ຂປລ. ກອງປະຊຸມໃຫຍ່ ຄັ້ງທີ VI ຂອງໜ່ວຍພັກຫ້ອງການກະຊວງແຮງງານ ແລະ ສະຫວັດດີການສັງຄົມ (ຮສສ) ໄຂຂຶ້ນໃນວັນທີ 5 ພຶດສະພາ 2025 ໂດຍການເປັນປະທານຂອງ ສະຫາຍ ບຸນຍອດ ຈັນທະວອນ ເລຂາໜ່ວຍພັກຫ້ອງການກະຊວງ, ມີສະຫາຍ ນາງ ໃບຄຳ ຂັດທິຍະ ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຮສສ, ມີບັນດາເລຂາໜ່ວຍພັກອອ້ມຂ້າງກະຊວງ ແລະ ສະມາຊິກພັກ ຂອງໜ່ວຍພັກຫ້ອງການກະຊວງ ເຂົ້າຮ່ວມ.

ກອງປະຊຸມໃນຄັ້ງນີ້, ໄດ້ຮັບຟັງ ແລະ ເປັນເອກະພາບຮັບຮອງເອົາບົດລາຍງານການເມືອງ ການ ນໍາພາ-ຊີ້ນໍາ ວຽກງານຂອງໜ່ວຍພັກ ໃນໄລຍະຜ່ານມາ(2021-2025) ແລະ ທິດທາງແຜນການ, ມາດຕະການຈັດຕັ້ງປະຕິບັດໃນໄລຍະ 5 ປີຕໍ່ໜ້າ (2026-2030), ພ້ອມທັງ ເປັນເອກະພາບຮັບຮອງເອົາ ຮ່າງບົດສໍາຫລວດການນໍາພາ-ຊີ້ນໍາ ວຽກຮອບດ້ານຂອງໜ່ວຍພັກຫ້ອງການ ໃນໄລຍະ 5 ປີຜ່ານມາ ທີ່ສະເໜີໂດຍສະຫາຍເລຂາໜ່ວຍພັກ. ພ້ອມນີ້, ກອງປະຊຸມຄົບຄະນະຄັ້ງປະຖົມມະລຶກ ຂອງ ໜ່ວຍພັກຫ້ອງການກະຊວງ ໄດ້ເປັນເອກະພາບເລືອກຕັ້ງເອົາ ເລຂາ, ຮອງເລຂາ ແລະ ກໍາມະການໜ່ວຍພັກຊຸດ ໃໝ່ ໂດຍເຫັນດີເປັນເອກະພາບເລືອກເອົາ ສະຫາຍ ບຸນຍອດ ຈັນທະວອນ ເປັນເລຂາໜ່ວຍພັກ, ສະຫາຍ ນາງ ມອນທອງ ອິນທະວົງ ເປັນຮອງເລຂາໜ່ວຍພັກ,​ ທັງເປັນປະທານກວດກາ ແລະ ເລືອກເອົາ ສະຫາຍ ດວງສີ ທຳມະວົງ ເປັນກໍາມະການພັກ. ພ້ອມກັນນັ້ນ, ກອງປະຊຸມຍັງໄດ້ປ່ອນບັດຄັດເລືອກເອົາ ຜູ້ແທນສົມບູນ ເພື່ອເຂົ້າຮ່ວມກອງປະຊຸມໃຫຍ່ຂອງ ອົງຄະນະພັກກະຊວງແຮງງານ ແລະ ສະຫວັດດີການສັງຄົມ ຄັ້ງທີ VII ທີ່​ຈະ​ຈັດ​ຂຶ້ນໃນຕໍ່ໜ້າ ຕາມລະບຽບຂອງພັກ ມີທັງໝົດ 15  ສະຫາຍ ແລະ ຜູ້ແທນສໍາຮອງ 2 ສະຫາຍ, ຍິງ 1 ສະຫາຍ.

ໂອກາດດັ່ງກ່າວ, ສະຫາຍ ນາງ ໃບຄຳ ຂັດທິຍະ ໄດ້ສະແດງຄວາມຍ້ອງຍໍຊົມເຊີຍຕໍ່ການນໍາພາ-ຊີ້ນໍາ ຂອງຄະນະໜ່ວຍພັກຊຸດເກົ່າ ຕະຫລອດໄລຍະ 5 ປີຜ່ານມາ ທີ່ໄດ້ນໍາພາປະຕິບັດໜ້າທີ່ການ ເມືອງຂອງຕົນທີ່ຍາດໄດ້ຜົນສໍາເລັດ, ຖືໄດ້ວ່າເປັນຜົນງານລວມຂອງໜ່ວຍພັກ. ໜ່ວຍພັກຫ້ອງການກະຊວງ ຖືວ່າສຳຄັນສຸດ ແລະ ເປັນໝາກຫົວໃຈ ຂອງກະຊວງ ກໍຄື ໃນຂະແໜງ ຮສສ. ພ້ອມກັນນັ້ນ, ສະຫາຍ ຍັງໄດ້ເນັ້ນໃຫ້ຄະນະໜ່ວຍພັກຊຸດໃໝ່ ກໍຄື ສະມາຊິກພັກ ຕ້ອງໄດ້ສືບຕໍ່ນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VI ຂອງຕົນໃຫ້ມີຜົນງານໃຫຍ່ຫລວງກວ່າເກົ່າ ໂດຍໃຫ້ເອົາໃຈໃສ່ ເປັນເສນາທິການໃຫ້ຄະນະພັກ, ຄະນະນໍາກະຊວງ ຄົ້ນຄວ້າມາດຕະການຕ່າງໆຂອງພັກ-ລັດ ຫັນເປັນທັນສະໄໝ ເປັນລະບົບຄົບຊຸດ, ເພື່ອປັບປຸງວຽກງານຫ້ອງການກະຊວງ ໃຫ້ມີຄວາມຄ່ອງຕົວ ແລະ ເຂັ້ມແຂງຂຶ້ນກວ່າເກົ່າ, ກຳນົດແຜນການ, ແຜນງານ ເປັນອັນລະອຽດ ລົງເລິກບັນດານິຕິກຳລວມ, ຄົ້ນ ຄວ້າລົງເລິກບັນຫາເປັນອັນລະອຽດ ແລະ ການປະຕິບັດນະໂຍບາຍ ທາງດ້ານສະຫວັດດີການສັງຄົມ ຕ່າງໆ ຂອງພະນັກງານ-ລັດຖະກອນ ໃຫ້ຖືເປັນສຳຄັນ ແລະ ອື່ນໆ.

ພ້ອມນີ້, ກອງປະຊຸມ ຍັງໄດ້ຮຽກຮ້ອງມາຍັງ ສະມາຊິກພັກ, ພະນັກງານ-ລັດຖະກອນ ພາຍໃນໜ່ວຍພັກຫ້ອງການກະຊວງ ຈົ່ງພ້ອມກັນເຊີດຊູສະຕິປັນຍາ ແລະ ຄວາມຮັບຜິດຊອບໜ້າທີ່ ການເມືອງຂອງຕົນໃຫ້ສູງຂຶ້ນເລື້ອຍໆ ເພື່ອປັບປຸງວຽກງານຕາມ ທີ່ໄດ້ຮັບມອບໝາຍໃຫ້ມີ ການຫັນປ່ຽນໃໝ່ຢ່າງຕັ້ງໜ້າ ເຮັດໃຫ້ໜ່ວຍພັກມີຄວາມປອດໃສ, ເຂັ້ມແຂງ ແລະ ໝັກແໜ້ນ, ບໍລິການດ້ວຍຄວາມປະທັບໃຈໃຫ້ກັບສັງຄົມ.

ຂໍ້ມູນ-ພາບ: ຂ່າວສານ ຮສສ

KPL