ຂປລ
ຂປລ. ພິທີເຊັນບົດບັນທຶກຄວາມເຂົ້າໃຈ ກ່ຽວກັບການລິເລີ່ມ ລະບົບສາທາລະນະສຸກ ທີ່ມີຄວາມທົນທານຕໍ່ການປ່ຽນແປງສະພາບດິນຟ້າອາກາດ ໄດ້ຈັດຂຶ້ນເມື່ອບໍ່ດົນມາ ໂດຍການຮ່ວມລົງນາມ ລະຫວ່າງ ທ່ານ ນາງ ພອນປະເສີດ ໄຊຍະມຸງຄຸນ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສູກ ແລະ ທ່ານ ລູກ ເອັບສ໌ ຫົວໜ້າອົງການຊ່ວຍເຫລືອເດັກສາກົນປະຈໍາ ສປປ ລາວ
ຂປລ. ພິທີເຊັນບົດບັນທຶກຄວາມເຂົ້າໃຈ ກ່ຽວກັບການລິເລີ່ມ ລະບົບສາທາລະນະສຸກ ທີ່ມີຄວາມທົນທານຕໍ່ການປ່ຽນແປງສະພາບດິນຟ້າອາກາດ ໄດ້ຈັດຂຶ້ນເມື່ອບໍ່ດົນມາ ໂດຍການຮ່ວມລົງນາມ ລະຫວ່າງ ທ່ານ ນາງ ພອນປະເສີດ ໄຊຍະມຸງຄຸນ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສູກ ແລະ ທ່ານ ລູກ ເອັບສ໌ ຫົວໜ້າອົງການຊ່ວຍເຫລືອເດັກສາກົນປະຈໍາ ສປປ ລາວ ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາມາລະນະສຸກ, ທ່ານ ທິມໂມຕີ ອາມສະຕຣອງ ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ພ້ອມດ້ວຍພາກສ່ວນ ກ່ຽວຂ້ອງ ຂອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ການສ້າງຄວາມເຂັ້ມແຂງໃຫ້ລະບົບສາທາລະນະສຸກ ໃນ ສປປ ລາວ ເພື່ອສາມາດທົນທານກັບສະພາບການປ່ຽນແປງດິນຟ້າອາກາດ ເປັນໂຄງການຄັ້ງທຳອິດຂອງ ສປປ ລາວ ໂດຍໄດ້ຮັບທຶນສະໜັບສະໜູນຈາກ ກອງທຶນສີຂຽວທາງດ້ານ ການປ່ຽນແປງດິນຟ້າອາກາດ (GCF) ຜ່ານອົງການຊ່ວຍເຫລືອເດັກ ອົດສະຕຣາລີ ດ້ວຍການປະກອບທຶນຊ່ວຍເຫລືອ ຈາກອົງການຊ່ວຍເຫລືອເດັກ ສະຫະລັດອາເມລິກາ, ອົງການອະນາໄມໂລກ ແລະ ລັດຖະ ບານແຫ່ງ ສປປ ລາວ (ໃນຮູບແບບການສົມທົບທີ່ບໍ່ແມ່ນເງິນ) ໂດຍມີຈຸດປະສົງເພື່ອເສີມສ້າງຄວາມເຂັ້ມແຂງ ດ້ານການປັບຕົວຕໍ່ ການປ່ຽນແປງດິນຟ້າອາກາດ ແລະ ມີຄວາມຍືນຍົງຂອງລະບົບສາທາລະນະສຸກ ໃນ 7 ແຂວງເປົ້າໝາຍຂອງໂຄງການ ເນື່ອງຈາກເດັກນ້ອຍເປັນກຸ່ມ ທີ່ມີຄວາມສ່ຽງສູງທີ່ສຸດ ຕໍ່ໄພອັນຕະລາຍດ້ານສຸຂະພາບ ທີ່ກ່ຽວຂ້ອງກັບການປ່ຽນແປງດິນຟ້າອາກາດ ລວມທັງໄຂ້ ເລືອດອອກ, ພະຍາດຖອກທ້ອງ ແລະ ພາວະຂາດສານອາຫານອັນເນື່ອງ ມາຈາກການປ່ຽນແປງສະພາບອາກາດຮຸນແຮງ ທີ່ສົ່ງຜົນກະທົບຕໍ່ພືດຜົນ, ທີ່ຢູ່ອາໄສ, ລະບົບນໍ້າ ແລະ ສຸຂາພິ ບານ ເຊິ່ງໂຄງການນີ້ ໄດ້ກຳນົດກິດຈະກໍາເປົ້າໝາຍ ເພື່ອປົກປ້ອງສະຫວັດດີພາບ ແລະ ອື່ນໆ.
ໃນໄລຍະ 5 ປີຂ້າງໜ້າ, ໂຄງການຈະໃຫ້ການສະໜັບສະໜູນ ສະຖານທີ່ບໍລິການສາທາລະນະສຸກ ຈໍານວນ 100 ແຫ່ງ ແລະ ຊຸມຊົນຈໍານວນ 250 ແຫ່ງ ໃນ 25 ເມືອງ ຂອງ 7 ແຂວງ ໂດຍຈະເສີມສ້າງຄວາມສາມາດຂອງພະນັກງານສາທາລະນະສຸກ ໃນການແກ້ໄຂຄວາມສ່ຽງ ດ້ານສຸຂະພາບ ທີ່ກ່ຽວຂ້ອງກັບ ການປ່ຽນແປງດິນຟ້າອາກາດ, ປັບປຸງພື້ນຖານໂຄງລ່າງ ດ້ານສາທາລະນະສຸກ ໃຫ້ມີຄວາມທົນທານຕໍ່ ການປ່ຽນແປງດິນຟ້າອາກາດ ແລະ ປະຢັດພະ ລັງງານ ໃນສະຖານທີ່ບໍລິການສາທາລະນະສຸກ ຈໍານວນ 79 ແຫ່ງ; ເພີ່ມຄວາມຮັບຮູ້ຂອງຊຸມຊົນກ່ຽວກັບຜົນກະ ທົບຂອງການປ່ຽນແປງ ດິນຟ້າອາກາດຕໍ່ສຸຂະພາບ. ພ້ອມກັນນັ້ນ, ໂຄງການຈະສ້າງຄວາມເຂັ້ມແຂງ ໃຫ້ແກ່ຊຸມຊົນໃນການກໍານົດບຸລິມະສິດ ດ້ານສຸຂະພາບ ທີ່ກ່ຽວພັນກັບການປ່ຽນແປງດິນຟ້າອາກາດ, ຂະຫຍາຍລະບົບເຕືອນໄພລ່ວງໜ້າ ແລະ ປັບປຸງການເຂົ້າເຖິງ ການບໍລິການດ້ານສຸຂະພາບ ໃຫ້ແກ່ປະຊາຊົນ ຫລາຍກວ່າ 2,3 ລ້ານຄົນ ໃນເຂດຊົນນະບົດທີ່ມີຄວາມສ່ຽງສູງ ຕໍ່ການປ່ຽນແປງດິນຟ້າອາກາດ.
ຂ່າວ: ທະນູທອງ
KPL
