ຂປລ
ຂປລ. ພິທີມອບ-ຮັບອາຄານນອນຄົນເຈັບ ໂຮງໝໍແຂວງຈໍາປາສັກ ຫລັງໃໝ່ ຈັດຂຶ້ນໃນວັນທີ 12 ມີນາ 2025 ໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ, ມີຫົວໜ້າພະແນກສາທາລະນະສຸກແຂວງຈຳປາສັກ, ຜູ້ອຳນວຍການໂຮງໝໍ ແຂວງຈຳປາສັກ, ມີການນຳຈາກສູນກາງ, ການນໍາເເຂວງ, ພະເເນກການອ້ອມຂ້າງແຂວງ, ພ້ອມດ້ວຍພະນັກງານແພດ-ໝໍ ແລະ ຄະນະຮັບຜິດຊອບໂຄງການເຂົ້າຮ່ວມ
ຂປລ. ພິທີມອບ-ຮັບອາຄານນອນຄົນເຈັບ ໂຮງໝໍແຂວງຈໍາປາສັກ ຫລັງໃໝ່ ຈັດຂຶ້ນໃນວັນທີ 12 ມີນາ 2025 ໂດຍໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ, ມີທ່ານ ອາລຸນໄຊ ສູນນະລາດ ເຈົ້າແຂວງຈຳປາສັກ, ມີຫົວໜ້າພະແນກສາທາລະນະສຸກແຂວງຈຳປາສັກ, ຜູ້ອຳນວຍການໂຮງໝໍ ແຂວງຈຳປາສັກ, ມີການນຳຈາກສູນກາງ, ການນໍາເເຂວງ, ພະເເນກການອ້ອມຂ້າງແຂວງ, ພ້ອມດ້ວຍພະນັກງານແພດ-ໝໍ ແລະ ຄະນະຮັບຜິດຊອບໂຄງການເຂົ້າຮ່ວມ, ເຊິ່ງອາຄານນອນຄົນເຈັບຫລັງນີ້ ໄດ້ຮັບການຊ່ວຍເຫລືອລ້າ ໃນການກໍ່ສ້າງ ຈາກ ກຸ່ມບໍລິສັດ ເອໄອເອັຟ, ບໍລິສັດ ທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈໍາກັດຜູ້ດຽວ, ກຸ່ມບໍລິສັດ ໄຊຊະນະ ຈໍາກັດຜູ້ດຽວ ໃນມູນຄ່າ 16 ຕື້ກີບ.
ໃນພິທີ, ທ່ານ ລິດທິກອນ ພູມມະສັກ ປະທານ ກຸ່ມບໍລິສັດ ເອໄອເອັຟ ໄດ້ຕາງໜ້າແກ່ຜູ້ໃຫ້ທຶນມີຄໍາເຫັນກ່າວມອບ, ພ້ອມທັງຍົກໃຫ້ເຫັນສາເຫດ ແລະ ຄວາມເປັນມາ ໃນການໃຫ້ທຶນຊ່ວຍເຫລືອລ້າໃນການກໍ່ສ້າງອາຄານນອນຄົນເຈັບ ໃຫ້ແກ່ໂຮງໝໍແຂວງຈໍາປາສັກ.
ຕໍ່ມາ ທ່ານ ຄໍາສິງ ແກ້ວທອງກຸ ຜູ້ອໍານວຍການໂຮງໝໍ ແຂວງຈຳປາສັກ ກໍໄດ້ກ່າວຮັບອາຄານນອນຄົນເຈັບຫລັງໃໝ່, ພ້ອມທັງໄດ້ມີຄຳເຫັນວ່າ: ຄະນະພັກ-ຄະນະອໍານວຍການ ພ້ອມດ້ວຍພະນັກງານໂຮງໝໍ ແຂວງຈໍາປາສັກ ມີຄວາມພາກພູມໃຈຢ່າງຍິ່ງ ທີ່ໄດ້ຮັບອາຄານນອນຄົນເຈັບຫລັງໃໝ່ນີ້ ເພາະເປັນຂີດໝາຍທີ່ສໍາຄັນ ໃນການຍົກລະດັບຄຸນນະພາບການປິ່ນປົວ ຕາມເນື້ອໃນຄຸນນະພາບ 5 ດີ 1 ພໍ ໃຈ ຢູ່ສະຖານທີ່ປິ່ນປົວສຸຂະພາບ ທີ່ກະຊວງສາທາລະນະສຸກ ກຳນົດອອກ, ທັງເປັນການຫລຸດຜ່ອນຄວາມແອອັດ, ຫລຸດຜ່ອນຄວາມສ່ຽງ ຈາກການຕິດເຊື້ອພາຍໃນໂຮງໝໍ, ເຮັດໃຫ້ໂຮງໝໍ ມີອາຄານນອນປິ່ນປົວຄົນເຈັບ ຂະໜາດ 68 ຕຽງ ເພີ່ມຕື່ມ ເພື່ອຮອງຮັບໃຫ້ແກ່ການມາປິ່ນປົວ ຂອງປະຊາຊົນບັນດາເຜົ່າ ໃນ 4 ແຂວງພາກໃຕ້. ພ້ອມນີ້, ທ່ານຍັງໃຫ້ຄໍາໝັ້ນສັນຍາວ່າ ຈະຄຸ້ມຄອງນໍາໃຊ້ ແລະ ປົກປັກຮັກ ສາອາຄານນອນປິ່ນປົວຕົນເຈັບ ທີ່ໄດ້ຮັບການຊ່ວຍເຫລືອໃນຄັ້ງນີ້ ດ້ວຍຄວາມຮັບຜິດຊອບ ແລະ ເກີດປະໂຫຍດສູງສຸດ.
ຂ່າວ-ພາບ: ເກດສະໜາ
KPL
