ຂປລ
ຂປລ.ເນື່ອງໃນໂອກາດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ, ທ່ານ ຫງວຽນ ມິງເຕິມ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ໄດ້ໃຫ້ສຳພາດຕໍ່ສຳນັກຂ່າວປະເທດລາວ
ຂປລ.ເນື່ອງໃນໂອກາດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ, ທ່ານ ຫງວຽນ ມິງເຕິມ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳ ສປປ ລາວ ໄດ້ໃຫ້ສຳພາດຕໍ່ສຳນັກຂ່າວປະເທດລາວ ວ່າ: ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIV ຂອງພັກກອມມູນິດຫວຽດນາມມີຫົວຂໍ້ວ່າ "ພາຍໃຕ້ທຸງໄຊອັນສະຫງ່າລາສີຂອງພັກ, ຮ່ວມແຮງຮ່ວມໃຈ, ເປັນຈິດໜຶ່ງໃຈດຽວ ຈັດຕັ້ງປະຕິບັດສໍາເລັດບັນດາຄາດໝາຍການພັດທະນາປະເທດຊາດ ໃຫ້ໄດ້ຮັບໄຊຊະນະຈົນເຖິງປີ 2030; ເປັນເຈົ້າຕົນເອງທາງດ້ານຍຸດທະສາດ, ສ້າງຄວາມເຂັ້ມແຂງດ້ວຍຕົນເອງ, ມີຄວາມເຊື່ອໝັ້ນ, ກ້າວຂຶ້ນຢ່າງເຂັ້ມແຂງໃນສັກກະລາດແຫ່ງການບືນຕົວບຸກທະລຸຂອງຊາດ, ເພື່ອສັນຕິພາບ, ເອກະລາດ, ປະຊາທິປະໄຕ, ຄວາມຮັ່ງມີເຂັ້ມ ແຂງ, ຮຸ່ງເຮືອງສີວິໄລ, ມີຄວາມຜາສຸກ ແລະ ບາດກ້າວທີ່ໝັ້ນຄົງສູ່ສັງຄົມນິຍົມ." ນີ້ແມ່ນເຫດການທາງການເມືອງທີ່ສຳຄັນທີ່ສຸດ, ທີ່ມີຄວາມໝາຍພິເສດຕໍ່ພັກ, ລັດ, ແລະ ປະຊາຊົນຫວຽດນາມ ເຊິ່ງເປັນຂີດໝາຍ ໃນການພັດທະນາໃໝ່ຂອງປະເທດ ໃນສະຖານະການທີ່ຫວຽດນາມກຳລັງເຂົ້າສູ່ສັງກາດໃໝ່, ສັງກາດຂອງການພັດທະນາຢ່າງວ່ອງໄວ, ຍືນຍົງ ແລະ ການເຊື່ອມໂຍງສາກົນຢ່າງກວ້າງຂວາງ. ກອງປະຊຸມໃຫຍ່ຄັ້ງທີ XIV ຂອງພັກກອມມູນິດຫວຽດນາມ ມີພາລະກິດໃນກຳນົດບັນດາທິດທາງນະໂຍບາຍຍຸດທະສາດ ມີລັກສະນະໄລຍະຍາວ ເພື່ອຫັນຄວາມມຸ່ງຫວັງພັດທະນາປະເທດຊາດທີ່ຈະເລີນຮຸ່ງເຮືອງ ແລະ ມີຄວາມສຸກໃຫ້ປາກົດຜົນເປັນຈິງ, ກ້າວໄປສູ່ສັງຄົມນິຍົມຢ່າງໜັກແໜ້ນ. ກອງປະຊຸມໃຫຍ່ສະແດງໃຫ້ເຫັນເຖິງຄວາມຕັດສິນໃຈທາງການເມືອງເປັນຢ່າງສູງຂອງທົ່ວພັກ, ທົ່ວປະຊາຊົນ, ແລະ ທົ່ວກອງທັບໃນການປະຕິບັດເປົ້າໝາຍ "ປະຊາຊົນຮັ່ງມີິ, ປະເທດຊາດທີ່ຈະເລີນຮຸ່ງເຮືອງເຂັ້ມແຂງ, ປະຊາທິປະໄຕ, ຍຸຕິທຳ, ແລະ ສີວິໄລ".
ພິທີພົບປະສອງຝ່າຍ ລາວ-ຫວຽດນາມ
ກ່ອນອື່ນໝົດ, ກອງປະຊຸມໃຫຍ່ຄັ້ງທີ XIV ມີຄວາມໝາຍແມ່ນກອງປະຊຸມທີ່ຈະກຳນົດວິໄສທັດ ແລະ ຍຸດທະສາດສຳລັບການພັດທະນາປະເທດຊາດຈົນຮອດກາງສະຕະວັດທີ 21, ໂດຍໄດ້ຫັນບັນດາເປົ້າໝາຍຫລັກທີ່ໄດ້ກຳນົດໄວ້ແລ້ວປາກົດຜົນເປັນຈິງ, ຄື: ຮອດປີ 2030, ຫວຽດນາມຈະກາຍເປັນປະເທດກຳລັງພັດທະນາທີ່ມີອຸດສາຫະກຳທີ່ທັນສະໄໝ ແລະ ມີລາຍຮັບປານກາງສູງ; ແລະ ຮອດປີ 2045 ຫວຽດນາມຈະກາຍເປັນປະເທດພັດທະນາທີ່ມີລາຍໄດ້ສູງ. ໂດຍອີງໃສ່ການສະຫລຸບຢ່າງເລິກເຊິ່ງກ່ຽວກັບພຶດຕິກຳໃນເກືອບ 40 ປີທີ່ດຳເນີນຂະບວນການປ່ຽນແປງໃໝ່, ກອງປະຊຸມໃຫຍ່ຈະສືບຕໍ່ຢືນຢັນເສັ້ນທາງໄປສູ່ສັງຄົມນິຍົມສອດຄ່ອງກັບເງື່ອນໄຂສະເພາະຂອງຫວຽດນາມ, ພ້ອມທັງກຳນົດບັນດານະໂຍບາຍ, ວິທີມາດຕະການ ແລະ ການບຸກທະລຸຍຸດທະສາດໃໝ່ໆ ເພື່ອຕອບສະໜອງຄວາມຕ້ອງການດ້ານການພັດທະນາໃນສະພາບການຂອງໂລກ ແລະ ພາກພື້ນທີ່ກຳລັງມີການຜັນແປຢ່າງວ່ອງໄວ, ສັບສົນ ແລະ ບໍ່ສາມາດຄາດເດົາໄດ້.
ອັນທີສອງ, ກອງປະຊຸມໃຫຍ່ຄັ້ງທີ XIV ມີຄວາມສຳຄັນເປັນພິເສດໃນການສືບຕໍ່ປັບປຸງຮູບແບບການພັດທະນາ ແລະ ການບໍລິຫານປະເທດທີ່ທັນສະໄໝ, ໂດຍຖືປະຊາຊົນເປັນໃຈກາງ, ເປັນເປົ້າໝາຍ ແລະ ເປັນກຳລັງແຮງຂອງການພັດທະນາ. ກອງປະຊຸມໃຫຍ່ສະແດງໃຫ້ເຫັນເຖິງການຮຽກຮ້ອງ, ປຸກລະດົມພະນັກງານ, ສະມາຊິກພັກ ແລະ ປະຊາຊົນ; ກຳນົດທິດໃຫ້ປະເທດເພື່ອສືບຕໍ່ຍູ້ແຮງຂະບວນການປ່ຽນແປງໃໝ່ຢ່າງຮອບດ້ານ, ຄົບຊຸດ ແລະ ເລິກເຊິ່ງ ເພື່ອໃຫ້ຫວຽດນາມສາມາດມີຄວາມໝັ້ນໃຈ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະ ກ້າວໜ້າໃນສັງກາດໃໝ່ຢ່າງແຂງແຮງ; ປະຕິບັດບັນດາເປົ້າໝາຍການພັດທະນາປະເທດໃຫ້ສຳເລັດຜົນຢ່າງມີໄຊຮອດປີ 2030, ເມື່ອສະເຫລີມສະຫລອງວັນສ້າງຕັ້ງພັກກອມມູນິດຫວຽດນາມ ຄົບຮອບ 100 ປີ (1930-2030); ແລະ ຫັນວິໄສທັດຮອດປີ 2045 ໃຫ້ປາກົດຜົນຕົວຈິງ ເພື່ອສະເຫລີມສະຫລອງວັນສະຖາປະນາສາທາລະນະລັດສັງຄົມນິຍົມຫວຽດນາມ ຄົບຮອບ 100 ປີ (1945-2045).
ອັນທີສາມ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ສະແດງໃຫ້ເຫັນຢ່າງຊັດເຈນເຖິງເປົ້າໝາຍລວມ, ແນວຄິດຫລັກແຫລ່ງແກ່ນສານ ແລະ ຊອດທະລຸ ເຊັ່ນ: ການນຳພາຂອງພັກ, ບົດບາດຂອງປະຊາຊົນ ແລະ ກຳລັງແຮງລວມຂອງປະຊາຊົນທັງຊາດ; ສະແດງໃຫ້ເຫັນເຖິງຄວາມຍຶດໝັ້ນໃນການສືບຕໍ່ຂະບວນການປ່ຽນແປງໃໝ່ ແລະ ເປົ້າໝາຍພັດທະນາປະເທດ; ສືບທອດ ແລະ ພັດທະນາບັນດາແນວຄິດ ແລະ ທິດທາງທີ່ໄດ້ກຳນົດໄວ້ໃນບັນດາກອງປະຊຸມໃຫຍ່ຄັ້ງຕ່າງໆ, ພິເສດແມ່ນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIII.
ສາມາດຢືນຢັນໄດ້ວ່າ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ ບໍ່ພຽງແຕ່ເປັນເຫດການທາງການເມືອງທີ່ສຳຄັນທີ່ສຸດສຳລັບພັກ ແລະ ປະຊາຊົນຫວຽດນາມເທົ່ານັ້ນ, ແຕ່ຍັງເປັນຈຸດສຳຄັນພິເສດທີ່ສະແດງໃຫ້ເຫັນເຖິງຄວາມເປັນເອກະພາບທາງດ້ານແນວຄິດ ແລະ ການກະທຳ, ທິດສະດີ ແລະ ພຶດຕິກຳ; ຍຶດໝັ້ນ ແລະ ປ່ຽນແປງໃໝ່, ສືບທອດ ແລະ ພັດທະນາ, ປັບປຸງຄວາມເຊື່ອຖືຕໍ່ພັກ ແລະ ອະນາຄົດຂອງຊົນຊາດຫວຽດນາມ; ຢືນຢັນຄຸນນະທາດ ແລະ ສະຕິປັນຍາຂອງພັກ ແລະ ກຳລັງແຂງຂອງຊົນຊາດຫວຽດນາມທັງໝົດ; ເປີດໂອກາດໃໝ່ ແລະ ແຫລ່ງກຳລັງແຮງໃໝ່ໃຫ້ແກ່ການພັດທະນາ, ສ້າງພື້ນຖານທີ່ໜັກແໜ້ນໃຫ້ຫວຽດນາມ, ພາຍໃຕ້ການນຳພາຂອງພັກກອມມູນິດຫວຽດນາມ, ກ້າວເຂົ້າສູ່ສັງກາດໃໝ່, ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.
ໃນສະພາບການຂອງໂລກທີ່ມີການຜັນແປຢ່າງສັບສົນ, ແຕ່ພາຍໃຕ້ການນຳພາຂອງພັກກອມມູນິດຫວຽດນາມ, ໂດຍມີການເຂົ້າຮ່ວມຢ່າງຕັ້ງໜ້າຂອງປະຊາຊົນ ແລະ ວິສາຫະກິດ, ພ້ອມທັງການສະໜັບສະໜູນຈາກເພື່ອນມິດສາກົນ, ຫວຽດນາມ ໄດ້ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIII ຢ່າງສຳເລັດຜົນ ຮອບດ້ານໃນທຸກຂົງເຂດ. ພົ້ນເດັ່ນຄື ດ້ານປ້ອງກັນປະເທດ ແລະ ຄວາມໝັ້ນຄົງໄດ້ຮັບການປັບປຸງຢ່າງໜັກແໜ້ນ; ທ່າທີປ້ອງກັນປະເທດທົ່ວປວງຊົນ, ຄວາມສະຫງົບປະຊາຊົນ ແລະ ທ່າທີຈິດໃຈປະຊາຊົນນັບມື້ນັບແໜ້ນແຟ້ນ; ຮັບປະກັນຄວາມເປັນລະບຽບຮຽບຮ້ອຍ, ຄວາມປອດໄພຂອງສັງຄົມ; ວຽກງານກໍ່ສ້າງ, ປັບປຸງພັກ ແລະ ລະບົບການເມືອງບັນລຸໄດ້ຜົນສຳເລັດ, ໂດຍສະເພາະແມ່ນການປະຕິວັດໃນການຈັດຊ້ອນກົນຈັກຄືນໃໝ່ຕາມທິດກະທັດຮັດຍອດຢ້ຽມ, ຄ່ອງແຄ້ວ, ເຂັ້ມແຂງ, ມີປະສິດທິພາບ ແລະ ມີປະສິດທິຜົນ. ການຂະຫຍາຍຕົວທາງເສດຖະກິດໃນໄລຍະປີ 2021-2025 ບັນລຸໄດ້ສະເລ່ຍປະມານ 6,3% ຕໍ່ປີ ເຊິ່ງເປັນລະດັບສູງສຸດໃນໂລກ. ລະບົບພື້ນຖານໂຄງລ່າງເສດຖະກິດ-ສັງຄົມໄດ້ຮັບການລົງທຶນທີ່ເຂັ້ມແຂງແຮງກ້າ, ໂດຍມີໂຄງການທີ່ສຳຄັນລະດັບຊາດຫລາຍໂຄງການໃນດ້ານການຄົມມະນາຄົມ, ພະລັງງານ, ແລະ ພື້ນຖານໂຄງລ່າງດີຈິຕອນ. ວິທະຍາສາດ, ເຕັກໂນໂລຊີ, ນະວັດຕະກຳ, ແລະ ການຫັນເປັນດີຈິຕອນແຫ່ງຊາດຖືບົດບາດທີ່ສຳຄັນ, ສ້າງພື້ນຖານໃຫ້ແກ່ການປັບໃໝ່ໃນຮູບແບບການເຕີບໂຕເທື່ອລະກ້າວ. ໃນຂົງເຂດວັດທະນະທຳ-ສັງຄົມ, ຄວາມຮັບຮູ້ກ່ຽວກັບບົດບາດຂອງວັດທະນະທຳໃນການພັດທະນາແບບຍືນຍົງນັບມື້ນັບໄດ້ຮັບການຍົກສູງຂຶ້ນ. ບັນດານະໂຍບາຍສະຫວັດດິການສັງຄົມ ໄດ້ຮັບການຈັດຕັ້ງປະຕິບັດຢ່າງຄົບຊຸດ ແລະ ມີປະສິດທິຜົນສູງ; ຊີວິດການເປັນຢູ່ດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການປັບປຸງໃຫ້ດີຂຶ້ນຢ່າງຈະແຈ້ງ. ຕົວຊີ້ວັດການພັດທະນາມະນຸດ (HDI) ເພີ່ມຂຶ້ນ 14 ອັນດັບ, ຕົວຊີ້ວັດດ້ານຄວາມສຸກເພີ່ມຂຶ້ນ 33 ອັນດັບ ເມື່ອທຽບກັບຕົ້ນສະໄໝ. ການບໍລິການດ້ານສາທາລະນະສຸກ ແລະ ເບິ່ງແຍງສຸຂະພາບຂອງປະຊາຊົນມີຄວາມຄືບໜ້າຢ່າງຕັ້ງໜ້າ, ວຽກງານປະກັນສາທາລະນະສຸກ ບັນລຸ ໄດ້ 95,2% ແລະ ອາຍຸຍືນສະເລ່ຍບັນລຸ 74,8 ປີ. ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນໄດ້ຮັບການປັບປຸງໃຫ້ດີຂຶ້ນຢ່າງຈະແຈ້ງ; ອັດຕາຄວາມທຸກຍາກໄດ້ຫລຸດລົງຢ່າງຫລວງຫລາຍ, ຈາກ 4,4% (ປີ 2021) ລົງເປັນ 1,3% (ປີ 2025).
ສະເພາະໃນປີ 2025 ທີ່ຜ່ານມາ, ຫວຽດນາມ ໄດ້ປະຕິບັດສຳເລັດ, ບັນລຸ ແລະ ລື່ນກາຍເປົ້າໝາຍເສດຖະກິດ-ສັງຄົມທີ່ສຳຄັນທັງໝົດ 15 ເປົ້າໝາຍ, ບັນລຸອັດຕາການເຕີບໂຕຂອງ ຈີດີພີ (GDP) ປະມານ 8,02%, ຂະໜາດ GDP ຄາດຄະເນວ່າຫລາຍກວ່າ 510 ຕື້ໂດລາສະຫະລັດ (1,47 ເທົ່າ GDP ຂອງປີ 2020); GDP ສະເລ່ຍຕໍ່ຫົວຄົນປະມານ 5.000 ໂດລາສະຫະລັດ ແລະ ກາຍເປັນຕົວແບບໜຶ່ງໃນການພັດທະນາເສດຖະກິດ-ສັງຄົມ, ນຳພາຫວຽດນາມເຂົ້າສູ່ກຸ່ມປະເທດທີ່ມີລາຍໄດ້ປານກາງສູງ.
ວຽກງານຕ່າງປະເທດ ແລະ ການເຊື່ອມໂຍງສາກົນໄດ້ຮັບການຈັດຕັ້ງປະຕິບັດຢ່າງຮອບດ້ານ ເຊິ່ງໄດ້ຍົກສູງບົດບາດ ແລະ ອິດທິພົນຂອງຫວຽດນາມໃນເວທີສາກົນ. ຫວຽດນາມໄດ້ຍຶດໝັ້ນ, ສືບຕໍ່ດຳເນີນນະໂຍບາຍການຕ່າງປະເທດທີ່ເປັນເອກະລາດ, ເປັນເຈົ້າຕົນເອງ, ສັນຕິພາບ, ມິດຕະພາບ, ຮ່ວມມື ແລະ ພັດທະນາ, ຫັນເປັນຫລາຍຮູບຫລາຍແບບ ແລະ ຫລາຍຝ່າຍ. ກິດຈະກຳການຕ່າງປະເທດໄດ້ເສີມຂະຫຍາຍບົດບາດປະຈັນບານ, ທົ່ວທັງລະບົບການເມືອງໄດ້ເຂົ້າຮ່ວມຢ່າງຕັ້ງໜ້າໃນການສ້າງພື້ນຖານການຕ່າງປະເທດ ແລະ ການທູດຫວຽດນາມທີ່ທັນສະໄໝ ແລະ ຮອບດ້ານ, ປະກອບສ່ວນຮັກສາສະພາບແວດລ້ອມສັນຕິພາບ ແລະ ສະຖຽນລະພາບ ແລະ ເປີດໂອກາດການພັດທະນາໃໝ່ໃຫ້ແກ່ປະເທດ. ການທູດດ້ານພັກ, ການທູດແຫ່ງລັດ ແລະ ການທູດປະຊາຊົນ ໄດ້ຮັບການຈັດຕັ້ງປະຕິບັດຢ່າງຮອບດ້ານ ແລະ ຄົບຊຸດ, ບັນລຸໄດ້ຜົນງານທີ່ໂດດເດັ່ນຫລາຍຢ່າງ. ມາຮອດປັດຈຸບັນ, ຫວຽດນາມມີການພົວພັນກັບ 194 ປະເທດ ແລະ ເຂດແຄວ້ນ; ສ້າງຕັ້ງການພົວພັນຄູ່ຮ່ວມມືຮອບດ້ານ, ການພົວພັນຄູ່ຮ່ວມມືຍຸດທະສາດ ແລະ ການພົວພັນຄູ່ຮ່ວມມືຍຸດທະສາດຮອບດ້ານກັບ 42 ປະເທດ ແລະ ສ້າງຕັ້ງສາຍພົວພັນກັບ 259 ພັກການເມືອງໃນ 119 ປະເທດທົ່ວໂລກ. ເປັນຄັ້ງທຳອິດ, ຫວຽດນາມໄດ້ສ້າງສາຍພົວພັນຄູ່ຮ່ວມມືຍຸດທະສາດຮອບດ້ານກັບສະມາຊິກຖາວອນຂອງສະພາຄວາມໝັ້ນຄົງສະຫະປະຊາຊາດທັງໝົດ 5 ປະເທດ ແລະ ການພົວພັນຄູ່ຮ່ວມມືຮອບດ້ານ ຫລື ສູງກວ່າກັບ 18 ໃນ 21 ສະມາຊິກຂອງກຸ່ມ G20 ເຊິ່ງເປັນກຸ່ມເສດຖະກິດທີ່ພັດທະນາແລ້ວ ແລະ ພວມພັດທະນາ.
ໃນຜົນສຳເລັດໂດຍລວມຂອງຂະແໜງການຕ່າງປະເທດ, ພື້ນຖານຂອງສາຍພົວພັນ ແລະ ຄວາມໄວ້ເນື້ອເຊື່ອໃຈທາງດ້ານການເມືອງກັບຫລາຍປະເທດ, ໂດຍສະເພາະແມ່ນປະເທດບ້ານໃກ້ເຮືອນຄຽງ, ຄູ່ຮ່ວມງານທີ່ສຳຄັນ ແລະ ເພື່ອນມິດທີ່ເປັນມູນເຊື້ອ, ສືບຕໍ່ໄດ້ຮັບການປັບປຸງຢ່າງໜັກແໜ້ນ ແລະ ໝັ້ນຄົງ. ພິເສດແມ່ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ, ແລະ ຫຸ້ນສ່ວນຍຸດທະສາດລະຫວ່າງຫວຽດນາມ ແລະ ລາວ ນັບມື້ນັບພັດທະນາຢ່າງແຂງແຮງ, ເຂົ້າສູ່ລວງເລິກ, ມີປະສິດທິພາບ ແລະ ແທດຈິງໃນຫລາຍຂົງເຂດ. ການພົວພັນທາງດ້ານການເມືອງ ແລະ ການທູດລະຫວ່າງສອງປະເທດສືບຕໍ່ໄດ້ຮັບການເພີ່ມທະວີິ ແລະ ເຂົ້າສູ່ລວງເລິກກວ່າເກົ່າ. ການນຳຂັ້ນສູງຂອງສອງພັກ, ສອງລັດໄດ້ເຫັນດີເປັນເອກະພາບຢ່າງສູງໃນບັນດາບັນຫາທີ່ເປັນຍຸດທະສາດ ແລະ ກຳນົດທິດທາງການພັດທະນາສາຍພົວພັນສອງຝ່າຍ, ດັ່ງທີ່ສະແດງໃຫ້ເຫັນຜ່ານການຕົກລົງຂອງສອງຝ່າຍທີ່ໄດ້ຍົກລະດັບການພົວພັນເພີ່ມເປັນ "ຫຸ້ນສ່ວນຍຸດທະສາດ" ເນື່ອງໃນການເດີນທາງມາຢ້ຽມຢາມທາງລັດຖະກິດຢູ່ ສປປ ລາວ ຂອງສະຫາຍ ໂຕ ເລີມ ເລຂາທິການໃຫຍ່, ໃນເດືອນ 12/2025. ການຮ່ວມມືດ້ານການປ້ອງກັນປະເທດ ແລະ ປ້ອງກັນຄວາມສະຫງົບສືບຕໍ່ໄດ້ຮັບການເປີດກວ້າງ, ເປັນໜຶ່ງໃນເສົາຄ້ຳທີ່ສຳຄັນຂອງສາຍພົວພັນຫວຽດນາມ-ລາວ, ປະກອບສ່ວນເຂົ້າໃນການຮັກສາສະຖຽນລະພາບທາງດ້ານການເມືອງ, ຮັບປະກັນການປ້ອງກັນຊາດ ແລະ ປ້ອງກັນຄວາມສະຫງົບ, ແລະ ຄວາມເປັນລະບຽບຮຽບຮ້ອຍ, ຄວາມປອດໄພທາງດ້ານສັງຄົມຂອງແຕ່ລະປະເທດ. ສອງປະເທດຍັງປະສານງານຢ່າງໃກ້ຊິດ, ໜັກແໜ້ນ, ແລກປ່ຽນຂໍ້ມູນຂ່າວສານຢ່າງຕັ້ງໜ້າ ແລະ ສະໜັບສະໜູນ ແລະ ຊ່ວຍເຫລືອເຊິ່ງກັນ ແລະ ກັນໃນບັນດາເວທີຫລາຍຝ່າຍໃນພາກພື້ນ ແລະ ສາກົນ. ການຮ່ວມມືໃນຂົງເຂດສຳຄັນອື່ນໆ ເຊັ່ນ: ການເຊື່ອມຕໍ່ຄົມມະນາຄົມ, ການສຶກສາ-ກໍ່ສ້າງ, ວັດທະນະທຳ, ການພົບປະປະຊາຊົນ ແລະ ການທ່ອງທ່ຽວ ກໍໄດ້ຮັບຜົນສຳເລັດຢ່າງຕັ້ງໜ້າ. ພົ້ນເດັ່ນແມ່ນການຮັບຮູ້ໂດຍອົງການສຶກສາ, ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO) ວ່າປ່າສະຫງວນ ແຫ່ງຊາດຫີນໜາມໜໍ່ (ແຂວງຄຳມ່ວນ, ສປປ ລາວ) ເປັນມໍລະດົກໂລກທາງທຳມະຊາດຂ້າມຊາຍແດນ, ເຊື່ອມຕໍ່ກັບປ່າສະຫງວນ ແຫ່ງຊາດຟອງຍາ - ແກ້ບ່າງ. (ແຂວງກວາງຈິ, ສສ ຫວຽດນາມ) ເຊິ່ງສະແດງໃຫ້ເຫັນເຖິງຄວາມພະຍາຍາມຮ່ວມກັນ ແລະ ເປັນແຫລ່ງຄວາມພາກພູມໃຈຂອງທັງສອງປະເທດ.
ພິທີເປີດນໍາໃຊ້ ທ່າເຮືອ ເລກ 3, ທ່າເຮືອສາກົນ ລາວ-ຫວຽດນາມ ຫວຸ້ງອາງ ຢ່າງເປັນທາງການ ເຊິ່ງຕັ້ງຢູ່ ເມືອງກິແອັງ ແຂວງຮາຕິງ ສສ ຫວຽດນາມ ໄດ້ຈັດຂຶ້ນໃນວັນທີ 28 ເມສາ 2025 ຜ່ານມາ
ຫລັງຈາກກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກປະຊາຊົນປະຕິວັດລາວ, ດ້ວຍພື້ນຖານສາຍພົວພັນພິເສດ, ຄວາມໄວ້ເນື້ອເຊື່ອໃຈທາງດ້ານການເມືອງຢ່າງເລິກເຊິ່ງ ແລະ ມີພື້ນທີ່ກວ້າງຂວາງສຳລັບການຮ່ວມມື, ຂ້າພະເຈົ້າເຊື່ອໝັ້ນວ່າການພົວພັນຮ່ວມມືລະຫວ່າງສອງປະເທດຈະສືບຕໍ່ບຸກທະລຸຢ່າງເຂັ້ມແຂງແຮງກ້າໃນໄລຍະຕໍ່ໄປ, ປະກອບສ່ວນຢ່າງຕັ້ງໜ້າເຂົ້າໃນການຮັກສາສະພາບແວດລ້ອມທີ່ສັນຕິພາບ, ສະຖຽນລະພາບ ໃຫ້ແກ່ການພັດທະນາປະເທດຊາດ; ຍົກສູງພາລະບົດບາດ, ອິດທິພົນຂອງທັງສອງປະເທດ ຫວຽດນາມ ແລະ ລາວໃນເວທີສາກົນ; ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.
ໃນຂົງເຂດການລົງທຶນ, ດັ່ງທີ່ພວກເຮົາໄດ້ຮູ້ແລ້ວ, ຫວຽດນາມ ຍາມໃດກໍແມ່ນໜຶ່ງໃນສາມຄູ່ຮ່ວມມືທາງເສດຖະກິດທີ່ສຳຄັນທີ່ສຸດຂອງລາວ. ລາວ ຂົງເຂດໃຫຍ່ທີ່ສຸດສຳລັບການລົງທຶນຂອງຫວຽດນາມຢູ່ຕ່າງປະເທດ ໃນທັງໝົດ 85 ປະເທດ ແລະ ເຂດແຄວ້ນທີ່ມີການລົງທຶນຂອງຫວຽດນາມ , ໂດຍມີ 282 ໂຄງການ ແລະ ທຶນຈົດທະບຽນທັງໝົດບັນລຸໄດ້ເກືອບ 7 ຕື້ໂດລາສະຫະລັດ. ບັນດາວິສາຫະກິດຫວຽດນາມໄດ້ລົງທຶນເຂົ້າໃນ 17 ແຂວງ ໃນ ທັງໝົດ 18 ແຂວງ ແລະ ນະຄອນຂອງລາວ, ສ້າງວຽກເຮັດງານທຳ ແລະ ເພີ່ມລາຍຮັບໃຫ້ແກ່ຜູ້ອອກແຮງງານຫລາຍກວ່າ 100.000 ຄົນ; ປະກອບສ່ວນປະມານ 200 ລ້ານໂດລາສະຫະລັດຕໍ່ປີເຂົ້າໃນງົບປະມານຂອງລັດຖະບານລາວ, ແລະ ຈັດຕັ້ງປະຕິບັດນະໂຍບາຍດ້ານສະຫວັດດີການສັງຄົມດ້ວຍມູນຄ່າລວມທັງໝົດປະມານ 200 ລ້ານໂດລາສະຫະລັດມາຮອດປັດຈຸບັນ. ໃນດ້ານການຄ້າ, ຫວຽດນາມ ຍາມໃດກໍເປັນຄູ່ຮ່ວມມືທາງການຄ້າອັນດັບສາມຂອງລາວ. ໃນຊຸມປີມໍ່ໆມານີ້, ການຮ່ວມມືດ້ານການຄ້າລະຫວ່າງສອງປະເທດໄດ້ບັນລຸຜົນສຳເລັດສຳຄັນຫລາຍຢ່າງ ແລະ ບັນລຸໄດ້ຫລາຍຂີດໝາຍສຳຄັນໃໝ່.
ສະເພາະໃນປີ 2025, ພາຍໃຕ້ການຊີ້ນຳທີ່ເຂັ້ມງວດຂອງການນຳຂັ້ນສູງຂອງທັງສອງປະເທດ, ການຮ່ວມມືດ້ານເສດຖະກິດ, ການລົງທຶນ ແລະ ການຄ້າລະຫວ່າງສອງປະເທດຖືກຕີລາຄາວ່າເປັນປີແຫ່ງ “ຄວາມກ້າວໜ້າກະໂດດຂັ້ນທີ່ເຂັ້ມແຂງ” ໂດຍມີຜົນສຳເລັດທີ່ສຳຄັນ ແລະ ໂດດເດັ່ນຫລາຍຢ່າງ. ການຮ່ວມມືດ້ານການລົງທຶນໄດ້ມີການຄືບໜ້າຢ່າງຕັ້ງໜ້າ; ປະສານສົມທົບແກ້ໄຂຄວາມຫຍຸ້ງຍາກ ແລະ ຂໍ້ຄົງຄ້າງຢ່າງວ່ອງໄວທັນການ; ການສົ່ງເສີມການລົງທຶນ ແລະ ການຄ້າ, ແນະນຳ, ການກວດກາ ແລະ ຊຸກຍູ້ໄດ້ຮັບການເພີ່ມທະວີຂຶ້ນ. ການລົງທຶນຂອງຫວຽດນາມໃນລາວບັນລຸປະມານ 773,7 ລ້ານໂດລາສະຫະລັດ, ເພີ່ມຂຶ້ນປະມານສີ່ເທົ່າເມື່ອທຽບກັບໄລຍະດຽວກັນໃນປີ 2024. ຍອດການຄ້າລະຫວ່າງ ຫວຽດນາມ-ລາວ ບັນລຸ ປະມານ 3 ຕື້ໂດລາສະຫະລັດ, ເພີ່ມຂຶ້ນຫລາຍກວ່າ 32,7% ເມື່ອທຽບກັບປີ 2024.
ການຮ່ວມມືໃນຂະແໜງການທ່ອງທ່ຽວລະຫວ່າງ ຫວຽດນາມ ແລະ ລາວ ກໍໄດ້ບັນລຸຜົນສຳເລັດຢ່າງແທດຈິງ. ປັດຈຸບັນ, ນັກທ່ອງທ່ຽວຫວຽດນາມແມ່ນແຂກທ່ອງທ່ຽວສາກົນທີ່ໃຫຍ່ອັນດັບທີສອງຂອງລາວ ໂດຍມີນັກທ່ອງທ່ຽວຫວຽດນາມຫລາຍກວ່າ 1,1 ຕື້ຖ້ຽວຄົນ ໄດ້ມາຢ້ຽມຢາມລາວໃນປີ 2025. ໃນເດືອນກໍລະກົດ 2025, ອົງການ UNESCO ໄດ້ຮັບຮອງເອົາປ່າສະຫງວນ ແຫ່ງຊາດ ຫີນໜາມໜໍ່ຂອງລາວເປັນມໍລະດົກໂລກທາງທຳມະຊາດ ຂ້າມຊາຍແດນເຊື່ອມຕໍ່ກັບປ່າສະຫງວນ ແຫ່ງຊາດຟອງຍາ - ແກ້ບ່າງຂອງຫວຽດນາມ ແລະ ກາຍເປັນມໍລະດົກຂ້າມຊາຍແດນແຫ່ງທຳອິດໃນອາຊີຕາເວັນອອກສ່ຽງໃຕ້. ໃນປີ 2025, ລາວຍັງໄດ້ຮັບຮອງເສັ້ນທາງ ເຈື່ອງເຊີນ ຢູ່ດິນລາວເປັນສະຖານຮ່ອງຮອຍປະຫວັດສາດລະດັບຊາດ. ສອງຝ່າຍກໍໄດ້ປະສານສົມທົບຈັດຕັ້ງປະຕິບັດ, ຈັດພິທີເປີດເປັນທາງການ ແລະ ມອບຮັບ, ນຳໃຊ້ ສວນອຸທະຍານມິດຕະພາບລາວ-ຫວຽດນາມ ແລະ ຍັງສືບຕໍ່ຊຸກຍູ້ຢ່າງຕັ້ງໜ້າບັນດາໂຄງການພື້ນຖານໂຄງລ່າງຄົມມະນາຄົມຍຸດທະສາດເຊັ່ນ: ທາງດ່ວນວຽງຈັນ-ຮ່າໂນ້ຍ ແລະ ທາງລົດໄຟລາວ-ຫວຽດນາມ; ລົງທຶນ, ພັດທະນາທ່າເຮືອວຸງອາງ ເພື່ອຊ່ວຍລາວຫັນເປົ້າໝາຍກາຍເປັນປະເທດເຊື່ອມຕໍ່ໃຫ້ປາກົດຜົນເປັນຈິງ.
ພິທີເປີດນໍາໃຊ້ ທ່າເຮືອ ເລກ 3, ທ່າເຮືອສາກົນ ລາວ-ຫວຽດນາມ ຫວຸ້ງອາງ ຢ່າງເປັນທາງການ ເຊິ່ງຕັ້ງຢູ່ ເມືອງກິແອັງ ແຂວງຮາຕິງ ສສ ຫວຽດນາມ ໄດ້ຈັດຂຶ້ນໃນວັນທີ 28 ເມສາ 2025 ຜ່ານມາ
ສາມາດຢືນຢັນໄດ້ວ່າ,ພວກເຮົາກຳລັງປະສົບກັບໂອກາດໃໝ່ ເພື່ອຍູ້ແຮງການພົວພັນລະຫວ່າງສອງປະເທດ. ດັ່ງທີ່ໄດ້ລະບຸໃນຖະແຫລງການຮ່ວມ ເນື່ອງໃນໂອກາດການຢ້ຽມຢາມທາງລັດຖະກິດຢູ່ ສປປ ລາວ ຂອງສະຫາຍ ໂຕ ເລິມ ເລຂາທິການໃຫຍ່ພັກກອມມູນິດຫວຽດນາມ ໃນເດືອນທັນວາ 2025 ທີ່ຜ່ານມາ ເຊິ່ງໄດ້ເນັ້ນໜັກວ່າ ຈຸດໝາຍຫລກແຫລ່ງແກ່ນສານໃນປັດຈຸບັນແມ່ນ: "ເພື່ອນຳເອົາການຮ່ວມມືດ້ານເສດຖະກິດ - ການຄ້າ ແລະ ການລົງທຶນໄດ້ກາຍເປັນເສົາຄ້ຳຂອງການຫຸ້ນສ່ວນຍຸດທະສາດໃໝ່”. ນີ້ສະແດງເຖິງການຍົກລະດັບຢ່າງແຂງແຮງ, ຈາກ “ເສົາຄ້ຳທີ່ສຳຄັນ” ມາເປັນ “ເສົາຄ້ຳຫຸ້ນສ່ວນຍຸດທະສາດ”, ໂດຍເນັ້ນໜັກວ່າການຮ່ວມມືດ້ານເສດຖະກິດຕ້ອງເປັນເສັ້ນເຊື່ອມຕໍ່ທີ່ເຂັ້ມແຂງທີ່ສຸດເພື່ອປົກປ້ອງ ແລະ ພັດທະນາສາຍພົວພັນພິເສດລະຫວ່າງສອງປະເທດ.
ໃນໄລຍະປີ 2026-2030, ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ ດ້ວຍຜົນສຳເລັດອັນດີງາມຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກປະຊາຊົນປະຕິວັດລາວ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ, ສອງປະເທດຈະເປີດບົດໃໝ່ໃຫ້ແກ່ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດລະຫວ່າງສອງປະເທດ.
ໃນຂະແໜງການລົງທຶນ, ຈະມີການຫັນປ່ຽນຢ່າງແຂງແຮງຈາກ “ປະລິມານ” ໄປສູ່ “ຄຸນນະພາບ”. ພວກເຮົາຈະສຸມໃສ່ບັນດາໂຄງການຂະໜາດໃຫຍ່, ເຕັກໂນໂລຊີສູງ ແລະ ໂຄງການປຸງແຕ່ງທີ່ເລິກເຊິ່ງ; ເປີດກະແສການລົງທຶນໃໝ່ໄປສູ່ບັນດາຂະແໜງການທີ່ບຸລິມະສິດ ເຊັ່ນ: ພະລັງງານສະອາດ - ພະລັງງານທົດແທນ, ແຮ່ທາດທີ່ມີມູນຄ່າເພີ່ມສູງ ແລະ ການທ່ອງທ່ຽວແບບນິເວດວິທະຍາຂະໜາດໃຫຍ່. ພວກເຮົາສູ້ຊົນເພີ່ມຍອດທຶນຈາກ ສສ ຫວຽດນາມ ລົງທຶນເຂົ້າມາ ສປປ ລາວ ບັນລຸໄດ້ 10 ຕື້ໂດລາສະຫະລັດ ໃນສະໄໝນີ້.
ໃນດ້ານການຄ້າ, ໂດຍທັງສອງຝ່າຍໄດ້ເພີ່ມທະວີການຮ່ວມມືໃຫ້ນັບມື້ນັບແທ້ຈິງ ແລະ ມີປະສິດທິຜົນສູງຂຶ້ນ, ຍອດການຄ້າຈະບັນລຸເປົ້າໝາຍ 5 ຕື້ໂດລາສະຫະລັດໃນໄວໆນີ້. ພົ້ນເດັ່ນແມ່ນການລົງທຶນທີ່ປະສົບຜົນສຳເລັດໃນໂຮງງານຜະລິດພະລັງງານທົດແທນເຊັ່ນ: ໂຄງການພະລັງງານລົມ ເຈື່ອງເຊີນ ທີ່ມີກຳລັງການຜະລິດ 600 MW ຢູ່ແຂວງບໍລິຄຳໄຊ, ເລີ່ມດຳເນີນເປັນການຄ້າໃນເດືອນກັນຍາ 2025, ຫລັງຈາກ 15 ເດືອນກໍ່ສ້າງ; ໂຄງການພະລັງງານລົມ ສະຫວັນ 1 ທີ່ມີກຳລັງການຜະລິດ 300 MW ຢູ່ແຂວງສະຫວັນນະເຂດ, ດຳເນີນທາງການຄ້າ ແລະ ຂາຍໄຟຟ້າໃຫ້ຫວຽດນາມ ຕັ້ງແຕ່ເດືອນທັນວາ 2025 ຫລັງຈາກ 14 ເດືອນຈັດຕັ້ງຜັນຂະຫຍາຍ. ທັງສອງຝ່າຍຈະໝູນໃຊ້ບັນດາກົນໄກພິເສດບູລິມະສິດລະຫວ່າງສອງປະເທດເປັນແຫລ່ງກຳລັງແຮງເພື່ອສ້າງບາດກ້າວບຸກທະລຸ, ດັ່ງນັ້ນຈຶ່ງປະກອບສ່ວນເຂົ້າໃນການຊຸກຍູ້ການຄ້າສອງຝ່າຍທີ່ມີການພັດທະນາຢ່າງແທດຈິງ, ສ້າງວຽກເຮັດງານທຳ, ຍົກສູງລາຍຮັບ ແລະ ການດຳລົງຊີວິດຂອງປະຊາຊົນທັງສອງປະເທດ; ປະກອບສ່ວນເຂົ້າໃນສັນຕິພາບ, ມິດຕະພາບ, ສະຖຽນລະພາບ, ການຮ່ວມມື ແລະ ການພັດທະນາແບບຍືນຍົງໃນພາກພື້ນ ແລະ ໃນໂລກ.
ການຮ່ວມມືດ້ານການທ່ອງທ່ຽວ ລະຫວ່າງສອງປະເທດໃນໄລຍະໃໝ່ນີ້ຈະມີຄວາມຫວັງໃໝ່ຫລາຍຢ່າງ: ທັງສອງຝ່າຍກຳລັງກະກຽມຢ່າງຕັ້ງໜ້າເພື່ອການເຈລະຈາ ແລະ ການລົງນາມໃນແຜນການຮ່ວມມືດ້ານການທ່ອງທ່ຽວຫວຽດນາມ-ລາວ ສຳລັບໄລຍະ 2026-2030. ທິດທາງຕໍ່ໄປນີ້, ທັງສອງຝ່າຍຈະສຸມໃສ່ຍົກສູງຄຸນນະພາບ ແລະ ປະສິດທິຜົນຂອງການຮ່ວມມື ບໍ່ພຽງແຕ່ຂະຫຍາຍປະລິມານ. ສອງປະເທດຈະໃຫ້ບຸລິມະສິດຕໍ່ການພັດທະນາຜະລິດຕະພັນທ່ອງທ່ຽວສີຂຽວ, ການທ່ອງທ່ຽວກະສິກຳ, ແລະ ທ່ອງທ່ຽວວັດທະນະທຳທ້ອງຖິ່ນ. ຫວຽດນາມ ແລະ ລາວ ຈະເອົາການຫັນປ່ຽນດີຈິຕອນເຂົ້າໃນການໂຄສະນາ ແລະ ການຄຸ້ມຄອງຈຸດໝາຍປາຍທາງ; ສົ່ງເສີມການເຊື່ອມຕໍ່ການບໍລິການດີຈີຕອນ ແລະ ສ້າງພື້ນຖານຂໍ້ມູນຮ່ວມກ່ຽວກັບວັດທະນະທຳ ແລະ ການທ່ອງທ່ຽວ. ທິດທາງນີ້ຈະຊ່ວຍສ້າງລະບົບຕ່ອງໂສ້ຂອງການສະໜອງບໍລິການທ່ອງທ່ຽວໃນພາກພື້ນຢ່າງຍືນຍົງ. ຂ້າພະເຈົ້າເຊື່ອວ່າ, ດ້ວຍຄວາມຕັດສິນໃຈຂອງທັງສອງຝ່າຍ, ການຮ່ວມມືດ້ານການທ່ອງທ່ຽວຈະກາຍເປັນເສົາຄ້ຳໜຶ່ງໃນທີ່ສຳຄັນໃນສາຍພົວພັນຮ່ວມມືຫວຽດນາມ-ລາວໃນໄວໆນີ້, ປະກອບສ່ວນຊຸກຍູ້ພັດທະນາເສດຖະກິດແບບຍືນຍົງໃຫ້ແກ່ແຕ່ລະປະເທດ ແລະ ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນຮ່ວມມືພິເສດຫວຽດນາມ-ລາວ.
KPL
