ຂປລ. ງານວາງສະແດງການສຶກສາຈີນ-ອາຊຽນ ຄັ້ງທີ III ປະຈໍາປີ 2024 ຈັດຂຶ້ນໃນວັນທີ 7 ທັນວາ 2024 ຜ່ານມາ ທີ່ສະຖາບັນຂົງຈື, ມະຫາວິທະຍາໄລແຫ່ງຊາດ (ມຊ) ໂດຍມີທ່ານ ສໍາລານ ພັນຄະວົງ ຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ) ພ້ອມດ້ວຍບັນດາຄະນະບໍດີ, ຜູ້ອໍານວຍການສະຖາບັນ, ຫົວໜ້າຫ້ອງການ ແລະ ຄະນະ ຈາກສະຖາບັນ ການສຶກສາຊັ້ນສູງ ຂອງ ສປ ຈີນ, ຄູ-ອາຈານ ແລະ ນັກສຶກສາເຂົ້າຮ່ວມ.

ໃນໂອກາດນີ້, ທ່ານ ສິນທະວອນ ດາລາວົງ ຮອງອະທິການບໍດີ ມຊ ໄດ້ກ່າວວ່າ: ງານໃນຄັ້ງນີ້, ມີຄວາມໝາຍສຳຄັນ ເປັນການເປີດໂອກາດໃຫ້ນັກສຶກສາ ໄດ້ມີໂອກາດເຂົ້າໃຈສະພາບ ການສຶກສາ ຂອງ ສປ ຈີນ ທັງເປັນການຊອກໂອກາດໄປຮຽນຕໍ່ ພາຍຫລັງຮຽນຈົບການສຶກສາຂອງຕົນ, ມຊ ໄດ້ເຊັນສັນຍາ ກັບສະຖາບັນການສຶກສາຊັ້ນສູງ ຂອງ ສປ ຈີນ 76 ແຫ່ງ ແລະ ໄດ້ມີການແລກປ່ຽນຮ່ວມມື ລະຫວ່າງນັກຮຽນ-ນັກສຶກສາ, ຄູ-ອາຈານ ເຮັດການຄົ້ນຄວ້າຮ່ວມກັນ ແລະ ເປີດກອງປະຊຸມສຳມະນາ ວິທະຍາສາດ ລະດັບສາກົນຮ່ວມກັນຫລາຍຄັ້ງ ແລະ ຫວັງວ່າຜ່ານງານວາງສະແດງການສຶກສາຄັ້ງນີ້, ຈະເຮັດໃຫ້ ມຊ ແລະ ສະຖາບັນການສຶກສາຊັ້ນສູງຂອງ ສປ ຈີນ ທີ່ມາວາງສະແດງໃນຄັ້ງນີ້, ຈະໄດ້ມີໂອກາດຮ່ວມມືກັນ ໃນຂົງເຂດ ການແລກປ່ຽນການສຶກສາ, ການຄົ້ນຄວ້າວິທະຍາສາດຕ່າງໆຮ່ວມກັນໃນອະນາຄົດ.

ທ່ານ ສົມພອນ ສອນດາລາ ຫົວໜ້າພະແນກ ສຶກສາທິການ ແລະ ກິລາ ນະຄອນຫລວງວຽງຈັນ, ກະຊວງສຶກສາທິການ ແລະ ກິລາ ໄດ້ກ່າວວ່າ: ຜ່ານງານວາງສະແດງ ການສຶກສາ ຈີນ-ອາຊຽນ ຄັ້ງນີ້, ຈະເຮັດໃຫ້ສະຖາບັນ ການສຶກສາຊັ້ນສູງຂອງລາວ ເວົ້າລວມ ເວົ້າສະເພາະ ມຊ ຈະມີການຮ່ວມມືຫລາຍຂຶ້ນ ນໍາສະຖາບັນການສຶກສາຊັ້ນສູງ ຂອງ ສປ ຈີນ ພ້ອມທັງເປັນ ການເພີ່ມບົດບາດຕົນເອງ ໃນເວທີສາກົນ. ປັດຈຸບັນການສຶກສາຂອງ ສປ ຈີນ ໄດ້ພັດທະນາຢ່າງກ້າວກະໂດດ ໂດຍສະເພາະ ການນໍາໃຊ້ເຕັກໂນໂລຊີໃໝ່ໆ ການນໍາໃຊ້ AI ເຂົ້າມາຮັບໃຊ້ໃນ ວຽກງານການຮຽນ-ການສອນ ແລະ ການສ້າງໃຫ້ນັກຮຽນນັກສຶກສາ ໄດ້ມີຈິນຕະນາການໃໝ່ ເພື່ອສ້າງນະວັດຕະກໍາ ຕາມທິດການພັດທະນາ ການສຶກສາສູ່ອະນາຄົດ ຂອງ ສປ ຈີນ.

KPL