ຂປລ
ຂປລ. ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ (ນວ) ໄດ້ທໍາລາຍໝາກກະໂພກ ແລະ ບັ້ງໄຟດອກ ທີ່ຢຶດໄດ້ຈາກການລັກລອບນຳເຂົ້າ ແລະ ຈຳໜ່າຍ ໃນວັນທີ 7 ກຸມພາ 2025 ຜ່ານມາ ຢູ່ກອງພັນໃຫຍ່ 497
ຂປລ. ພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ (ນວ) ໄດ້ທໍາລາຍໝາກກະໂພກ ແລະ ບັ້ງໄຟດອກ ທີ່ຢຶດໄດ້ຈາກການລັກລອບນຳເຂົ້າ ແລະ ຈຳໜ່າຍ ໃນວັນທີ 7 ກຸມພາ 2025 ຜ່ານມາ ຢູ່ກອງພັນໃຫຍ່ 497 ໂດຍການເຂົ້າ ຮ່ວມຂອງ ທ່ານ ນາງ ວັນມະນີ ພິມມະສານ ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫລວງວຽງຈັນ, ທ່ານ ພັທ ບົວລີ ກອງອຸເທນ ຫົວໜ້າພະແນກເຕັກນິກ ກອງພັນໃຫຍ່ 497 ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ມະໂນສັກ ໄຊສິລິກຸນ ຮອງຫົວໜ້າຂະແໜງການຄ້າພາຍໃນ ໃຫ້ຮູ້ວ່າ: ພະແນກອຸດສາຫະກໍາ ແລະ ການຄ້າ ນວ ແລະ ຫ້ອງການອຸດສາຫະກຳ ແລະ ການຄ້າ 9 ຕົວເມືອງ ໄດ້ລົງເຄື່ອນໄຫວວຽກງານຕ້ານ ແລະ ສະກັດກັ້ນການຄ້າຂາຍເຖື່ອນ ຄ້າຂາຍນອກລະບົບທຸກຮູບແບບ ເຊິ່ງໃນໄລຍະບຸນປີໃໝ່ສາກົນ, ປີໃໝ່ຈີນ ແລະ ປີໃໝ່ຫວຽດນາມ ປີ 2025 ໂດຍໄດ້ກວດກາບັນດາຮ້ານຄ້າ ແລະ ຕະຫລາດ ໃນນະຄອນຫລວງວຽງຈັນ ທັງໝົດ 24 ຕະຫລາດ ແລະ 166 ຮ້ານ. ຜ່ານການກວດກາໄດ້ພົບເຫັນການລັກລອບນຳເຂົ້າ ແລະ ຈຳໜ່າຍ ໝາກກະໂພກ ແລະ ບັ້ງໄຟດອກ ທີ່ເປັນສິນຄ້າເກືອດຫ້າມນໍາເຂົ້າ ແລະ ຈໍາໜ່າຍ ລວມນ້ຳໜັກທັງໝົດ ປະມານ 576,6 ກິໂລກຣາມ ຄິດເປັນມູນຄ່າເກືອບ 300 ລ້ານກີບ. ສະນັ້ນ, ເຈົ້າໜ້າທີ່ການຄ້າ ຈຶ່ງໄດ້ເຮັດບົດບັນທຶກກວດກາ ແລະ ຢຶດສິນຄ້າດັ່ງກ່າວ, ມາທໍາລາຍຖີ້ມຕາມລະ ບຽບການ.
ໄລຍະຜ່ານມາ, ພະແນກອຸດສາຫະກຳ ແລະ ການຄ້າ ນວ ໄດ້ສຸມໃສ່ຈັດຕັ້ງປະຕິບັດ ຄໍາສັ່ງວ່າດ້ວຍການຫ້າມຜະລິດ, ນໍາເຂົ້າ, ຂົນສົ່ງ, ຊື້-ຂາຍ, ມີໄວ້ໃນຄອບຄອງ, ຈູດໜາກກະໂພກ, ບັ້ງໄຟດອກ ແລະ ໂຄມໄຟລອຍຟ້າ ຂອງທ່ານເຈົ້າຄອງນະຄອນ ຫລວງວຽງຈັນ ແລະ ຄໍາສັ່ງວ່າດ້ວຍການເພີ່ມທະວີຕິດຕາມ ກວດກາ ແລະ ສະກັດກັ້ນການຄ້າສິນຄ້ານອກລະບົບ ແລະ ນໍາໃຊ້ມາດຕະການຕໍ່ຜູ້ລະເມີດຂອງ ກະຊວງອຸດສາຫະກຳ ແລະ ການຄ້າ. ທັງນີ້, ກໍເພື່ອແກ້ໄຂບັນຫາລັກລອບນຳເຂົ້າ ແລະ ຈຳໜ່າຍສິນຄ້າເກືອດຫ້າມ.
ຂ່າວ: ວຽງຈັນໃໝ່
KPL
