*ບໍ່ວ່າອາຊີບໃດໆ, ຖ້າມີຄວາມດຸໝັ່ນ, ອົດທົນ, ຫ້າວຫັນ, ມີຄວາມຮັບຜິດຊອບຕໍ່ໜ້າທີ່ວຽກງານ ລວມທັງວຽກພັກ-ວຽກລັດ ແລະ ວຽກຄອບຄົວ ກໍສາມາດປະສົບຜົນສຳເລັດໄດ້. ເໝືອນດັ່ງຄອບຄົວ ທ່ານ ສະເຫລີມພອນ ແສງທະວີ ອາຍຸ 41 ປີ ຢູ່ບ້ານນາແດງ ເມືອງໄຊບູລີ ແຂວງສະຫວັນນະເຂດ ໄດ້ກາຍເປັນຄອບຄົວຕົວແບບ ໃນການຜະລິດເປັນສິນຄ້າຂອງເມືອງ (ກ້າເບ້ຍຢາງພາລາເປັນສິນຄ້າ).

          ທ່ານ ສະເຫລີມພອນ ແສງທະວີ  ໃຫ້ຮູ້ວ່າ: ປັດຈຸບັນຕົນເອງເປັນ ຮອງເລຂາໜ່ວຍພັກບ້ານ-ຮອງນາຍບ້ານ ແລະ ເປັນອຳນວຍການໂຮງຮຽນປະຖົມ ບ້ານ ນາມ່ວງ ເມືອງ ໄຊບູລີ. ນອກຈາກຈະປະຕິບັດໜ້າທີ່ ວຽກງານທີ່ໄດ້ຮັບມອບໝາຍ ຈາກຂັ້ນເທິງແລ້ວ, ຕົນເອງຍັງເອົາເວລາຫລັງເລີກໂຮງຮຽນ ມາເຮັດອີກໜຶ່ງອາຊີບຄື ກ້າເບ້ຍຢາງພາລາຍຂາຍ ເພື່ອສ້າງລາຍຮັບ ເຂົ້າສູ່ຄອບຄົວ ເຮັດໃຫ້ຄອບຄົວມີຊີວິດ ການເປັນຢູ່ດີຂຶ້ນເທື່ອລະກ້າວ. ກ່ອນການເລີ່ມຕົ້ນກ້າເບ້ຍຢາງພາລາເປັນສິນຄ້າ ຕົນເອງແມ່ນໄດ້ປູກຕົ້ນຢາງ ມາກ່ອນກັບພໍ່-ແມ່ ແລະຄອບຄົວ ທີ່ບ້ານນາແດງ, ມີຈຳນວນຕົ້ນຢາງ 1.500 ຕົ້ນ ໂດຍໄດ້ຮັບການສະໜອງຕົ້ນກ້າຈາກ ບໍລິສັດໄທຮົວ, ເລີ່ມປູກໃນກາງປີ 2005 ແລະໄດ້ເລີ່ມຂີດເອົານໍ້າຢາງໃນປີ 2011, ສະເລ່ຍລາຍ ໄດ້ຕໍ່ເດືອນ ແມ່ນ 20 ລ້ານກີບ, ໃນ 1 ປີ ຈະຂີດໄດ້ 9 ເດືອນ, ພັກ 3 ເດືອນ, ລາຍໄດ້ ຕໍ່ປີ 180 ລ້ານກີບ, ຫລັງຂີດຢາງໄດ້ 5 ປີ ແມ່ນຫັນມາກ້າເບ້ຍຢາງຂາຍ ໂດຍໄດ້ຮັບ ຄວາມຮູ້ດ້ານ ວິຊາການຈາກຜູ້ເປັນອ້າຍ ທີ່ໄດ້ໄປເຮັດວຽກຢູ່ສວນຢາງພາລາ ຢູ່ທາງພາກໃຕ້ຂອງປະເທດໄທ ແລະ ຕົນເອງຕອນຍັງໜຸ່ມນ້ອຍ ກໍ່ເຄີຍໄປເຮັດວຽກເອົາປະສົບການ ກ້າເບ້ຍຢາງພາລາ ຢູ່ປະເທດໄທ ປະມານ 1 ປີ. ໃນປີ 2016 ເລີ່ມກ້າເບ້ຍ 5.000 ເບ້ຍຂາຍໃນລາຄາ 8.000 ກີບ ເທົ່າ 40 ລ້ານກີບ, ປີຕໍ່ມາກ້າເບ້ຍໄດ້ 10.000 ເບ້ຍຂາຍ 8.000 ກີບ ເທົ່າກັບ 80 ລ້ານກີບ ແລະ ຂະຫຍາຍການປູກເພີ່ມຂຶ້ນເລື້ອຍໆ ໃນແຕ່ລະປີ, ຈົນມາຮອດປີ 2024-2025 ກ້າເບ້ຍໄດ້ 60.000 ເບ້ຍ ຂາຍໃນລາຄາ 20.000 ກີບ ເທົ່າກັບ 1ຕື້ 200 ລ້ານກີບ, ໃນນັ້ນມີ ຢາງຕາຂຽວ 130.000 ເບ້ຍຂາຍໃນລາຄາ 10.000 ກີບ ເທົ່າກັບ 1 ຕື້ 300 ລ້ານກີບ, ມີລາຍໄດ້ລວມແມ່ນ 2 ຕື້ 500 ລ້ານກີບ (ສ່ວນລາຍ ຈ່າຍແມ່ນເຄິ່ງໜຶ່ງ ຂອງລາຍໄດ້).ສຳລັບເນື້ອທີ່ ກ້າຢາງພາລາລວມມີ 7 ເຮັກຕາ, ສ່ວນເນື້ອທີ່ປູກຕົ້ນຢາງ ແລະ ໄດ້ຂີດເອົານໍ້າຢາງແລ້ວມີ 2 ເຮັກຕາ, ລວມ ເປັນ 9 ເຮັກຕາ, ໄດ້ຈ້າງແຮງງານ 29 ຄົນ, ຍິງ 14 ຄົນ ເຊິ່ງແຕ່ລະປີ ໄດ້ຂາຍຢາງພາລາຢູ່ປະມານ 360 ລ້ານກີບ. ສຳລັບແຜນປີ 2026 ແມ່ນຈະຜະລິດຢາງຕາຂຽວໃຫ້ໄດ້ 300.000 ເບ້ຍ (ສ່ວນລາຄາແມ່ນຍັງບໍ່ອອກ).

KPL