ຂປລ. ເມື່ອບໍ່ດົນມານີ້, ທ່ານ ມະນີໂສ ຊາມຸນຕີ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດກົດໝາຍ ແລະ ມະຕິຂອງສະພາແຫ່ງຊາດ ກ່ຽວກັບວຽກງານຂຶ້ນທະບຽນອອກໃບຕາດິນ, ການເຊົ່າ ແລະ ສໍາປະທານທີ່ດິນ, ວຽກງານນະໂຍບາຍການອະນຸລັກ ແລະ ການຫລຸດຜ່ອນຜົນກະທົບ ຕໍ່ຊີວະນາໆພັນ ລວມທັງວຽກງານການຟື້ນຟູປ່າ ແລະ ປູກໄມ້ທົດແທນ ຢູ່ແຂວງຫົວພັນ.

ໂອກາດນີ້, ທ່ານ ມະນີໂສ ຊາມຸນຕີ ພ້ອມຄະນະ ໄດ້ເຂົ້າພົບທ່ານຮອງເຈົ້າ ແຂວງຫົວພັນ ເພື່ອລາຍງານຈຸດປະສົງຂອງ ການເຄື່ອນໄຫວວຽກງານຢູ່ແຂວງໃນຄັ້ງນີ້, ພ້ອມທັງຈັດກອງປະຊຸມເຮັດວຽກ ຮ່ວມກັບສະພາປະຊາ ຊົນແຂວງ ແລະ ພະແນກການທີ່ກ່ຽວຂ້ອງຂອງແຂວງ ເປັນຕົ້ນ ພະແນກການເງິນ, ແຜນການ ແລະ ການລົງທຶນ, ຊັບພະຍາກອນທຳມະຊາດ ແລະ ສິ່ງແວດລ້ອມ, ພະລັງງານ ແລະ ບໍ່ແຮ່, ກະສິກຳ ແລະ ປ່າໄມ້, ອຸດສາຫະກຳ ແລະ ການຄ້າ ແລະ ພາກສ່ວນກ່ຽວຂ້ອງຈຳນວນໜຶ່ງ ເຂົ້າຮ່ວມ.

ກອງປະຊຸມໄດ້ຮັບຟັງ ການລາຍງານຄວາມຄືບໜ້າ ຂອງການຈັດຕັ້ງປະຕິບັດວຽກງານ ຂຶ້ນທະບຽນອອກໃບຕາດິນ, ສະພາບການຄຸ້ມຄອງການເຊົ່າ ແລະ ສໍາປະທານທີ່ດິນ, ວຽກງານນະໂຍບາຍການອະນຸລັກ ແລະ ການຫລຸດຜ່ອນຜົນກະທົບຕໍ່ຊີວະນາໆພັນ ລວມທັງວຽກງານການຟື້ນຟູປ່າ ແລະ ປູກໄມ້ທົດແທນ ຢູ່ພາຍໃນ ແຂວງຫົວພັນ ບົນພື້ນຖານການແລກປ່ຽນ ຄໍາຄິດຄໍາເຫັນຢ່າງກົງໄປກົງມາ ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ ແລະ ດ້ານອ່ອນຂໍ້ຄົງຄ້າງ ທີ່ຕ້ອງໄດ້ຊອກຫາວິທີແກ້ໄຂ ເພື່ອເຮັດໃຫ້ການຈັດຕັ້ງປະຕິບັດ ວຽກງານດັ່ງກ່າວ ມີປະສິດ ທິພາບ ແລະ ປະສິດທິຜົນດີຂຶ້ນກວ່າເກົ່າ.

ທ່ານ ມະນີໂສ ຊາມຸນຕີ ໄດ້ມີຄໍາເຫັນຊີ້ນໍາໃຫ້ພາກສ່ວນກ່ຽວຂ້ອງ ເອົາໃຈໃສ່ສືບຕໍ່ຈັດຕັ້ງປະຕິບັດ ວຽກງານທີ່ຢູ່ໃນຄວາມຮັບຜິດຊອບຂອງຕົນ ໂດຍສະເພາະ ແມ່ນການອອກໃບຕາດິນພາຍໃນແຂວງ ເພື່ອໃຫ້ສາມາດບັນ ລຸຕາມຄາດໝາຍທີ່ກໍານົດ ໃນແຜນພັດທະນາ ເສດຖະກິດ-ສັງຄົມ 5 ປີຂອງແຂວງ ກໍຄື ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX. ພ້ອມກັນນັ້ນ, ຍັງເນັ້ນໃຫ້ທຸກຂະແໜງການກ່ຽວຂ້ອງ ມີສ່ວນຮ່ວມ ແລະ ເປັນເຈົ້າການໃນການຄຸ້ມຄອງ ແລະ ຕິດຕາມກວດກາການນໍາໃຊ້ທີ່ດິນ ແຕ່ລະປະເພດ ໂດຍສະເພາະ ແມ່ນທີ່ດິນທີ່ຕິດພັນກັບການເຊົ່າ ແລະ ສໍາປະທານ ໃຫ້ມີການຕິດຕາມກວດກາຢ່າງປົກກະຕິ ເພື່ອຮັບປະກັນໃຫ້ແກ່ ການນໍາໃຊ້ທີ່ດິນ ສອດຄ່ອງໄປຕາມກົດໝາຍ ແລະ ລະບຽບການທີ່ກ່ຽວຂ້ອງ ທັງຮັບປະກັນໄດ້ການນໍາໃຊ້ຊັບພະຍາກອນ ທີ່ມີຢູ່ໃຫ້ເກີດປະໂຫຍດສູງສຸດ, ນໍາເອົາຜົນປະໂຫຍດມາສູ່ທ້ອງຖິ່ນ, ສັງຄົມ ແລະ ປະເທດຊາດ ໄດ້ເຕັມເມັດເຕັມໜ່ວຍ.

ຈາກນັ້ນ, ຄະນະຍັງໄດ້ເດີນທາງໄປຢ້ຽມຊົມເຂດ ພື້ນທີ່ຕົວຈິງຂອງບັນດາໂຄງ ການພັດທະນາແຮ່ທາດຈໍານວນໜຶ່ງ ທີ່ຕິດພັນກັບການເຊົ່າ ແລະ ສໍາປະທານທີ່ດິນພາຍໃນແຂວງ.

ຂ່າວ: ສພຊ

KPL