*ປັດຈຸບັນ ການແພ່ລະບາດຂອງພະຍາດໄຂ້ຍຸງລາຍ ຊຶ່ງໃນແຕ່ປີຢູ່ປະເທດເຮົາມີຜູ້ຕິດເຊື້ອພະຍາດດັ່ງກ່າວຫລາຍພໍສົມຄວນ, ດັ່ງນັ້ນ ການປ້ອງກັນ ແລະ ຄວບຄຸມພະຍາດໄຂ້ຍຸງລາຍ ຈຶ່ງເປັນບັນຫາສໍາຄັນຫລາຍເພື່ອບໍ່ໃຫ້ເປັນພະຍາດໄຂ້ຍຸງລາຍທຸກຄົນໃນສັງຄົມຈົ່ງພ້ອມກັນ ເປັນເຈົ້າການປ້ອງກັນ ແລະ ຄວບຄຸມພະຍາດດັ່ງກ່າວດ້ວຍວິທີການຕ່າງໆ.

     ຂໍ້ມູນຈາກສູນຂ່າວສານການແພດສຸຂະສຶກສາ ກະຊວງສາທາລະນະສຸກໃຫ້ຮູ້ວ່າ: ພະຍາດໄຂ້ຍຸງລາຍເປັນສາເຫດໜຶ່ງຂອງການເຂົ້າໂຮງໝໍ ແລະ ການເສຍຊີວິດຂອງເດັກນ້ອຍອາຊີ ແລະ ອາເມລິກາລາຕິນ ຊຶ່ງວິທີການໂວບັກເຄຍ (Wolbachia method) ຂອງໂຄງການຄວບຄຸມປະຊາກອນຍຸງ ໂລກ (WMP) ຈະຊ່ວຍຫລຸດຜ່ອນຄວາມສ່ຽງນີ້ ແລະ ປັດຈຸບັນຍັງມີ ທີມງານຄວບຄຸມພະຫະນະນໍາເຊື້ອພະຍາດໄຂ້ຍຸງລາຍໃນຫລາຍພາກສ່ວນກ່ຽວຂ້ອງ ພ້ອມດ້ວຍປະຊາຊົນໃນຂອບເຂດທົ່ວປະເທດ ໄດ້ພ້ອມກັນເອົາໃຈໃສ່ສ້າງຂະບວນການກວດ ແລະ ທໍາລາຍໜອນນໍ້າຍຸງລາຍໃນແຕ່ລະຫລັງຄາເຮືອນເພື່ອຕ້ານ ແລະ ຄວບຄຸມການລະບາດຂອງພະຍາດໄຂ້ຍຸງລາຍ ຊຶ່ງຕົ້ນຕໍແມ່ນໜອນນໍ້າຍຸງລາຍທີ່ວາງໄຂ່ໃນພາຊະນະບັນຈຸນໍ້າໃນເຮືອນ ເຊັ່ນ: ກະໂປະ, ກະປ໋ອງ, ຂວດນໍ້າ, ອ່າງ ຫລື ໂອ່ງເກັບນໍ້າ.

     ສະນັ້ນ, ພາຊະນະບັນຈຸນໍ້າທີ່ບໍ່ແມ່ນນໍ້າໃຊ້ຕ້ອງໄດ້ຂ້ວມ ຫລື ທຳລາຍຖິ້ມບໍ່ໃຫ້ມີນໍ້າຂັງ, ສ່ວນນໍ້າໃນໂອ່ງເກັບນໍ້າດື່ມ, ນໍ້າໃຊ້ ຕ້ອງໃສ່ຊາຍອາເບດ ເພື່ອບໍ່ໃຫ້ຍຸງສາມາດວາງໄຂ່ໄດ້. ພ້ອມດຽວກັນນັ້ນ, ເຈ້ົາຂອງເຮືອນຕ້ອງໄດ້ເປັນເຈ້ົາການໃນການກວດກາຕາມ ເຮືອນໂຕເອງທຸກໆມື້ ແລະ ເປັນປະຈໍາຢູ່ສະເໝີ ເພື່ອຄວາມເປັນລະບຽບ ແລະ ສະອາດງາມຕາ, ຖ້າປະຕິບັດເຮົາກໍສາມາດກັນ ແລະ ຄວບຄຸມພະຍາດໄຂ້ຍຸງລາຍບໍ່ໃຫ້ເກີດການລະບາດໄດ້. ພ້ອມນັ້ນ, ຕ້ອງເປັນເຈົ້າການ ປະຕິບັດມາດຕະການປ້ອງກັນພະຍາດໄຂ້ຍຸງລາຍທ່ີກະຊວງສາທາລະນະສຸກວາງອອກຢ່າງເຂັ້ມງວດ ໂດຍສະເພາະປະຕິບັດຫລັກການ 5 ປ ໃຫ້ເປັນປະຈຳ ແລະ ເປັນປົກກະຕິ, ເຊື່ອແນ່ວ່າພະຍາດໄຂ້ຍຸງລາຍຈະບໍ່ເກີດຂຶ້ນກັບຕົວທ່ານ, ຄອບຄົວ ແລະ ຄົນທີ່ທ່ານຮັກ ແລະ ຄອບຄົວຂອງທ່ານຍັງຈະມີສຸຂະພາບທີ່ດີ ແລະ ແຂງແຮງ.

   ແນວໃດກໍຕາມ ນອກຈາກມີສະຕິໃນການປ້ອງກັນຄວບຄຸມພະຍາດດັ່ງກ່າວແລ້ວ, ທຸກຄົນຍັງຕ້ອງເຝົ້າລະວັງພະຍາດຕາມລະດູການຄື: ພະຍາດໄຂ້ຫວັດໃຫຍ່ ແລະ ພະຍາດອື່ນໆ. ດັ່ງນັ້ນ, ຖ້າທ່ານຮູ້ສຶກບໍ່ສະບາຍ, ເປັນໄຂ້ບໍ່ຄວນໄປຊື້ຢາມາກິນເອງ, ຄວນຮີບຮ້ອນໄປພົບແພດໝໍ ໂດຍໄວຢູ່ສະຖານທີ່ໃຫ້ບໍລິການຕ່າງໆໃກ້ບ້ານທ່ານຄື: ໂຮງໝໍເມືອງ, ໂຮງໝໍແຂວງ, ໂຮງໝໍສູນກາງ, ສຸກສາລາ ແລະ ສະຖານທີ່ໃຫ້ບໍລິການອື່ນໆ ເພື່ອຈະໄດ້ກິນຢາຕາມແພດໝໍສັ່ງ ແລະ ປິ່ນປົວໃຫ້ທັນເວລາ.

KPL