ຂປລ. ກອງປະຊຸມເປີດກວ້າງ ຄົບຄະນະບໍລິຫານງານພັກ ຄັ້ງທີ 8 ສະໄໝທີ V ຂອງອົງຄະນະພັກ ຄະນະໂຄສະນາອົບຮົມສູນກາງພັກ (ຄອສພ) ຈັດຂຶ້ນໃນວັນທີ 30 ທັນວາ 2024 ໂດຍການເປັນປະທານຂອງ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ, ເລຂາຄະນະພັກ, ຫົວໜ້າ ຄອສພ, ປະທານສະພາທິດສະດີສູນກາງພັກ, ມີບັນດາສະຫາຍຄະນະປະຈໍາພັກ, ຄະນະບໍລິຫານງານພັກ, ເລຂາໜ່ວຍພັກ, ຮອງເລຂາໜ່ວຍພັກ ແລະ ຄະນະພັກ ພ້ອມດ້ວຍສະມາຊິກພັກ ທົ່ວ ຄອສພ ເຂົ້າຮ່ວມ.

ສະຫາຍ ລາວປາວຊົງ ນະວົງໄຊ ກຳມະການສູນກາງພັກ, ຮອງເລຂາຄະນະພັກ, ຮອງຫົວໜ້າ ຄອສພ ໄດ້ຜ່ານບົດສະຫລຸບການນໍາພາ-ຊີ້ນໍາຮອບດ້ານຂອງ ຄະນະບໍລິຫານງານພັກ ຄອສພ ປະຈໍາປີ 2024 ແລະ ວາງທິດທາງແຜນການປີ 2025 ຊຶ່ງໄດ້ມີຜົນງານພົ້ນເດັ່ນ ເປັນຕົ້ນ ຄະນະພັກ ຄອສພ ໄດ້ເອົາໃຈໃສ່ກວດກາ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ນໍາພາ-ຊີ້ນໍາວຽກງານໂຄສະນາອົບຮົມ ແລະ ເກັບກຳສະພາບຫາງສຽງສັງຄົມຢູ່ບັນດາແຂວງ ເພື່ອກະຕຸກຊຸກຍູ້ໃຫ້ວຽກງານມີຄວາມຄ່ອງຕົວ ແລະ ມີປະສິດທິຜົນສູງຂຶ້ນ; ຈັດຊຸດຝຶກອົບ ຮົມວຽກງານອົບຮົມ, ວຽກງານໂຄສະນາ, ວຽກງານປາຖະກະຖາ, ວຽກງານຂໍ້ມູນ ຂ່າວສານ ແລະ ອົບຮົມວຽກງານ ອື່ນໆ ຢູ່ບັນດາກະຊວງ/ອົງການ ແລະ ທ້ອງຖິ່ນ; ໂຄສະນາການຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ ຊຶ່ງໄດ້ຂຽນບົດອອກລາຍການ ຢູ່ວິທະຍຸກະຈາຍສຽງແຫ່ງຊາດ; ການໂຄສະນາຂອງໜັງສືພິມປະຊາຊົນ ໄດ້ປັບປຸງທາງດ້ານເນື້ອໃນ ແລະ ຮູບການ ສອດຄ່ອງກັບ ສະພາບເງື່ອນໄຂປັດຈຸບັນ. ພ້ອມນີ້, ກໍໄດ້ຄົ້ນຄວ້າໂຄງການການເມືອງຂອງພັກ, ຄົ້ນຄວ້າທາງດ້ານທິດສະດີ ແລະ ສະຫລຸບພຶດຕິກຳກ່ຽວກັບ ສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມຢູ່ລາວ, ຄົ້ນຄວ້າ ແລະ ຮັບຮອງຜົນຂອງການຄົ້ນຄວ້າ ແນວຄິດ ໄກສອນ ພົມວິຫານ ແລະ ການກະກຽມສະຫລຸບ 40 ປີ ແຫ່ງການປ່ຽນແປງໃໝ່ຢູ່ ສປປ ລາວ, ຄົ້ນຄວ້າເອກະສານຕ່າງໆ ເຊັ່ນ: ເອກະສານອົບຮົມການເມືອງ-ແນວຄິດ ສຳລັບພະນັກງານ, ສະມາຊິກພັກ.

ຈາກນັ້ນ, ບັນດາສະຫາຍທີ່ເຂົ້າຮ່ວມກອງປະຊຸມ ກໍໄດ້ປະກອບຄໍາເຫັນຕໍ່ບົດສະຫລຸບ ການນໍາພາ-ຊີ້ນໍາຮອບດ້ານ ຂອງຄະນະບໍລິຫານງານພັກ ຄອສພ ປະຈໍາປີ 2024 ແລະ ວາງທິດທາງແຜນການປີ 2025 ເພື່ອໃຫ້ມີຄວາມອຸດົມສົມບູນ ຮອບດ້ານ ແລະ ຈະແຈ້ງ ຂຶ້ນຕື່ມອີກ.

ກອງປະຊຸມຄັ້ງນີ້, ຍັງໄດ້ເຜີຍແຜ່ເຊື່ອມຊຶມເອກະສານ ມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 9 ສະໄໝທີ XI, ເຜີຍແຜ່ຄໍາແນະນໍາ ຂອງຄະນະຮັບຜິດຊອບຊີ້ນໍາລະດັບຊາດ ເພື່ອສະເຫລີມສະຫລອງ 3 ວັນປະຫວັດສາດ ວ່າດ້ວຍການສ້າງຂະບວນການ, ແຂ່ງຂັນ ແລະ ຍ້ອງຍໍ ເພື່ອສະເຫລີມສະຫລອງ ວັນສ້າງຕັ້ງພັກປະຊາຊົນລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ  ຕື່ມອີກ.

ໂອກາດນີ້, ສະຫາຍ ຄໍຳພັນ ເຜີຍຍະວົງ ໄດ້ມີຄໍາເຫັນໂອ້ລົມ ຕໍ່ກອງປະຊຸມ ເພື່ອເສີມຂະຫຍາຍຈຸດດີ, ແກ້ໄຂຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ເນັ້ນໜັກວຽກງານປີ 2025 ໃຫ້ແຕ່ລະພາກສ່ວນເອົາໃຈໃສ່ ບັນດາໜ້າວຽກທີ່ຕົນຮັບຜິດຊອບ ເປັນຕົ້ນ ສືບຕໍ່ເອົາໃຈໃສ່ສຶກສາອົບຮົມ ການເມືອງ-ແນວຄິດ ໃຫ້ພະນັກງານ-ສະມາຊິກພັກ ໃນສະພາບ ການທີ່ມີຄວາມຫຍຸ້ງຍາກໃນປັດຈຸບັນ, ສືບຕໍ່ປັບປຸງກົງຈັກການຈັດຕັ້ງ, ການກະກຽມກອງປະຊຸມ 3 ຂັ້ນຂອງຕົນ ແລະ ວຽກງານອື່ນໆອີກຈໍານວນໜຶ່ງ.

ພາບ ສຸກສະຫວັນ

KPL