ຂປລ. ກອງບັນຊາການທະຫານອາກາດ ເປີດຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2025 ຂຶ້ນວັນທີ 7 ພຶດສະພາ 2025 ໂດຍການເປັນປະທານຂອງ ສະຫາຍ ພົນຈັດຕະວາ ທະນູກອນ ສຸລິຍະແສງ ຫົວໜ້າການເມືອງ ກອງບັນຊາການທະຫານອາກາດ, ມີຄະນະພັກ-ຄະນະບັນ ຊາ, ຄະນະຫ້ອງ, ກອງພັນ, ກອງຮ້ອຍ ແລະ ບັນດາຫົວໜ້າພະແນກການ ພ້ອມດ້ວຍພະນັກງານ-ນັກ ຮົບ ເຂົ້າຮ່ວມ.

ໂອກາດນີ້, ສະຫາຍ ພັນໂທ ທອງສະຫວັດ ສີສົງຄາມ ຮອງຫົວໜ້າຫ້ອງການເມືອງ ກອງບັນຊາການທະຫານອາກາດ ໄດ້ຜ່ານບົດສະຫລຸບ ຂະບວນການແຂ່ງຂັນ ປະຈໍາປີ 2024 ໂດຍຍົກໃຫ້ເຫັນເນື້ອໃນຂະບວນການແຂ່ງຂັນຮັກຊາດ ແລະ ພັດທະນາໃນໄລຍະຜ່ານມາ ມີຜົນສໍາເລັດຫລາຍດ້ານ ທີ່ປັບປຸງກໍ່ສ້າງກົມກອງ ໃຫ້ເຕີບໃຫຍ່ເຂັ້ມແຂງທາງດ້ານເມືອງ, ການທະຫານ, ດ້ານວຽກງານວິຊາສະເພາະ ແລະ ສ້າງກົມກອງ ມີແບບແຜນທັນສະໄໝ ໂດຍສະເພາະຄະນະພັກ-ຄະນະບັນຊາ ແຕ່ລະຂັ້ນ ໄດ້ສຸມໃສ່ຍົກສູງໜ້າທີການເມືອງ, ການຈັດຕັ້ງ, ດ້ານລະບຽບແບບແຜນທີ່ຖືກຕ້ອງຂອງພັກ-ລັດ, ພ້ອມທັງເຮັດໜ້າທີ່ ສຶກສາອົບຮົມການເມືອງ-ນໍາແນວຄິດ ໃຫ້ພະນັກງານ-ນັກຮົບ ພາຍໃນກົມກອງເຊື່ອມຊືມ ກໍາແໜ້ນແນວທາງນະໂຍບາຍຂອງພັກ, ກົດໝາຍຂອງລັດ, ບັນດາມະຕິ, ຄໍາສັ່ງ ແລະ ລະບຽບການຂອງກອງທັບໄດ້ຢ່າງເຂັ້ມງວດ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານຂອງຂັ້ນເທິງ ສາມາດບັນລຸຜົນສໍາເລັດຕາມເນື້ອໃນ ແຂ່ງຂັນຂອງກົມກອງວາງອອກໄດ້ຢ່າງຈົບງາມ, ພ້ອມນັ້ນ ໄດ້ສຸ່ມຈັດຕັ້ງປະຕິ ບັດ ການແກ້ໄຂປະກົດການຫຍໍ້ທໍ້ ທີ່ເກີດຂຶ້ນພາຍໃນກົມກອງ ແລະ ເປັນເຈົ້າການເກັບກໍາສະພາບການ ໃນເຂດຕັ້ງທັບຂອງກົມກອງ ໃຫ້ມີຄວາມສະຫງົບໂດຍພື້ນຖານ. 

ຈາກນັ້ນ, ສະຫາຍ ພັນໂທ ວັນນະກອນ ກໍຜາສຸກ ຫົວໜ້າພະແນກນະໂຍບາຍ ຫ້ອງການເມືອງ ກອງບັນຊາການທະຫານອາກາດ ໄດ້ຜ່ານຂໍ້ຕົກລົງວ່າດ້ວຍ ການມອບຫລຽນກຽດຕິຄຸນ ກອງທັບປະຊາ ຊົນລາວ ໃຫ້ນາຍທະຫານກອງບັນຊາການທະຫານອາກາດ ຈໍານວນ 19 ສະຫາຍ, ມອບໃບຍ້ອງຍໍ ກົມກອງລວມໝູ່ຈໍານວນ 9 ກົມກອງ, ບຸກຄົນ 315 ສະຫາຍ ແລະ ມອບໃບຊົມເຊີຍໃຫ້ບຸກຄົນ 107 ສະຫາຍ ຕື່ມອີກ.

ໂອກາດດັ່ງກ່າວ, ຕາງໜ້າບັນດາຫ້ອງ, ກອງພັນ, ກອງຮ້ອຍ ແລະ ອົງການຈັດຕັ້ງມາຫາຊົນ ໄດ້ລົງນາມ ເຊັນບົດບັນທຶກຮັບເອົາ ເນື້ອໃນຂໍ້ແຂ່ງຂັນ 7 ຂໍ້ ເພື່ອພ້ອມກັນນໍາ ໄປຈັດຕັ້ງປະຕິບັດຜັນຂະຫຍາຍຢູ່ບັນດາ ກອງຕົນໃຫ້ມີສໍາເລັດ.

ຂໍ້​ມູນ-ພາບ: ກອງບັນຊາການທະຫານອາກາດ

KPL