ຂປລ. ເມືອງວິລະບູລີ ຈັດກອງປະຊຸມໃຫຍ່ຜູ້ແທນ ອົງຄະນະພັກເມືອງຄັ້ງທີ VI ຢ່າງເປັນທາງການ ໃນລະຫວ່າງວັນທີ 6-7 ມັງກອນ 2025 ​ເຊິ່ງເປັນເມືອງທຳອິດ ຂອງແຂວງສະຫວັນນະເຂດ ໂດຍໃຫ້ກຽດເຂົ້າຮ່ວມເປັນປະທານຂອງ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາພັກແຂວງ, ເຈົ້າແຂວງສະຫວັນນະເຂດ, ມີ ສະຫາຍ ນາງ ບຸດສະດີ ທະນະເມືອງ ກຳມະ ການສູນກາງພັກຮອງຫົວໜ້າຄະນະຈັດຕັ້ງສູນກາງພັກ, ມີຫົວໜ້າຄະນະຈັດຄັ້ງແຂວງ, ປະທານກວດກາພັກ-ລັດແຂວງ, ມີ​ຜູ້​ແທນ​ສົມບູນ ຈຳນວນ 161 ສະຫາຍ, ຍິງ 11 ສະຫາຍ ​ແລະ ພາກສ່ວນ​ກ່ຽວຂ້ອງ ​ເຂົ້າ​ຮ່ວມ.

ໃນວາລະປະຊຸມ, ສະຫາຍ ວາລີຍະ ສີຈັນທອງທິບ ກຳມະການພັກແຂວງ, ເລຂາພັກເມືອງ,  ເຈົ້າເມືອງວິລະບຸລີ ໄດ້ກ່າວເປີດກອງປະຊຸມໃຫຍ່ ຄັ້ງທີ VI ອົງຄະນະພັກ ເມືອງວິລະບຸລີ ຢ່າງເປັນທາງການ. ຈາກ​ນັ້ນ, ຫາຍ ທອງໄຫລ ວິໄລພອນ ຮອງເລຂາພັກເມືອງ, ຜູ້ຊີ້ນຳວຽກພັກ-ພະນັກງານ ໄດ້ຜ່ານບົດລາຍງານ ການເມືອງຕໍ່ກອງປະຊຸມ ​ໂດຍໄດ້ຕີລາຄາ ຄືນຜົນຂອງ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງວິລະບຸລີ ຕະຫລອດໄລຍະ 5 ປີທີ່ຜ່ານມາ, ມີທັງກາລະໂອກາດ ແລະ ສິ່ງເອື້ອອຳນວຍ ຄວາມສະດວກ ຫລາຍດ້ານ ເປັນຕົ້ນລະບົບການເມືອງ ມີສະຖຽນລະພາບ, ມີຄວາມໜັກແໜ້ນ, ເຂັ້ມແຂງ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ເປັນເມືອງພື້ນຖານ ການປະຕິວັດ, ປະຊາຊົນມີມູນເຊື້ອອາດຫານ, ເຊື່ອໝັ້ນຕໍ່ການນໍາພາຂອງພັກ, ເປັນເມືອງທີ່ມີຄວາມ ອຸດົມສົມບູນທາງທຳມະຊາດ, ວັດທະນະທຳ, ປະຫວັດສາດ, ມີເສັ້ນທາງເລກ 10 ແລະ 28A ຜ່ານ, ເຊື່ອມຕິດກັບເມືອງອາດສະພອນ, ເຊໂປນ, ບົວລະພາ ແລະ ໂຄງການຂຸດຄົ້ນຄຳ-ທອງລະດັບໃຫຍ່ຂອງຊາດຕັ້ງຢູ່.

ສະຫາຍ ໄພມະນີ ວົງໄຊຄຳ ຄະນະປະຈຳພັກເມືອງ, ຮອງເຈົ້າເມືອງໄດ້ລາຍງານ ກ່ຽວກັບແຜນພັດທະນາ ເສດຖະກິດ-ສັງຄົມ ຂອງເມືອງວ່າ: ການຜັນຂະຫຍາຍ ມະຕິ ກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງ ໃນໄລຍະຜ່ານມາ ເຫັນວ່າ ໂຄງປະກອບທາງດ້ານເສດຖະກິດ ໄດ້ດຳເນີນໄປຖືກທິດ ແລະ ຂະຫຍາຍຕົວຕໍ່ເນື່ອງສະເລ່ຍ 7,6.% ຕໍ່ປີ, ລວມຍອດຜະລິດຕະພັນພາຍໃນ (GDP) ບັນລຸ 2 ຕື້ກວ່າກີບ, ສະເລ່ຍຕໍ່ຫົວຄົນ 10,48 ລ້ານກີບ/ຄົນ/ປີ ຫລື ເທົ່າກັບ 1.219 ໂດລາສະະລັດ/ຄົນ/ປີ, ທົ່ວເມືອງສາມາດຜະລິດ ເຂົ້າເປືອກໄດ້ 92.000 ໂຕນ, ເນື້ອທີ່ປູກເຂົ້າແຕ່ລະປີ 5.450 ເຮັກຕາ, ສະເລ່ຍໃສ່ຫົວຄົນຜູ້ໜຶ່ງ ໄດ້ຮັບເຂົ້າເປືອກ 390 ກິໂລກຣາມ/ຄົນ/ປີ, ປູກພືດສະບຽງອາຫານບັນລຸ 600.000 ກວ່າໂຕນ, ເນື້ອທີ່ປູກໄມ້ອຸດສາຫະກຳເພີ່ມຂຶ້ນ 3.690 ກວ່າເຮັກຕາ, ການລ້ຽງສັດ ແລະ ການປະມົງເພີ່ມຂຶ້ນສະເລ່ຍ 21%.

ກອງປະຊຸມຄັ້ງນີ້, ບັນດາຜູ້ແທນກອງປະຊຸມ ໄດ້ປະກອບຄຳເຫັນຕໍ່ ກອງປະຊຸມຢ່າງກົງໄປກົງມາ. ໃນນີ້, ມີການປະກອບຄຳເຫັນ ຈາກຕາງໜ້າຂົງເຂດ ປກຊ-ປກສ, ຂົງເຂດ ເສດຖະກິດ, ຂົງເຂດວັດທະນະທຳ-ສັງຄົມ, ຕາງໜ້າໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຄອບຄົວຄົວແບບປູກກ້ວຍ, ກຸ່ມສະຫະກອນປູກໜາກກ້ຽງ, ຕາງໜ້າເມືອງເຊໂປນ, ເມືອງໄຊບົວທອງ ໄດ້ປະກອບຄຳເຫັນຕໍ່ກອງປະຊຸມ.

KPL