ຂປລ
ນັບແຕ່ປີນີ້ ເປັນຕົ້ນມາ, ການພັດທະນາ ອຸດສາຫະກຳ ຊົນນະບົດ ໃຫ້ຈະເລີນກ້າວໜ້າ ຂອງ ສປ ຈີນ ໄດ້ສືບຕໍ່ມີທ່ວງທ່າທີ່ດີ, ຄວາມທົນທານ ຂອງຂະແໜງການຕ່າງໆ ໄດ້ເຂັ້ມແຂງຂຶ້ນກວ່າເກົ່າ ຢ່າງຕໍ່ເນື່ອງ.
ຂປລ.ວິທະຍຸ-ໂທລະພາບ ສູນກາງຈີນ, ກະຊວງກະສິກຳ ແລະ ຊົນນະບົດຈີນ ໄດ້ເປີດເຜີຍ ໃຫ້ຮູ້ ຫວ່າງມໍ່ໆມານີ້ວ່າ: ນັບແຕ່ປີນີ້ ເປັນຕົ້ນມາ, ການພັດທະນາ ອຸດສາຫະກຳ ຊົນນະບົດ ໃຫ້ຈະເລີນກ້າວໜ້າ ຂອງ ສປ ຈີນ ໄດ້ສືບຕໍ່ມີທ່ວງທ່າທີ່ດີ, ຄວາມທົນທານ ຂອງຂະແໜງການຕ່າງໆ ໄດ້ເຂັ້ມແຂງ ຂຶ້ນກວ່າເກົ່າ ຢ່າງຕໍ່ເນື່ອງ. ລະຫວ່າງ ເດືອນມັງກອນ ຫາເດືອນຕຸລາ, ຍອດມູນຄ່າ ການຂາຍຍ່ອຍ ເຄື່ອງບໍລິໂພກ ຂອງຊົນນະບົດຈີນ ບັນລຸ 5.500 ຕື້ຢວນ, ເພື່ມຂຶ້ນ 4,6% ເມື່ອທຽບໃສ່ ໄລຍະດຽວກັນ ຂອງປີກາຍນີ້.
ກະສິກຳ ໄດ້ເຊື່ອມໂຍງ ເຂົ້າກັນ ກັບການທ່ອງທ່ຽວ, ວັດທະນະທຳ, ກິລາ ແລະ ການຄ້າ ເອເລັກໂຕຣນິກ ເປັນຕົ້ນຢ່າງເລິກເຊິ່ງ, ຮູບການ ຂະແໜງການໃໝ່ ເຊັ່ນ: ການທ່ອງທ່ຽວ ແບບພັກຜ່ອນ ຢ່ອນອາລົມ ຢູ່ຊົນນະບົດ, ການຄ້າ ເອເລັກໂຕຣນິກ ຢູ່ຊົນນະບົດ ແລະ ອື່ນໆ ໄດ້ເຕີບໂຕພັດທະນາ ຢ່າງວ່ອງໄວ, ບໍ່ພຽງແຕ່ໄດ້ກາຍ ເປັນຈຸດເຕີບໂຕໃໝ່ ທີ່ຊຸກຍູ້ ການພັດທະນາ ຊົນນະບົດ ເທົ່ານັ້ນ, ຍັງແມ່ນຊ່ອງທາງໃໝ່ ທີ່ເພີ່ມລາຍຮັບ ໃຫ້ແກ່ ຊາວກະສິກອນ ອີກດ້ວຍ.
ປີນີ້, ລັດຖະບານຈີນ ໄດ້ເລັ່ງລັດ ການພັດທະນາ ອຸດສາຫະກຳ ທີ່ມີເອກະລັກພິເສດ ຂອງຊົນນະບົດ ແລະ ຊຸກຍູ້ການພັດທະນາ ຜະລິດຕະພັນກະສິກຳ ພື້ນບ້ານ, ເຊິ່ງໄດ້ສະໜັບ ສະໜູນ ການສ້າງໃໝ່ 40 ກຸ່ມຂະແໜງ ການທີ່ມີເອກະລັກພິເສດ ແລະທ່າແຮງ, 50 ສູນອຸດສາຫະກຳ ກະສິກຳ ທີ່ທັນສະໄໝ, 200 ຕາແສງ ທີ່ມີຄວາມເຂັ້ມແຂງ ດ້ານອຸດສາຫະກຳກະສິກຳ, ນຳພາການບຳລຸງສ້າງ 398 ບ້ານທີ່ມີຄວາມເຂັ້ມແຂງ ດ້ານອຸດສາຫະກຳ, ຊຸກຍູ້ການພັດທະນາ ຜະລິດຕະພັນ ກະສິກຳ ອັນນ້ອຍ ໃຫ້ກາຍເປັນ ອຸດສາຫະກຳໃຫຍ່./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
