ຂປລ
ຂປລ. ເມື່ອບໍ່ດົນມານີ້, ພະແນກສະຫະພັນແມ່ຍິງ ໂຮງຮຽນວັດທະນະທຳຊົນເຜົ່າກອງທັບ ຈັດພິທີສະ ເຫລີມສະຫລອງ ວັນແມ່ຍິງສາກົນ ຄົບຮອບ 115 ປີ (08 ມີນາ 1910-08 ມີນາ 2025) ພາຍໃຕ້ຄຳຂວັນ" ສິດທິ, ຄວາມສະເໝີພາບ ແລະ ຄວາມເຂັ້ມແຂງ ເພື່ອແມ່ຍິງ ແລະ ເດັກຍິງທຸກຄົນ"
ຂປລ. ເມື່ອບໍ່ດົນມານີ້, ພະແນກສະຫະພັນແມ່ຍິງ ໂຮງຮຽນວັດທະນະທຳຊົນເຜົ່າກອງທັບ ຈັດພິທີສະ ເຫລີມສະຫລອງ ວັນແມ່ຍິງສາກົນ ຄົບຮອບ 115 ປີ (08 ມີນາ 1910-08 ມີນາ 2025) ພາຍໃຕ້ຄຳຂວັນ" ສິດທິ, ຄວາມສະເໝີພາບ ແລະ ຄວາມເຂັ້ມແຂງ ເພື່ອແມ່ຍິງ ແລະ ເດັກຍິງທຸກຄົນ" ໂດຍການເປັນປະທານຂອງ ສະຫາຍ ພັນເອກ ສະແຫວງ ແດນນາມົນ ຫົວໜ້າການເມືອງ ໂຮງຮຽນວັດທະນະທຳ ຊົນເຜົ່າກອງທັບ, ມີຄະນະພັກ-ຄະນະອຳນວຍການ, 4 ຫ້ອງ, 2 ກອງພັນ, ພະນັກງານ-ສະມາຊິກເອື້ອຍນ້ອງແມ່ຍິງ ທົ່ວໂຮງຮຽນເຂົ້າຮ່ວມ.
ໃນພິທີ ສະຫາຍ ພັນຕີ ນາງ ມະໄລສອນ ມຽງເຮືອງທອງ ຫົວໜ້າພະແນກສະຫະພັນແມ່ຍິງ ໄດ້ຫວນຄືນມູນເຊື້ອ ວັນທີ 8 ມີນາ ແມ່ນໄດ້ກຳເນີດເກີດຂຶ້ນ ໃນທ່າມກາງສະພາບເສດຖະກິດ ຂອງພວກສັກດີນາ ແລະ ນາຍທຶນຂະຫຍາຍຕົວ ແຕ່ຊໍ້າພັດຍິ່ງເພີ່ມຄວາມທຸກຍາກລຳບາກ ໃຫ້ແກ່ຊາວຜູ້ອອກແຮງງານ ໂດຍສະເພາະ ແມ່ນກຳມະກອນແມ່ຍິງ ຢູ່ໃຕ້ລະບອບສັກດີນາ ແລະ ນາຍທຶນ, ແມ່ຍິງຖືກກົດ ຂີ່ຂູດຮີດຢ່າງໜັກໜ່ວງ, ເຮັດວຽກຫລາຍຊົ່ວໂມງ ແຕ່ໄດ້ຮັບຄ່າຈ້າງແຮງງານຖືກ, ແມ່ຍິງຖືກດູໝິ່ນປະໝາດ, ຖືກຢຽບຢໍ່າທຳລາຍ, ທຸບຕີທໍລະມານ, ຂົ່ມຂືນກະທຳສໍາເລົາ ແລະ ຖືກໄລ່ອອກວຽກ, ໃນເວລາຖືພາ ແລະ ອອກລູກ ຫລື ເວລາເຈັບເປັນບໍ່ໄດ້ຮັບການປິ່ນປົວ, ຖືແມ່ຍິງເປັນເຄື່ອງຫລິ້ນ ຫລື ເປັນສິນຄ້າ ເອົາລັດເອົາປຽບບໍ່ໃຫ້ແມ່ຍິງ ມີສິດສະເໝີພາບລະຫວ່າງ ຍິງ-ຊາຍ ແລະ ອື່ນໆ.
ຕໍ່ໜ້າສະພາບການ ແລະ ຄວາມທຸກທໍລະມານດັ່ງກ່າວ, ກຳມະກອນແມ່ຍິງໃນທົ່ວໂລກ ຈຶ່ງມີນໍ້າໃຈຄຽດແຄ້ນ ແລະ ສາມັກຄີຮ່ວມແຮງຮ່ວມໃຈກັນ ຕໍ່ສູ້ເພື່ອປົດປ່ອຍຕົນເອງ ແລະ ທ່ວງເອົາສິດສະເໝີພາບ ປະຊາທິປະໄຕ ຄືກັນກັບເພດຊາຍ ນັບແຕ່ວັນທີ 8 ມີນາ 1910 ເປັນຕົ້ນມາ, ຂະບວນການຕໍ່ສູ້ຂອງແມ່ຍິງ ໄດ້ແຜ່ຂະຫຍາຍອອກໄປສູ່ ຫລາຍປະເທດນາຍທຶນ ເຮັດໃຫ້ແມ່ຍິງຢຸດງານ ອອກມາເດີນປະທ້ວງ ແລະ ກອງປະຊຸມສະມັດຊາສະຕຣີສາກົນ ກ່ຽວກັບແມ່ຍິງໄດ້ຈັດຂຶ້ນ ຢູ່ປະເທດໂກເປນຮາກ ນະຄອນຫລວງຂອງປະເທດ ເດນມາກ ເຊິ່ງມີຜູ້ແທນເຂົ້າຮ່ວມ 100 ກວ່າຄົນຈາກ 17 ປະເທດເຂົ້າຮ່ວມ. ກອງປະຊຸມດັ່ງກ່າວໄດ້ຮັບຮອງ ແລະ ຕົກລົງເອົາ ວັນທີ 8 ມີນາ ຂອງທຸກໆປີເປັນວັນແມ່ຍິງສາກົນ.
ພ້ອມກັນນີ້, ສະຫາຍ ພັນຕີ ນາງ ມະໄລສອນ ມຽງເຮືອງທອງ ຍັງຍົກໃຫ້ເຫັນມູນເຊື້ອຂອງແມ່ຍິງລາວ ໃນເມືອກ່ອນທີມີຄວາມເກັ່ງກ້າສາມາດ, ຄ່ຽງບາຄ່ຽງໄຫລຕໍ່ສູ້ຮ່ວມກັບເພດຊາຍ ຕໍ່ສູ້ກັບຈັກກະພັກພວກ ລ່າເມືອງຂື້ນແບບເກົ່າ ແລະ ໃໝ່ ສາມາດຕໍ່ສູ້ຍາດໄດ້ໄຊຊະນະຢ່າງສົມບູນ.
ຂ່າວ: ໂອລິນ ມິ່ງມີໄຊ
KPL
