ຂປລ. ກອງປະຊຸມແຕ່ງຕັ້ງກອງເລຂາ ຄະນະກໍາມະການອະໄພຍະໂທດ ລະດັບຊາດ ແລະ ການແບ່ງຄວາມຮັບຜິດຊອບການກວດກາ ແລະ ຄົ້ນຄວ້າການສະເໜີ ຂໍອະໄພຍະໂທດ ປະຈຳປີ 2025 ຈັດຂຶ້ນໃນວັນທີ 20 ພຶດສະພາ 2025 ພາຍໃຕ້ການເປັນປະທານຂອງ ທ່ານ ບົວລີ ເພັດມີໄຊ ຄະນະບໍລິຫານງານພັກ, ຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ, ອົງການໄອຍະການປະຊາຊົນສູງສຸດ,​ ຮອງຫົວໜ້າກອງເລຂາຄະນະກຳມະການອະໄພຍະໂທດ ລະດັບຊາດ, ມີຜູ້ຕາງໜ້າອົງການໄອຍະການ ປະຊາຊົນສູງສຸດ ​ແລະ ພາກສ່ວນກ່ຽວຂ້ອງ ເຂົ້າຮ່ວມ.

ໃນໂອກາດນີ້, ທ່ານ ເພັດນໍ້າຄໍາ ສິງຫາພົນ ໄດ້ລາຍງານການສົ່ງເອກະສານ ສະເໜີຂໍໃຫ້ອະໄພຍະໂທດ ປະຈໍາປິ 2025 ຂອງກະຊວງ, ແຂວງ, ນະຄອນຫລວງ ເພື່ອຄົ້ນຄວ້າພິຈາລະນາຄັດເລືອກ ເອົານັກໂທດຜູ້ທີ່ມີເງື່ອນໄຂ ສະເໜີໃຫ້ອະໄພຍະໂທດ ເພື່ອນຳສະເໜີຕໍ່ຄະນະກຳມະການ ອະໄພຍະໂທດລະດັບຊາດ ພິຈາລະນາຕາມຂັ້ນຕອນທີ່ໄດ້ກໍານົດໄວ້ໃນ ລັດຖະບັນຍັດວ່າດ້ວຍ ການໃຫ້ອະໄພຍະໂທດ ສະບັບເລກທີ 001/ປປທ, ລົງວັນທີ 20 ມີນາ2018 ແລະ ກອງປະຊຸມຍັງໄດ້ຜ່ານສອງຂໍ້ຕົກລົງ ຄື: ຂໍ້ຕົກລົງແບ່ງຄວາມຮັບຜິດຊອບຂອງ ກອງເລຂາຄະນະກໍາມະການອະໄພຍະໂທດ ລະດັບຊາດ ສະ ບັບເລກທີ 11/ຄອຊ, ລົງວັນທີ 20 ມີນາ 2025 ແລະ ຕົກລົງແບ່ງຄວາມຮັບຜິດຊອບຄົ້ນຄວ້າຂອງ ກອງເລຂາຄະນະກໍາມະການອະໄພຍະໂທດລະດັບຊາດ ສະບັບເລກທີ 31/ກລຂ, ລົງວັນທີ 5 ພຶດສະ ພາ 2025.

​ໂອກາດນີ້, ທ່ານ ບົວລີ ເພັດມີໄຊ ຍັງໄດ້ຮຽກຮ້ອງໃຫ້ ກອງເລຂາຄະນະກໍາມະການ ອະໄພຍະໂທດລະດັບຊາດ ສືບຕໍ່ເຊີດຊູ ແລະ ຍົກສູງຄວາມຮັບຜິດຊອບຂອງຕົນ ເພື່ອກວດກາການສະເໜີຂໍອະ ໄພຍະໂທດ ປະຈໍາປີ 2025, ຮັບປະກັນຄວາມຍຸຕິທໍາ, ຖືກຕ້ອງ ແລະ ທັນກໍານົດເວລາ. ນອກຈາກນີ້, ຍັງຮຽກຮ້ອງໃຫ້ກອງເລຂາ ຄະນະກໍາມະການອະໄພຍະໂທດລະດັບຊາດ ເປັນເຈົ້າການໂຄສະນາສຶກສາອົບຮົມ ໃນທົ່ວສັງຄົມ ໃຫ້ເຫັນໄດ້ແນວທາງ ມະນຸດສະທໍາຂອງພັກ-ລັດຖະບານ ສປປ ລາວ ແນໃສ່ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ເພື່ອປະກອບສ່ວນເຂົ້າໃນ ການປົກປັກຮັກສາ ແລະ ພັດທະນາປະເທດຊາດ.

ຂ່າວ: ແສງພະຈັນ

KPL