ຂປລ
ຂປລ. ສື່ມວນຊົນ ຈາກ ສປປ ລາວ ສໍາເລັດການເຂົ້າຮ່ວມຝຶກອົບຮົມ ພາຍໃຕ້ຫົວຂໍ້ “ສຸຂະພາບໜຶ່ງດຽວ” ໃນວັນທີ 13-17 ມັງກອນ 2025 ຢູ່ຣາຊະອານາຈັກໄທ ໂດຍໄດ້ຮຽນຮູ້ການເຮັດຄລິບວິດີໂອ ດ້ວຍມືຖື ເພື່ອໂຄສະນາກ່ຽວກັບການເຝົ້າລະວັງພະຍາດຕ່າງໆ ພາຍໃຕ້ໂຄງການດັ່ງກ່າວ.
ຂປລ. ສື່ມວນຊົນ ຈາກ ສປປ ລາວ ສໍາເລັດການເຂົ້າຮ່ວມຝຶກອົບຮົມ ພາຍໃຕ້ຫົວຂໍ້ “ສຸຂະພາບໜຶ່ງດຽວ” ໃນວັນທີ 13-17 ມັງກອນ 2025 ຢູ່ຣາຊະອານາຈັກໄທ ໂດຍໄດ້ຮຽນຮູ້ການເຮັດຄລິບວິດີໂອ ດ້ວຍມືຖື ເພື່ອໂຄສະນາກ່ຽວກັບການເຝົ້າລະວັງພະຍາດຕ່າງໆ ພາຍໃຕ້ໂຄງການດັ່ງກ່າວ.
ໂອກາດນີ້, ສື່ມວນຊົນລາວທີ່ເຂົ້າຮ່ວມຝຶກອົບຮົມ ຍັງໄດ້ເດີນທາງໄປ ແຂວງຊົນບູລີ ເພື່ອຕິດ ຕາມເບິ່ງການເກັບຕົວຢ່າງ ຂີ້ເຈຍ ເພື່ອມາວິໄຈຊອກຫາເຊື້ອພະຍາດ ນິປາໄວຣັດ (ເປັນເຊື້ອພະຍາດທີ່ເກີດຈາກສັດສູ່ຄົນ) ຢູ່ວັດຫລວງພົມມະວາດ ແລະ ການໃຊ້ຊີວິດຂອງເຈຍ ແລະ ປະຊາຊົນຢູ່ໃນເຂດດັ່ງກ່າວ.
ທ່ານນາງສຸພາພອນ ວັດສະລະພຸດສະດີ ນັກຄົ້ນຄວ້າຈາກມະຫາວິທະຍາໄລຈຸລາລົງກອນ ປະເທດໄທ ໄດ້ໃຫ້ຮູ້ກ່ຽວກັບ ສຸຂະພາບໜຶ່ງດຽວ ກໍຄື ການເຝົ້າລະວັງເຊື້ອພະຍາດ ນິປາໄວຣັດ ທີ່ຢູໃນເຈຍແມ່ໄກ່, ປັດຈຸບັນ ແມ່ນກວດພົບເຊື້ອພະຍາດດັ່ງກ່າວ ຈາກເຈຍແມ່ໄກ່ ຢູ່ແຂວງຊົນບູລີ ແຕ່ຍັງບໍ່ພົບເຊື້ອພະຍາດ ນິປາໄວຣັດ ຕິດຕໍ່ສູ່ຄົນເທື່ອ. ປັດຈຸບັນ, ປະຊາກອນ ເຈຍແມ່ໄກ່ ຢູ່ແຂວງຊົນບູລີ ມີ ປະມານ 8.000-10.000 ໂຕ ແລະ ທົ່ວປະທດໄທ ມີປະມານ 20 ລ້ານໂຕ.
ເຊື້ອພະຍາດ ນິປາໄວຣັດ ແມ່ນເຮັດໃຫ້ເກີດ ພະຍາດສະໝອງອັກເສບ, ພະຍາດທາງເດີນຫາຍ ໃຈ ເຊິ່ງພະຍາດດັ່ງກ່າວ ເປັນອັນຕະລາຍຫລາຍຊີວິດ ເຊິ່ງອາການຂອງພະຍາດດັ່ງກ່າວແມ່ນ ມີໄຂ້, ໄອ ແລະ ເຈັບຫົວ ຖ້າຕິດເຊື້ອພະຍາດດັ່ງກ່າວແລ້ວ ແມ່ນເຮັດໃຫ້ເສຍຊີວິດໄດ້ ເພາະປັດຈຸບັນ, ຍັງບໍ່ທັນມີວັກຊິນປ້ອງກັນ ແລະ ຍັງບໍ່ທັນມີຢາປົວພະຍາດດັ່ງກ່າວ.
ເຊື້ອພະຍາດນິປາໄວຣັດ ເກີດຈາກສັດສູ່ຄົນ ເຊິ່ງໄລຍະຜ່ານມາແມ່ນໄດ້ຄົ້ນພົບຈາກ ໝູ, ເຈຍ, ມ້າ ຢູ່ປະເທດ ມາເລເຊຍ, ຟີລິບປິນ, ອິນເດຍ, ບັງກະລາເທດ, ສິງກະໂປ ແລະ ມີຄົນເສຍຊີວິດຈາກພະຍາດດັ່ງກ່າວແລ້ວ ເປັນຈໍານວນຫລາຍ.
ໂອກາດດຽວກັນ, ສື່ມວນຊົນລາວ ຍັງໄດ້ໄປຢ້ຽມຢາມ ມະຫາວິທະຍາໄລມະຫິດົນ, ສະຖານ ບັນຄົ້ນຄວ້າວິໄຈ ເຊື້ອພະຍາດ ແລະ ກະຊວງສາທາລະນະສຸກ ຢູ່ກຸງເທບມະຫານະຄອນ ຕື່ມອີກ.
ຂ່າວ-ພາບ: ວິນນາລີ
KPL
