ຂປລ
ໜ່ວຍງານ ສຳຮອງເຂົ້າ ສຸກເສີນ ລະດັບ ພະຫຸພາຄີ ຂອງ ສະມາຄົມ ປະຊາຊາດ ແຫ່ງອາຊີ ຕາເວັນອອກສຽງໃຕ້ (ອາຊຽນ) ກຽມຄວາມພ້ອມ ເພື່ອຮັບມືກັບ ໄພພິບັດ ທີ່ເກີດຂຶ້ນ ຈາກ ການປ່ຽນແປງ ຂອງສະພາບພູມອາກາດ
ຂປລ. ສຳນັກຂ່າວ ເອເອຟພີ ລາຍງານຈາກ ນະຄອນຫລວງ ກົວລາລຳເປີ ປະເທດ ມາເລເຊຍ ເມື່ອວັນທີ 13 ມັງກອນ 2025, ໜ່ວຍງານ ສຳຮອງເຂົ້າ ສຸກເສີນ ລະດັບ ພະຫຸພາຄີ ຂອງ ສະມາຄົມ ປະຊາຊາດ ແຫ່ງອາຊີ ຕາເວັນອອກສຽງໃຕ້ (ອາຊຽນ) ກຽມຄວາມພ້ອມ ເພື່ອຮັບມືກັບ ໄພພິບັດ ທີ່ເກີດຂຶ້ນ ຈາກ ການປ່ຽນແປງ ຂອງສະພາບພູມອາກາດ ຊຶ່ງອາດຈະຄຸກຄາມ ຄວາມໝັ້ນຄົງ ດ້ານສະບຽງ ອາຫານ ຂອງ ອາຊຽນໃນປີນີ້.
ໂດຍ ອົງການ ສຳຮອງເຂົ້າ ສຸກເສີນ ຂອງ ອາຊຽນ ບວກສາມ ຫລື ແອບເຕີຣ (APTERR) ຊຶ່ງເປັນ ຄວາມຮ່ວມມື ພະຫຸພາຄີ ທີ່ ປະກອບດ້ວຍ ສະມາຊິກ ອາຊຽນ 10 ປະເທດ ກັບ ສປຈີນ, ຍີ່ປຸ່ນ ແລະ ສ.ເກົາຫລີ ພວມເຝົ້າລະວັງ ໄພພິບັດ ທີ່ ອາດຈະເກີດຂຶ້ນ ຫລັງຈາກ ພາຍຸໄຕ້ຝຸ່ນ ຮຸນແຮງ ຫລາຍລູກ ພັດຖະຫລົ່ມ ພາກພື້ນ ເມື່ອປີກາຍ. ໂດຍບັນດາ ປະເທດ ທີ່ ເພິ່ງພາເຂົ້າ ເຊັ່ນ: ຟີລິບປິນ, ສປປ ລາວ, ມຽນມາ ແລະ ຫວຽດນາມ ຕ່າງກໍປະສົບກັບ ຄວາມລຳບາກ ຈາກຄວາມບໍ່ແນ່ນອນ ຂອງ ສະພາບ ອາກາດສຸດຂົ້ວ ທີ່ ສົ່ງຜົນກະທົບ ຕໍ່ການຜະລິດອາຫານ. ນອກນັ້ນ, ປະເທດ ສະມາຊິກ ແອບເຕີຣ ໄດ້ຈັດສາງ ສຳຮອງເຂົ້າ ສຸກເສີນ ໃນຮູບແບບ ສັນຍາ ເພື່ອຮັບມືກັບ ບັນຫ າດ້ານອາຫານ . ປັດຈຸບັນ ມີເຂົ້າລວມ 787.000 ໂຕນ ຈາກ ສປຈີນ, ຍີ່ປຸ່ນ ແລະ ສ.ເກົາຫລີ. ໂດຍເຂົ້າ 7.522 ເມຕິກໂຕນ ໄດ້ຈັດກຽມໄວ້ ລ່ວງໜ້າ ໃນ ສປປລາວ, ມຽນມາ ແລະ ຟີລິບປິນ ເພື່ອສະໜັບ ສະໜູນ ຄວາມພະຍາຍາມ ໃນການຕອບສະໜອງ ຕໍ່ໄພພິບັດ./
KPL
