ຂປລ. ໃນວັນທີ 18 ມັງກອນ 2025 ຜ່ານມາ, ອະດີດນັກສຶກສາລາວ ແລະ ນັກສຶກສາລາວ ທີ່ຮຽນຢູ່ ແຂວງກວາງຊີ ສປ ຈີນ ຮ່ວມກັບ ສະພາການຄ້າ ແຂວງກວາງຊີ ປະຈໍາ ສປປ ລາວ ຈັດງານພົບປະສັງສັນ ເຊິ່ງກັນ ​ແລະ ກັນ ແລະ ຈັດກິດຈະກໍາສ້າງຂະບວນການແຂ່ງຂັນກິລາ ເພື່ອຮັດແໜ້ນຄວາມສາມັກຄີ ແລະ ເພື່ອສະເຫລີມສະຫລອງບຸນປີໃໝ່ຈີນ ປະຈໍາປີ 2025 ແລະ ບຸນເດືອນສາມ ຂອງເຜົ່າຈ້ວງ ກວາງຊີ ທີ່ຈະມາເຖິງນີ້.

ໂອກາດດັ່ງກ່າວ, ທ່ານ ສົມບູນ ສຸກທະວີ ປະທານອະດີດນັກສຶກສາລາວ ແຂວງກວາງຊີິ ສປ ຈີນ ​ໄດ້​ໃຫ້​ຮູ້ວ່າ: ການຈັດງານພົບປະ ແລະ ກິດຈະກຳແຂງຂັນກິລາ ໃນຄັ້ງນີ້, ຈັດຂຶ້ນເປັນຄັ້ງທີ 2 ເພື່ອຮັດແໜ້ນຄວາມສາມັກຄີ, ປອງດອງ, ຢຶ້ຢາມຖາມຂ່າວ ເຊິ່ງກັນ ແລະ ກັນ ລະຫວ່າງອະດີດນັກສຶກສາລາວ ທີ່ໄດ້ໄປສຶກສາຮໍ່າຮຽນ ຢູ່ ແຂວງກວາງຊີ ສປ ຈີນ, ທັງເປັນການຮັດແໜ້ນການພົວພັນຮ່ວມມື ດ້ານການສຶກສາ ລະຫວ່າງສອງປະເທດ ລາວ-ຈີນ ໃຫ້ໄດ້ຮັບການພັດທະນາ ແລະ ແໜ້ນແຟ້ນຂຶ້ນເລື້ອຍໆ.

ສຳລັບ ກິດຈະກຳແຂ່ງຂັນກິລາໃນຄັ້ງນີ້, ປະກອບມີ: ການແຂ່ງຂັນເຕະບານຊາຍ, ບານສົ່ງ, ຕີດອກປີກໄກ່ ແລະ ດຶງເຊືອກ ເຊິ່ງນັກກິລາ ກໍແມ່ນນັກສຶກສາ ທີ່ມາຈາກມະຫາວິທະຍາໄລກວາງຊີ, ມະຫາວິທະຍາໄລແພດສາດ ກວາງຊີ, ນັກສຶກສາຈາກນະຄອນກຸ້ຍຫລິນ, ສະພາການຄ້າແຂວງກວາງຊີ, ມະຫາວິທະຍາໄລຊົນເຜົ່າກວາງຊີ ແລະ ຊາວໜຸ່ມອົງການໄອຍະການປະຊາຊົນສູງສຸດ ໄດ້ສ້າງບັນຍາ ກາດອັນມ່ວນຊື່ນ ໃຫ້ແກ່ຜູ້ເຂົ້າຮ່ວມງານ, ທັງເປັນການປະກອບສ່ວນເພີ່ມທະວີສາຍພົວພັນ, ຄວາມສາມັກຄີ ແລະ ຄວາມເຂົ້າໃຈ ເຊິ່ງກັນ ແລະ ກັນ ໃຫ້ຫລາຍຂຶ້ນ.

ທ່ານ ​​ເຊີນ ຊິນອູ ປະທານສະພາການຄ້າ ແຂວງກວາງຊີ ປະຈໍາ ສປປ ລາວ ​ໄດ້ກ່າວວ່າ: ການຈັດກິດຈະກຳ ໃນຄັ້ງນີ້, ຈັດຂຶ້ນ​ເພື່ອ​ເປັນການສົ່ງທ້າຍປີ​ເກົ່າ, ຕ້ອນຮັບປີ​ໃໝ່ ສປ ຈີນ ປະຈຳປີ 2025 ທີ່ຈະມາ​ເຖິງ, ຖື​ເປັນ​ໂອກາດ​ໃຫ້ບັນດາອະດີດນັກສຶກສາລາວ ທີ່ເຄີຍໄປຮໍ່າຮຽນຢູ່ ບັນດາສະຖາບັນການສຶກສາ ຂອງແຂວງກວາງຊີ ໄດ້ມີເວທີມາພົບປະສັງສັນ ແລະ ແລກປ່ຽນບົດຮຽນຮ່ວມກັນ ພາຍ ຫລັງສຳເລັດການສຶກສາມາແລ້ວ ແລະ ມີຫລາຍທ່ານ ໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນ ໃນຂົງເຂດວຽກງານການເມືອງ, ການຄ້າ, ການລົງທຶນ, ການທ່ອງທ່ຽວ ແລະ ອື່ນໆ ລະຫວ່າງສອງປະເທດ.

ທ່ານ ​​ເຊີນ ຊິນອູ ​ໄດ້ໃຫ້ຮູ້ອີກວ່າ: ໃນປີ 2024 ຜ່ານມາ, ສະພາການຄ້າແຂວງກວາງຊີ ໄດ້ເຮັດວຽກຮ່ວມກັບ ບັນດາພາກສ່ວນທີ່ກ່ຽວຂ້ອງຂອງ ສປປ ລາວ ໃນການສົ່ງເສີມການຮ່ວມມື ທາງດ້ານເສດຖະກິດ, ການຄ້າ, ການລົງທຶນ ແລະ ການໄປມາຫາສູ່ ກັນລະຫວ່າງປະຊາຊົນ ຂອງສອງປະເທດ ຢ່າງເປັນປົກກະຕິ, ຖືເປັນສ່ວນໜຶ່ງໃຫ້ແກ່ການພົວພັນ ຄູ່ຮ່ວມມືຍຸດທະສາດຮອບດ້ານ ລະຫວ່າງ ລາວ ແລະ ຈີນ ເຮັດໃຫ້ສອງປະເທດ ກາຍເປັນຄູ່ຮ່ວມຊະຕາກຳ ທີ່ນຳເອົາຜົນປະໂຫຍດມາສູ່ປະຊາຊົນສອງປະເທດ.

ສຳລັບປີ 2025 ສະພາການຄ້າແຂວງກວາງຊີ ຈະ​ສືບຕໍ່ຊຸກຍູ້ ​ແລະ ສະໜັບສະໜູນດ້ານຂໍ້ມູນຂ່າວສານ, ​ເປັນຂົວຕໍ່ປະສານງານລະຫວ່າງນັກລົງທຶນຈີນ ​ແລະ ອົງການຈັດຕັ້ງພາກລັດ-ເອກະຊົນ ​ໃນການສົ່ງ​ເສີມການຄ້າ, ການລົງທຶນ ​ແລະ ​ແລກປ່ຽນວັດທະນະທໍາ-ສັງຄົມ ຂອງສອງປະ​ເທດ ​​ໂດຍສະ​ເພາະ ​ແມ່ນການປະກອບສ່ວນສ້າງກິດຈະກຳ ໃຫ້ອະດີດນັກສຶກສາ ກໍຄື ນັກສຶກສາລາວ ທີ່ກຳລັງຮໍ່າຮຽນຢູ່ ແຂວງກວາງຊີ ສປ ຈີນ ໄດ້ມາພົບປະສັງສັນຮ່ວມກັນໃຫ້ຫລາຍຂຶ້ນ.

ຂ່າວ: ທະນູທອງ

ພາບ: ຂັນໄຊ

KPL