ຂປລ. ກອງບັນ ຊາການ ປກສ ເມືອງຈັນທະບູລີ ນວ ໄດ້ເອົາໃຈໃສ່ປະຕິບັດວຽກງານ ປະຈຳການ ຕະຫລອດ 24 ຊົ່ວໂມງ ເພື່ອກຽມພ້ອມແກ້ໄຂກໍລະນີສຸກເສີນ ທີ່ອາດຈະເກີດຂຶ້ນ ໄລຍະສະເຫລີມສະຫລອງ ສົ່ງທ້າຍປີເກົ່າປີ 2024 ແລະ ຕ້ອນຮັບປີໃໝ່ ສາກົນ ປີ 2025 ຕິດພັນກັບປີທ່ອງທ່ຽວລາວ ໃຫ້ມີຄວາມ ເບີກບານມ່ວນຊື່ນ, ມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ ໃນທົ່ວສັງຄົມຢູ່ ນະຄອນຫລວງວຽງຈັນ (ນວ) ກໍຄື ເມືອງຈັນທະບູລີ.

ທ່ານ ພັທ ພອນມະນີ ສຸລິນນາພອນ ຮອງຫົວໜ້າກອງບັນຊາການ ປກສ ເມືອງຈັນທະບູລີ ໃຫ້ສໍາພາດຕໍ່ສື່ມວນຊົນ ປກສ ໃນວັນທີ 30 ທັນວາ 2024 ນີ້ວ່າ: ການກະກຽມຄວາມພ້ອມ ໃນການຮັກສາຄວາມສະຫງົບ ກໍຄື ຄວາມເປັນລະບຽບຮຽບຮ້ອຍ ໃນໄລຍະການສະເຫລີມສະຫລອງ ສົ່ງທ້າຍປີເກົ່າ 2024 ແລະ ຕ້ອນຮັບປີໃໝ່ສາກົນ 2025 ພາຍໃນເມືອງຈັນທະບູລີ, ກອງບັນຊາການ ປກສ ເມືອງຈັນທະບູລີ ໄດ້ເອົາໃຈໃສ່ປະຕິບັດ ວຽກງານປະຈຳການ ຕະຫລອດ 24 ຊົ່ວໂມງ ເພື່ອກຽມພ້ອມແກ້ໄຂກໍລະນີສຸກເສີນ ທີ່ອາດຈະເກີດຂຶ້ນ ໂດຍສະເພາະ ແມ່ນແຕ່ງຕັ້ງກໍາລັງ ວິຊາສະເພາະເຮັດວຽກງານປ້ອງ. ໃນນັ້ນ, ໄດ້ແຕ່ງຕັ້ງກໍາລັງ ວິຊາສະເພາະ ລົງປະຈຳຢູ່ບັນດາຈຸດ ກໍຄື ປ້ອມຍາມ, ການຈັດສັນການຈະລາຈອນ, ໄດ້ສົມທົບກັບ ປກສ ກຸ່ມບ້ານ, ອົງການປົກຄອງບ້ານ, ແຕ່ງຕັ້ງກໍາລັງອອກກວດກາ ລາດຕະເວນຕາມເສັ້ນທາງ ຫລື ຈຸດຫລໍ່ແຫລມທີ່ມີຄວາມສ່ຽງ ດ້ານອາຊະຍາກຳ ແລະ ໄດ້ເອົາກຳລັງລົງສົມທົບ ກັບກຳລັງຂອງສູນກາງ ແລະ ປກສ ບັນດາເມືອງ ໃນການປ້ອງກັນຄວາມສະຫງົບຢູ່ສວນສາທາລະນະປະຕູໄຊ ເຊິ່ງເປັນຈຸດລວມສູນທີ່ຂັ້ນເທິງ ໄດ້ກຳນົດເປັນບ່ອນເຕົ້າໂຮມ ຈັດງານສະເຫລີມສະຫລອງສົ່ງ ທ້າຍປີເກົ່າ ປີ 2024 ແລະ ຕ້ອນຮັບປີໃໝ່ສາກົນ ປີ 2025 ຢູ່ ນວ ໃຫ້ມີຄວາມສະຫງົບປອດໄພຮອບດ້ານ.

ໂອກາດນີ້, ທ່ານ ພັທ ພອນມະນີ ສຸລິນນາພອນ ໄດ້ຮຽກຮ້ອງມາຍັງທົ່ວສັງຄົມເອົາໃຈໃສ່ ໃນການເຄົາລົບ, ປະຕິບັດຕາມລັດຖະທຳມະນູນ ແລະ ກົດໝາຍ, ບັນດາຄໍາສັ່ງ ກໍຄື ທິດຊີ້ນໍາຂອງຂັ້ນເທິງ, ໃຫ້ມີສະຕິໃນການໃຊ້ລົດໃຊ້ຖະໜົນ, ເອົາໃຈໃສ່ປະຕິບັດ ຕາມກົດລະບຽບ ການຈະລາຈອນຢ່າງເຂັ້ມງວດ, ປະຕິບັດຕາມ ການແນະນໍາ ຂອງເຈົ້າໜ້າທີ່ຕຳຫລວດ ໃນການຈັດສັນການຈະລາຈອນ, ຖ້າໄດ້ດື່ມສິ່ງມຶນເມົາແລ້ວ ຫ້າມຂັບຂີ່ລົດຢ່າງເດັດຂາດ ເພື່ອຫລີກລ່ຽງບັນຫາອຸບັດເຫດ ຫລື ສິ່ງທີ່ບໍ່ເພິ່ງປາຖະໜາທີ່ອາດຈະເກີດຂຶ້ນ, ຂໍໃຫ້ປະຊາຊົນປົກປັກຮັກສາຊັບສິນ ຂອງຕົນໃຫ້ດີ ເປັນຕົ້ນ ການໄຕ້ທູບທຽນບູຊາ, ກ່ອນອອກຈາກບ້ານ ຕ້ອງໄດ້ກວດກາຟືນໄຟ, ປັກສຽບ ແລະ ອັດໃສ່ກະ ແຈປະຕູເຮືອນໃຫ້ດີ ຫລື ດີແທ້ຄວນມີຄົນເຝົ້າຢູ່ເຮືອນ ເພື່ອຫລີກລ່ຽງ ເຫດການໄຟໄໝ້ ແລະ ເພື່ອປ້ອງກັນບໍ່ໃຫ້ພວກຄົນບໍ່ດີ ໄປງັດແງະເຮືອນຊານເພື່ອລັກຊັບ, ພ້ອມທັງ ເອົາໃຈໃສ່ປົກປັກຮັກສາລົດຂອງຕົນໃຫ້ດີ, ບໍ່ຄວນຈອດປະໄວ້ບ່ອນເປົ່າປ່ຽວ, ເພື່ອຫລີກລ່ຽງຖືກຄົນບໍ່ດີ ທຸບແວ່ນລົດເພື່ອລັກຊັບ, ຕໍ່ກັບລົດຈັກເວລາຈອດລົດ ຕ້ອງໄດ້ໃສ່ກະແຈລັອກລົດ ໃຫ້ແໜ້ນໜາ ເພື່ອປ້ອງກັນບໍ່ໃຫ້ຄົນບໍ່ດີລັກເອົາລົດຂອງທ່ານໄປ.

ຂໍໃຫ້ທຸກຄົນປະກອບສ່ວນເຮັດວຽກງານ ປ້ອງກັນຊາດ-ປ້ອງກັນຄວາມສະຫງົບ, ຊ່ວຍເປັນຫູເປັນຕາໃຫ້ເຈົ້າໜ້າທີ່ຕຳຫລວດ ເພື່ອປ້ອງກັນ, ສະກັດກັ້ນ ແລະ ແກ້ໄຂບັນດາປະກົດການຫຍໍ້ທໍ້ ຢູ່ໃນສັງຄົມໄດ້ທັນເວລາ ແລະ ຮຽກຮ້ອງມາຍັງທຸກຄົນຫ້າມບໍ່ໃຫ້ຄ້າຂາຍ, ຈຸດໝາກກະໂພກ, ບັ້ງໄຟດອກ, ຈຸດໂຄມໄຟລອຍຂຶ້ນຟ້າ ຫລື ກໍໃຫ້ເກີດສຽງແຕກອື່ນໆຢ່າງເດັດຂາດ, ຖ້າຫາກລະເມີດ, ຖ້າເຈົ້າໜ້າທີ່ກວດພົບເຫັນແມ່ນ ຈະໄດ້ດໍາເນີນຕາມລະບຽບການ ແລະ ກົດໝາຍຢ່າງເຂັ້ມງວດ.

ຂ່າວ-ພາບ: ແກ້ວ ອຸເພັດ

KPL