ຂປລ. ໃນວັນທີ 19 ມິຖຸນາ 2025 ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ, ພົບປະໂອ້ລົມ ແລະ ມອບເຄື່ອງຊ່ວຍເຫລືອ ໃຫ້ປະຊາຊົນ ບ້ານສົບເຕີງເມືອງໄຊຈຳພອນ ແຂວງບໍລິຄຳໄຊ, ພ້ອມທັງຕິດຕາມຊຸກຍູ້ ການພັດທະນາໂຄງການໄຟຟ້າພະລັງງານລົມ ຢູ່ເຂດເມືອງດັ່ງກ່າວ ​ໂດຍມີ ທ່ານ ສອນທະນູ ທຳມະວົງ ເຈົ້າແຂວງບໍລິຄໍາໄຊ ພ້ອມດ້ວຍຄະນະນໍາຂອງແຂວງ, ເມືອງໄຊຈຳພອນ ແລະ ພາກສ່ວນກ່ຽວຂ້ອງ ໃຫ້ການຕ້ອນຮັບ ​ແລະ ​ໄດ້​ຮັບ​ຟັງລາຍງານສະພາບ ລວມຂອງບ້ານສົບເຕີງ ຈາກ ທ່ານ ແພງ ສອນວິຊາ ນາຍບ້ານໆສົບເຕີງ ວ່າ: ບ້ານດັ່ງກ່າວ ມີ 131 ຫລັງຄາເຮືອນ, 150 ກວ່າຄອບຄົວ, ພົນລະເມືອງ 907 ຄົນ, ຍິງ 449 ຄົນ, ມີຄອບຄົວພົ້ນທຸກກວມ 65%, ອາຊີບຕົ້ນຕໍ ຂອງປະຊາຊົນ ແມ່ນປູກເຂົ້າ ແລະ ລ້ຽງສັດ, ພາຍໃນບ້ານ ມີໂຮງໝໍນ້ອຍ 1 ແຫ່ງ, ມີແພດໝໍ 3 ທ່ານ, ມີໂຮງຮຽນປະຖົມສົມບູນ 1 ແຫ່ງ, ມີນັກຮຽນທັງໝົດ 100 ກວ່າຄົນ.

ຫລັງຈາກນັ້ນ, ທ່ານນາຍົກລັດຖະມົນຕີ ກໍໄດ້ໃຫ້ກຽດພົບປະໂອ້ລົມປະຊາຊົນ ທີ່ເຂົ້າຮ່ວມ ໂດຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ມູນເຊື້ອອັນດີງາມ ແລະ ຜົນສຳເລັດ ທີ່ປະຊາຊົນພາຍໃນບ້ານ ສາມາດປະຕິບັດໄດ້ ໃນໄລຍະຜ່ານມາ; ພ້ອມທັງເນັ້ນໃຫ້ອົງການປົກຄອງບ້ານ ແລະ ປະຊາຊົນ ຈົ່ງພ້ອມກັນຮັກສາມູນເຊື້ອອັນດີງາມຂອງຕົນ ໂດຍສະເພາະມູນເຊື້ອປະຕິວັດ, ມູນເຊື້ອຄວາມສາມັກຄີຊ່ວຍເຫລືອເຊິ່ງກັນ ແລະ ກັນ, ມູນເຊື້ອດຸໝັ່ນຂະຫຍັນພຽນ, ມູນເຊື້ອຖິ່ນຖານບ້ານເກີດ ຂອງອະດີດການນຂັ້ນສູງ; ເອົາໃຈໃສ່ເພີ່ມພູນຜະລິດຜົນ ໂດຍສະເພາະ ການປູກ-ການລ້ຽງ ຕາມທ່າແຮງຂອງບ້ານໃຫ້ຫລາຍ, ກຸ້ມກິນ ແລະ ກາຍເປັນສິນຄ້າ; ພ້ອມກັນປົກປັກຮັກສາ ແລະ ພັດທະນາບ້ານຊ່ອງຂອງຕົນ ໃຫ້ມີຄວາມສະຫງົບ, ໄດ້ຮັບການພັດທະນາດີຂຶ້ນເປັນກ້າວໆ; ເອົາໃຈໃສ່ຮັກສາສຸຂະອະນາໄມ, ປ້ອງກັນພະຍາດຕາມລະດູການ, ທຳມາຫາກິນ ຖືກຕ້ອງຕາມກົດໝາຍ ແລະ ລະບຽບການຂອງບ້ານເມືອງ; ພ້ອມກັນຊຸກຍູ້ສົ່ງເສີມລູກຫລານຂອງຕົນ ໃຫ້ໄດ້ເຂົ້າໂຮງຮຽນ ຕາມເກນອາຍຸ.

ໃນໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ມອບເຄື່ອງຊ່ວຍເຫລືອໃຫ້ແກ່ ປະຊາຊົນບ້ານດັ່ງກ່າວ ເຊິ່ງປະກອບມີ: ອາຫານການກິນ, ເຄື່ອງນຸ່ງຫົ່ມກັນໜາວ, ເຄື່ອງໃຊ້ຂອງສອຍໃນຊີວິດປະຈຳວັນ, ອຸປະກອນການຮຽນ ແລະ ອື່ນໆ.

ການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງໄຊຈຳພອນ ໃນຄັ້ງນີ້, ທ່ານ ນາຍົກລັດຖະມົນຕີ ແລະ ຄະນະ ຍັງໄດ້ໄປຕິດຕາມຊຸກຍູ້ ການພັດທະນາໂຄງການໄຟຟ້າພະລັງງານລົມ ຂອງບໍລິສັດ ຮຸ້ນສ່ວນລົງທຶນ ແລະ ພັດທະນາພະລັງງານ ຫວຽດ-ລາວ ຢູ່ເມືອງດັ່ງກ່າວ ຕືມອີກ ຊຶ່ງເຫັນວ່າ ໂຄງການໄຟຟ້າພະລັງງານລົມນີ້ ໄດ້ກວມເອົາສອງແຂວງ ຄື ແຂວງບໍລິຄຳໄຊ (ເມືອງໄຊຈຳພອນ, ເມືອງຄຳເກີດ ແລະ ເມືອງວຽງທອງ) ແລະ ແຂວງຄຳມ່ວນ (ເມືອງນາກາຍ).

ສະເພາະຢູ່ແຂວງບໍລິຄຳໄຊ ມີ 6 ສັນຍາໂຄງການ ຄື: ໂຄງການພະລັງງານລົມເຈືອງເຊີນ ຢູ່ເມືອງຄຳເກີດ ແລະ ເມືອງໄຊຈຳພອນ ມີກຳລັງຕິດຕັ້ງ 250 ເມກາວັດ, ອາຍຸສຳປະທານ 25 ປີ, ມູນຄ່າໂຄງການ 371 ລ້ານກວ່າໂດລາສະຫະລັດ; ໂຄງການພະລັງງານລົມເຈືອງເຊີນ 2 ຢູ່ເມືອງຄຳເກີດ ແລະ ເມືອງໄຊຈຳພອນ ມີກຳລັງຕິດຕັ້ງ 350 ເມກາວັດ, ອາຍຸສຳປະທານ 25 ປີ, ມູນຄ່າໂຄງການ 556 ລ້ານໂດລາສະຫະລັດ; ໂຄງການພະລັງງານລົມພິລາ ຢູ່ເມືອງຄໍາເກີດ ແລະ ເມືອງໄຊຈໍາພອນ ມີກຳລັງຕິດຕັ້ງ 500 ເມກາວັດ, ອາຍຸສຳປະທານ 25 ປີ, ມູນຄ່າໂຄງການ 1.151 ລ້ານໂດລາສະຫະລັດ; ໂຄງການພະລັງງານລົມກາລອງ ຢູ່ເມືອງຄຳເກີດ ແລະ ເມືອງໄຊຈຳພອນ ມີກຳລັງຕິດຕັ້ງ 750 ເມກາວັດ, ອາຍຸສຳປະທານ 25 ປີ, ມູນຄ່າໂຄງການ 822 ລ້ານໂດລາສະຫະລັດ; ໂຄງການພະລັງງານລົມຜາຂາວ ຢູ່ເມືອງວຽງທອງ ມີກຳລັງຕິດຕັ້ງ 750 ເມກາວັດ (ກໍາລັງດໍາເນີນຂັ້ນຕອນສັນຍາພັດທະນາໂຄງການ); ໂຄງການພະລັງງານລົມນໍ້າຕົງ ຢູ່ເມືອງວຽງທອງ ແລະ ເມືອງໄຊຈຳພອນ ມີກຳລັງຕິດຕັ້ງ 750 ເມກາວັດ (ກຳລັງດຳເນີນຂັ້ນຕອນ ສັນຍາພັດທະນາໂຄງການ). ສ່ວນຢູ່ເມືອງນາກາຍ, ແຂວງຄຳມ່ວນ ມີ 2​ ສັນຍາໂຄງການ ຄື: ໂຄງການພະລັງງານລົມຈາລໍ ແລະ ໂຄງການພະລັງງານລົມ The Light ຊຶ່ງສອງໂຄງການດັ່ງກ່າວ ມີກຳລັງຕິດຕັ້ງ ໂຄງການລະ 500 ເມກາວັດ ແລະ ກຳລັງດຳເນີນຂັ້ນຕອນສັນຍາພັດທະນາໂຄງການ.

ໃນໂອກາດເຄື່ອນໄຫວຕິດຕາມ ແລະ ຊຸກຍູ້ການພັດທະນາ ໂຄງການໄຟຟ້າພະລັງງານລົມ ຢູ່ເມືອງໄຊຈຳພອນ ຄັ້ງນີ້, ທ່ານນາຍົກລັດຖະມົນຕີ ຍັງໄດ້ໃຫ້ກຽດເຂົ້າຮ່ວມພິທີເປີດ “ກອງທຶນ ລົບລ້າງເຮືອນ ເຄິ່ງຖາວອນ ສຳລັບຄອບຄົວທຸກຍາກ ຢູ່ແຂວງບໍລິຄຳໄຊ”; ພ້ອມທັງ ຕິດຕາມເບິ່ງຄວາມຄືບໜ້າ ໃນການກໍ່ສ້າງສະຖານີໄຟຟ້າ 220 ກິໂລໂວນ ຂອງໂຄງການພະລັງງານລົມເຈືອງເຊີນ ແລະ ໄປຕິດຕາມເບິ່ງຄວາມຄືບໜ້າ ໃນການພັດທະນາໂຄງລ່າງພື້ນຖານ ດ່ານປະເພນີນໍ້າອອນ (ດ່ານຊາຍແດນ ລາວ-ຫວຽດນາມ) ຕື່ມອີກ.

ຂ່າວ- ພາບ: ກົມປະຊາສຳພັນ ຫສນຍ.

KPL