ຂປລ. ກອງປະຊຸມສ່ອງແສງ ວຽກງານຮອບດ້ານ ຂອງບັນດາກົມກອງສື່ກອງທັບ ປະຈຳໄຕມາດ IV ປີ 2024 ແລະ ທິດທາງແຜນການປະຈຳປີ 2025 ຈັດ​ຂຶ້ນວັນທີ 3 ມັງກອນ 2025 ໂດຍການເປັນປະທານຂອງ ສະຫາຍ ພັນເອກ ແກ້ວສຸວັນ ຜາງພິລາວົງ ຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ, ມີຄະນະພັກ-ຄະນະນຳກົມໂຄສະນາອົມຮົມ, ຄະນະພັກ-ຄະນະບັນຊາຈາກ 8 ກົມກອງຂຶ້ນກັບກົມໂຄສະນາອົບຮົມ ເຂົ້າຮ່ວມ.

ໃນກອງປະຊຸມ ຄະນະພັກ-ຄະນະບັນຊາແຕ່ລະກົມກອງ ໄດ້ຜັດປ່ຽນກັນລາຍງານຫຍໍ້ ​ໂດຍໄດ້ຍົກໃຫ້ເຫັນ ສະພາບຈຸດພິເສດຂອງກົມກອງ, ດ້ານດີ, ດ້ານອ່ອນ ແລະ ບາງບົດຮຽນທີ່ຖອດຖອນໄດ້, ໃນໄລຍະ 3 ເດືອນຜ່ານມາ ເຊິ່ງໄດ້ເອົາໃຈໃສ່ນໍາພາ-ຊີ້ນໍາວຽກງານຮອບດ້ານ ທີ່ປີ່ນອ້ອມ 4 ໜ້າທີ່ໃຫຍ່ 26 ແຜນງານ ທີ່ຄະນະພັກ ກະຊວງປ້ອງກັນປະເທດວາງອອກ. ໃນນີ້, ໄດ້ຖືເອົາວຽກງານສຶກສາອົບຮົມ ການເມືອງ-ແນວຄິດ ເປັນພື້ນຖານສຳຄັນ ສອດຫ້ອຍເຂົ້າໃນທຸກຂົງເຂດວຽກງານຂອງກົມກອງ ເຮັດໃຫ້ພະນັກງານ-ນັກຮົບ ມີຄຸນທາດການເມືອງໜັກແໜ້ນ, ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຈູບ ຈ້າວຫ້າວຫັນຕໍ່ໜ້າທີ່ວິຊາສະເພາະ, ສຸມໃສ່ໂຄສະນາ ບັນຫາສໍາຄັນຕ່າງໆ ຂອງຊາດ, ຂອງພັກ-ລັດ ແລະ ຂອງກອງທັບ, ຕິດຕາມການເຄື່ອນໄຫວຂອງການນໍາພັກ-ລັດ, ຄະນະນໍາກະຊວງປ້ອງກັນປະເທດ ແລະ ການເຄື່ອນໄຫວຂອງບັນດາກົມກອງ ໃນຂອບເຂດທົ່ວກະຊວງປ້ອງກັນປະເທດ. ສຳລັວຽກວິຊາສະເພາະໜັງສືພິມ, ວິທະຍຸ, ໂທລະພາບ ແລະ ວາລະສານ ໄດ້ສຸມໃສ່ຈັດຕັ້ງປະຕິບັດໜ້າທີ່ ວິຊາສະເພາະຢ່າງຕັ້ງໜ້າ ໂດຍສະເພາະການເຄື່ອນໄຫວຮັບໃຊ້ ກອງປະຊຸມສຸດຍອດອາຊຽນ ຄັ້ງທີ 44-45, ກອງປະ ຊຸມລັດຖະມົນຕີປ້ອງກັນປະເທດ ອາຊຽນ ຄັ້ງທີ 18 ແລະ ກອງປະຊຸມປິ່ນອ້ອມຕ່າງໆ ທີ່ ສປປ ລາວ ເຮົາເປັນເຈົ້າພາບ, ການຊ້ອມຮົບລາວ-ລັດເຊຍ ພາຍໃຕ້ຄໍາຂວັນ (ໂລກຳບັງ), ການຝຶກຊ້ອມກອບກູ້ໄພພິ ບັດ ລາວ-ຫວຽດນາມ-ກຳປູເຈຍ ແລະ ຂະບວນການອື່ນໆ; ໂຮງພິມກອງທັບ ມີການຈັດພິມໜັງສືພິມລາຍວັນ ແລະ ວາລະສານປະຈຳເດືອນ ອອກສູ່ສັງຄົມໄດ້ທັນເວລາ; ຫໍສະໝຸດກອງທັບໄດ້ບໍລິການ ການອ່ານ, ຢືມປື້ມ ພາຍໃນ ແລະ ນອກສະຖານທີ່, ຈັດລຽງບັນດາປຶ້ມ ໃຫ້ຖືກຕາມ ລະບຽບການ, ເອົາ ໃຈໃສ່ສ້າງພະນັກງານວິຊາການ ໃຫ້ມີຄວາມຊຳນິຊຳນານ ເຂົ້າໃນການບໍລິການວຽກວິຊາສະເພາະ; ຫໍພິພິທະພັນປະຫວັດສາດກອງທັບ ຈັດຕັ້ງຮັບແຂກທັງພາຍໃນ ແລະຕ່າງປະເທດ ເພື່ອເຂົ້າຮັບຊົມໄດ້ເປັນປົກກະຕິ ແລະ ມີບັນຍາກາດ; ກອງສິລະປະກອນກອງທັບ ໄດ້ສຸມໃສ່ຈັດຕັ້ງຝຶກຊ້ອມ ຫັດແອບວິຊາສະເພາະຂອງຕົນ ເພື່ອກະກຽມສະແດງຮັບ ໃຊ້ສັງຄົມບັນດາກົມກອງ ທັງພາຍໃນ ແລະ ຕ່າງປະເທດ ໄດ້ເປັນຢ່າງດີ. ນອກນີ້, ຍັງໄດ້ອອກເຄື່ອນໄຫວສະແດງ ຮັບໃຊ້ສະເຫລີມສະຫລອງ ວັນສ້າງຕັ້ງກອງທັບ ປະຊາຊົນຫວຽດນາມ ຄົບຮອບ 80 ປີຢູ່ ສສຫວຽດນາມ.

ໂອກາດນີ້, ສະຫາຍ ພັນເອກ ແກ້ວສຸວັນ ຜາງພິລາວົງ ໄດ້ມີຄໍາເຫັນຊີ້ນຳຕໍ່ກອງປະຊຸມ, ພ້ອມທັງເນັ້ນໃຫ້ຄະນະພັກ-ຄະນະບັນຊາ ແຕ່ລະກົມກອງ ສືບຕໍ່ອົບຮົມການເມືອງ-ນຳພາແນວຄິດ ໃຫ້ບັນດາພະນັກງານ-ນັກຮົບ ມີຄຸນທາດການເມືອງໜັກແໜ້ນ ອຸ່ນອຽນທຸ່ນທ່ຽງ ເຊື່ອໝັ້ນຕໍ່ການນຳພາຂອງພັກ, ເອົາໃຈໃສ່ປັບປຸງ ກໍ່ສ້າງວຽກງານ ສື່ມວນຊົນຂອງກອງທັບ ໃຫ້ກາຍເປັນກະບອກສຽງອັນແຫລມຄົມ ຂອງກະຊວງປ້ອງກັນປະເທດ, ສືບຕໍ່ປະຕິບັດໜ້າທີ່ ວິຊາສະເພາະຂອງຕົນ ໃຫ້ໄດ້ທັງປະລິມານ ແລະ ຄຸນນະພາບ ເພື່ອເຮັດໃຫ້ວຽກງານມີຜົນສໍາເລັດ ແລະ ມີໝາກຜົນທີ່ດີກວ່າເກົ່າ.

ຂ່າວ: ຄຳອ້າຍ ທອງວັນ

KPL