*ຜັກກະລໍ່າ ແມ່ນຜັກທີ່ຄົນນິຍົມບໍລິໂພກ ເນື່ອງຈາກສາມາດນໍາມາປຸງແຕ່ງອາຫານໄດ້ຫລາຍເຍື່ອງ ບໍ່ວ່າຈະນໍາມາເຮັດເຍື່ອເຂົ້າປຸ້ນ, ເຮັດສົ້ມຜັກ, ຂ້ົວ ຫລື ລວກກັບແຈ່ວ ແລະ ອ່ືນໆ ແລ້ວແຕ່ຈະນຳມາປະຍຸກໃນອາຫານ, ຍັງບໍ່ພໍເທົ່ານີ້ເພາະວ່າຜັກກະລໍ່າຍັງເປັນຜັກທີ່ອຸດົມໄປດ້ວຍວິຕາມິນເຊ, ໃຍອາຫານ ແລະ ສານອາຫານອື່ນໆ, ໃຫ້ພະລັງງານຕໍ່າເໝາະສຳລັບຜູ້ທີ່ກຳລັງຫລຸດນ້ຳໜັກ ແລະ ມີຄຸນປະໂຫຍດທີ່ດີຕໍ່ຮ່າງກາຍດັ່ງຕໍ່ໄປນີ້: 

    ປ້ອງກັນການປ່ຽນນ້ຳຕານເປັນໄຂມັນ : ຜັກກະລໍໍ່າມີອາຊິດທີ່ເອີ້ນວ່າອາຊິດ tartaric ເຊິ່ງມີປະໂຫຍດຊ່ວຍໃຫ້ນໍ້າຕານທີ່ຮ່າງກາຍໄດ້ຮັບແລ້ວ ບ່ໍປ່ຽນເປັນໄຂມັນໃນຊ້ັນຜິວໜັງ,ຫລຸດລະດັບໄຂມັນ ເພື່ອບ່ໍໃຫ້ມັນສູງຈົນເປັນອັນຕະລາຍຕໍ່ຮ່າງກາຍ, ບຳລຸງກະດູກ ແລະ ແຂ້ວ, ຍັງຊ່ວຍສ້າງຈຸລັງກະດູກ ໃໝ່ ,  ຫລຸດຜ່ອນຄວາມສ່ຽງຕໍ່ການເປັນພະຍາດກະດູກຜ່ອຍ.

    ຊ່ວຍຍ່ອຍອາຫານ:  ເນື້ອຂອງເສັ້ນໃຍໃນຜັກກະລໍ່າແມ່ນສູງ. ດັ່ງນັ້ນ, ມັນມີປະໂຫຍດຕ່ໍຂະບວນການເຮັດວຽກຂອງລະບົບຍ່ອຍອາຫານ, ຊ່ວຍຍ່ອຍອາຫານ ແລະ ຂັບລ້າງສານພິດໃນຮ່າງກາຍ ໂດຍບໍ່ກໍ່ໃຫ້ເກີດອັນຕະລາຍຕໍ່ຮ່າງກາຍ ຈໍານວນເສັ້ນໃຍທີ່ໄດ້ຮັບຈະຊ່ວຍກະຕຸ້ນໃຫ້ລໍາໄສ້ໃຫຍ່ຂັບໄລ່ສິ່ງເສດເຫລືອອອກຢ່າງເຕັມທີ່, ຫລຸດຜ່ອນຄວາມສ່ຽງຕໍ່ການເປັນມະເຮັງ, ຊ່ວຍໃຫ້ລໍາໄສ້ເຮັດວຽກໄດ້ດີ, ຫລຸດຜ່ອນຄວາມສ່ຽງມະເຮັງລໍາໄສ້, ປ້ອງກັນມະເຮັງໃນອະໄວຍະວະອື່ນໆ; ກະຕຸ້ນການຜະລິດໂປຣຕີນ: ຜັກກະລໍ່າຈະກະຕຸ້ນການຜະລິດທາດໂປຣຕີນຈາກ keratin ເຊິ່ງເປັນໂປຣຕີນທີ່ຊ່ວຍເຮັດໃຫ້ເສັ້ນຜົມ, ຮາກຜົມແຂງແຮງບໍ່ແຕກປາຍ ແລະ ບໍ່ເກີດຜົມງອກໄວ, ເຮັດໃຫ້ເລັບ ແລະ ເນື້ອເຍື່ອແຂງແຮງ. ນອກນັ້ນ, ການກິນຜັກກະລຳ່ເປັນປະຈໍາເຮັດໃຫ້ນອນລັບງ່າຍ, ຮູ້ສຶກຜ່ອນຄາຍ, ຫລຸດຜ່ອນຄວາມກົດດັນ ແລະ ຊ່ວຍໃຫ້ທ່ານນອນຫລັບໄດ້ຢ່າງເຕັມທີ່ເໝາະສໍາລັບຄົນທີ່ເຮັດວຽກໝັກ ແລະ ຜູ້ທ່ີມີບັນຫານອນຍາກ.  

    ເຖິງຜັກກະລໍ່າ ຈະມີປະໂຫຍດ ແຕ່ກໍຕ້ອງກິນໃນປະລິມານທີ່ເໝາະສົມເນື່ອງຈາກວ່າ ຜັກກະລໍ່າ ມີເສັ້ນໃຍອາຫານສູງ ຖ້າກິນໃນປະລິມານທີ່ພໍດີຕໍ່ຮ່າງກາຍຈະຊ່ວຍໃຫ້ລະບົບຍ່ອຍອາຫານເຮັດວຽກໄດ້ດີ, ແຕຖ້າກິນຫລາຍເກີນໄປກໍຈະມີຜົນຂ້າງຄຽງຕໍ່ຮ່າງກາຍເຊັ່ນກັນ ເນື່ອງຈາກວ່າກະລໍ່າດິບມີສານເຄມີຕົກຄ້າງຫລາຍ. ດັ່ງນັ້ນ, ຮ່າງກາຍຈະສະສົມສານເຄມີ ແລະ ສ່ົງຜົນໃຫ້ເກີດພະຍາດໄລຍະຍາວ ວິທີທີ່ດີທີ່ສຸດແມ່ນເອົາໃບຜັກກະລໍ່າມາລ້າງອອກເທື່ອລະໃບໃຫ້ສະອາດ ຫລື ຈະແຊ່ນໍ້າໄວ້ປະມານ 5-10 ນາທີກໍ່ໄດ້, ດີທີ່ສຸດເຮົາຄວນກິນກະລໍ່າທ່ີສຸກ ເພື່ອລີກລ່ຽງບັນຫາທີ່ຈະຕາມມາພາຍຫລັງ. 

            ຮຽບຮຽງໂດຍ: ມາລີດາ

KPL