ຂປລ. ພິທີນຳສະເໜີໂຄງການສ້າງຄວາມເຂັ້ມແຂງ ຂະບວນການແກ້ໄຂຂໍ້ຂັດແຍ່ງ ການຄ້າທາງເອເລັກໂຕຣນິກ ຢູ່ ສປປ ລາວ ໄດ້ຈັດຂຶ້ນໃນວັນທີ 13 ພຶດສະພາ 2025 ໂດຍມີ ທ່ານ ສັນຕິສຸກ ພູນສະຫວັດ ຫົວໜ້າກົມການຄ້າພາຍໃນ ກະຊວງອຸດສາຫະກໍາ ແລະ ການຄ້າ, ມີຄະນະຮັບຜິດຊອບວຽກເສດຖະກິດ, ການຄ້າ ແລະ ໂຄງລ່າງພື້ນຖານສະຖານທູດອົດສະຕຣາລີ ປະຈໍາລາວ, ມີພາກສ່ວນກ່ຽວຂ້ອງເຂົ້າຮ່ວມ.

ທ່ານ ສັນຕິສຸກ ພູນສະຫວັດ  ໄດ້ໃຫ້ຮູ້ວ່າ: ໂຄງການສ້າງຄວາມເຂັ້ມແຂງ ຂະບວນການແກ້ໄຂຂໍ້ຂັດແຍ່ງ ການຄ້າທາງເອເລັກໂຕຣນິກ ຢູ່ ສປປ ລາວ ເລີ່ມຈັດຕັ້ງປະຕິບັດ ມາແຕ່ວັນທີ 21 ເມສາ ຫາ ວັນທີ 30 ສິງຫາ 2025 ໂດຍໄດ້ຮັບທຶນສະໜັບສະໜູນ ຈາກກອງທຶນການຄ້າ ພາກພື້ນເພື່ອການພັດທະ ນາ ຈຳນວນ 172.000 ໂດລາອົດສະຕຣາລີ, ພາຍໃຕ້ຂອບການຮ່ວມມືຂອບການຄ້າເສລີ ອາຊຽນ-ອົດສະຕຣາລີ-ນິວຊີແລນ ເຊິ່ງກົມການຄ້າພາຍໃນ ໄດ້ເປັນເຈົ້າການຫລັກ ໃນການຈັດຕັ້ງປະຕິບັດ, ພ້ອມດ້ວຍກົມແຂ່ງຂັນທາງທຸລະກິດ ແລະ ກວດກາການຄ້າ, ສຳນັກງານສົ່ງເສີມຈຸນລະວິສາຫະກິດ, ວິສາ ຫະກິດຂະໜາດນ້ອຍ ແລະ ກາງ (ສຈນກ) ທີ່ມີສ່ວນຮ່ວມ ແລະ ພາກສ່ວນຕ່າງໆກ່ຽວຂ້ອງ ໃນການຈັດຕັ້ງປະຕິບັດໂຄງການດັ່ງກ່າວ.

ປັດຈຸບັນ, ການຄ້າທາງເອເລັກໂຕຣນິກ ເຫັນວ່າມີການຂະຫຍາຍຕົວສູງ ແລະ ຕໍ່ເນື່ອງ ເຊັ່ນ: ມູນຄ່າການຄ້າທາງເອເລັກໂຕຣນິກຂອງໂລກ ປີ 2020 ມີມູນຄ່າເຖິງ 4,25 ພັນຕື້ໂດລາສະຫະລັດ, ທຽບໃສ່ປີຜ່ານມາ ເພີ່ມຂຶ້ນ 26,8% ມາຮອດປີ 2024 ເພີ່ມຂຶ້ນເປັນ 6,33 ພັນຕື້ໂດລາສະຫະລັດ ທຽບໃສ່ປີຜ່ານມາເພີ່ມຂຶ້ນ 8,8% ແລະ ທຽບໃສ່ປີ 2020 ເພີ່ມຂຶ້ນ 49%. ສຳລັບ ມູນຄ່າການຄ້າທາງເອເລັກໂຕຣນິກຂອງອາຊຽນ ປີ 2020 ມີມູນຄ່າ 120 ຕື້ໂດລາສະຫະລັດ ທຽບໃສ່ປີຜ່ານມາ ເພີ່ມຂຶ້ນ 14,2% ມາຮອດປີ 2024 ເພີ່ມຂຶ້ນເປັນ 221,6 ຕື້ໂດລາສະຫະລັດ ທຽບໃສ່ປີຜ່ານມາເພີ່ມຂຶ້ນ 14,2% ແລະ ທຽບໃສ່ປີ 2020 ເພີ່ມຂຶ້ນ 84,6% ແລະ ທັງເປັນປັດໄຈຫລັກ ໃນການຂັບເຄື່ອນເສດ ຖະກິດໃຫ້ມີການຂະຫຍາຍຕົວໄວ, ຕໍ່ເນື່ອງ ແລະ ຄຽງຄູ່ກັນກໍເປັນການຊຸກຍູ້-ສົ່ງເສີມ ແລະ ແກ້ໄຂຄວາມທຸກຍາກ ຂອງບັນດາປະເທດໃນທົ່ວໂລກ ໂດຍສະເພາະ ສປປ ລາວ ກໍໄດ້ຖືເອົາວຽກງານການຄ້າທາງເອເລັກໂຕຣນິກ ເປັນໜຶ່ງທີ່ໄດ້ກໍານົດແຜນນະໂຍບາຍ, ຍຸດທະສາດ, ແຜນພັດທະນາເສດຖະກິດ-ສັງຄົມ ແລະ ແຜນພັດທະນາຂອງຂະແໜງການ ໂດຍສະເພາະ ໄດ້ກໍານົດໃນແຜນງານທີ 2 ແລະ 3 ຂອງແຜນພັດທະນາຂະແໜງ ອຸດສາຫະກໍາ-ການຄ້າ ແລະ ສອດຄ່ອງກັບການ ຫັນເປັນເສດຖະກິດດີຈິຕອນຂອງລັດຖະບານ.

ຂໍ້ມູນ-ພາບ: ໄພວັນ

KPL