ຄານມະນີ ຮຽນດໍຈັນ
KPL
