*ອົງການຈັດຕັ້ງພາກລັດ ຮ່ວມກັບອົງການແຄຣ ນານາຊາດປະຈຳ ສປປ ລາວ ໄດ້ສຸມໃສ່ຫລາຍວຽກງານສຳຄັນ ໃນການພັດທະນາອາຊີບ, ເຕັກນິກການຜະລິດ, ສົ່ງເສີມດ້ານສຸຂະພາບ ແລະ ອື່ນໆ ເພ່ືອພັດທະນາຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນ ຕິດພັນກັບການປົກປັກຮັກສາສິ່ງແວດລ້ອມແບບຍືນຍົງ.

     ທ່ານ ຊຽງລິດ ແກ້ວປະເສີດ ນາຍບ້ານກຸງເກືອຍ ເມືອງຂວາ ແຂວງຜົ້ງສາລີ ໄດ້ໃຫ້ຮູ້ວ່າ: ບ້ານ ກຸງເກືອຍ ເປັນບ້ານຊົນເຜົ່າກຶມມຸ ມີ 46 ຫລັງຄາເຮືອນ, 59 ຄອບຄົວ, 258 ຄົນ, ໃນເມື່ອກ່ອນປະຊາຊົນ ໄດ້ຖືເອົາການຖາງປ່າເຮັດໄຮ່ແບບເລື່ອນລອຍເປັນຫລັກ ແລະ ເຮັດການຜະລິດໂດຍອີງໃສ່ທຳມະຊາດ ຈຶ່ງເຮັດໃຫ້ປະຊາຊົນພາຍໃນບ້ານ ມີຄວາມທຸກຍາກຂາດເຂີນ ເພາະບໍ່ມີອາຊີບທີ່ໝັ້ນຄົງ. ແນວໃດກໍດີພາຍຫລັງອົງການແຄຣນາໆຊາດ ປະຈໍາ ສປປ ລາວ ໄດ້ມີໂຄງການສ້າງຄວາມເຂັ້ມແຂງໃຫ້ແກ່ແມ່ຍິງຊົນເຜົ່າ ເພື່ອປັບໂຕເຂົ້າກັບການປ່ຽນແປງຂອງສະພາບດິນຟ້າອາກາດແບບຍືນຍົງ ແລະ ໂຄງການຄໍ້າປະກັນສະບຽງອາຫານ ໄດ້ເຮັດໃຫ້ຊີວິດການເປັນຢູ່ຂອງປະຊາຊົນບ້ານກຸງເກືອຍ ໄດ້ຮັບພັດທະນາດີຂຶ້ນ ຊຶ່ງໂຄງການດັ່ງກ່າວໄດ້ເລີ່ມມາແຕ່ປີ 2022 ໂດຍມີ 5 ກິດຈະກໍາຫລັກຄື: ປູກກາເຟ, ສົ່ງເສີມການລ້ຽງເຜີ້ງ, ສົ່ງເສີມເຕັກນິກການລ້ຽງສັດ (ສະໜອງແນວພັນຫຍ້າອາຫານສັດ), ກຸ່ມທ້ອນເງິນ, ປັບປຸງລະບົບນ້ຳລິນ ແລະ ຕິດຕັ້ງກົງເຕີນ້ຳ. ພ້ອມນີ້, ທາງໂຄງການຍັງໄດ້ສົ່ງວິຊາການລົງຕິດຕາມຢ່າງໃກ້ຊິດເປັນຕົ້ນຊຸກຍູ້ສົ່ງເສີມເຕັກນິກການຜະລິດ, ວັດຖຸອຸປະກອນ, ແນວພັນ ແລະ ອື່ນໆ ຊ່ຶງຜ່ານການປະຕິບັດໃນໄລຍະຜ່ານມາເຫັນວ່າໄດ້ຮັບຜົນດີພໍສົມຄວນ ແລະ ປະຊາຊົນມີການພັດທະນາເທື່ອລະກ້າວ.

    ຂະນະທີ່ ທ່ານ ນາງ ຮັກ ສີວິໄລ ປະຊາຊົນບ້ານກຸງເກືອຍ ທີ່ເຂົ້າຮ່ວມໂຄງການໃຫ້ຮູ້ວ່າ: ພາຍຫລັງທີ່ໂຄງໄດ້ຍືມມືເຂົ້າມາຊ່ວຍເຫລືອໂດຍສະເພາະໄດ້ຮັບການສົ່ງເສີມດ້ານຄວາມຮູ້ກ່ຽວກັບເຕັກນິກການຜະລິດ, ໄດ້ຮັບການສະໜອງວັດຖຸອຸປະກອນ, ແນວພັນ ແລະ ອື່ນໆ ຈຶ່ງໄດ້ຫັນແນວຄິດເກົ່າຄອງເດີມເປັນຕົ້ນການຜະລິດເອື່ອຍອີງ ທຳມະຊາດມາຜະລິດກະສິກໍາແບບປະສົມ. ໃນນັ້ນ, ມີການປູກຜັກຫອມບົ່ວ, ຜັກກາດ, ລ້ຽງໝູ, ລ້ຽງໄກ່ ແລະ ລ້ຽງປາເປັນສິນຄ້າ. ສຳລັບການຂາຍສິນຄ້າກໍມີແມ່ຄ້າມາຊື້ຢູ່ກັບສວນ, ບາງເທື່ອກໍໄດ້ໄປສົ່ງຕາມຮ້ານອາຫານ ແລະ ຕະຫລາດບ້ານ, ສະເລ່ຍແລ້ວໄດ້ສ້າງລາຍຮັບ 30-36 ລ້ານກີບຕໍ່ປີ. ຜ່ານການບຸກບືນສູ້ຊົນໄປຕາມແນວທາງຂອງພັກ-ລັດຖະບານ ແລະ ໂຄງການດັ່ງກ່າວມາຮອດປັດຈຸບັນ ຊີວິດການເປັນຢູ່ຂອງຄອບຄົວໄດ້ພັດທະນາດີຂຶ້ນເປັນກ້າວໆ ແລະ ມີຄວາມໝັ້ນຄົງຊຶ່ງມີເຮືອນຢູ່ຖາວອນ 1 ຫລັງ, ມີເງິນໃຊ້ພາຍໃນຄອບຄົວ ແລະ ໃຊ້ຈ່າຍໃນເວລາເຈັບເປັນ, ມີທຶນການສຶກສາໄວ້ໃຫ້ລູກຮຽນໜັງສື ແລະ ມີເງິນຝາກທະນາຄານຈຳນວນໜຶ່ງ.

KPL