ຂປລ
ອົງການວັດຖຸ ບູຮານແຫ່ງອິດສະຣາແອນ ຮ່ວມກັບມະຫາວິທະຍາໄລ ອິດສະຣາແອນ 3 ແຫ່ງ ລາຍງານວ່າ: ຄະນະນັກບູຮານ ຄະດີອິດສະຣາແອນ ຄົ້ນພົບສະຖານທີ່ສຳລັບ ປະກອບພິທີກຳ ຈາກຍຸດກ່ອນປະຫວັດສາດ ຊຶ່ງມີອາຍຸ 35.000 ປີ
ຂປລ.ສຳນກັຂ່າວຊິນຮວາຂອງ ສປຈີນ, ເມື່ອບໍ່ດົນມານີ້, ອົງການວັດຖຸ ບູຮານແຫ່ງອິດສະຣາແອນ ຮ່ວມກັບມະຫາວິທະຍາໄລ ອິດສະຣາແອນ 3 ແຫ່ງ ລາຍງານວ່າ: ຄະນະນັກບູຮານ ຄະດີອິດສະຣາແອນ ຄົ້ນພົບສະຖານທີ່ສຳລັບ ປະກອບພິທີກຳ ຈາກຍຸດກ່ອນປະຫວັດສາດ ຊຶ່ງມີອາຍຸ 35.000 ປີ ທີ່ຖໍ້າມາໂນດ ໃນພາກພື້ນ ກາລິລິຕາເວັນຕົກ. ໜ່ວຍງານຄົ້ນຄວ້າ ອະທິບາຍໃນວາລະສານ ວິຊາການ ພີເອັນເອເອສ (PNAS)ວ່າ: ແຫລ່ງບູຮານຄະດີດັ່ງກ່າວ ເປັນໜຶ່ງໃນ ສະຖານທີ່ປະກອບ ພິທີກຳທາງສາສະໜາ ແບບຊຸມຊົນເກົ່າແກ່ທີ່ສຸດໃນໂລກ ແລະ ເປັນແຫ່ງທຳອິດໃນພື້ນທີ່ ລິແວນບູຮານ , ຊຶ່ງສະທ້ອນເຖິງວິວັດທະນາການ ຈາກການເຮັດກິດ ຈະກຳປະກອບພິທີ ທາງສາສະໜາ ແບບສ່ວນບຸກຄົນ ສູ່ການປະກອບພິທີ ທາງສາສະໜາ ຢ່າງເປັນລະບົບ, ພ້ອມທັງໃຫ້ຂໍ້ມູນເຊິງເລິກກ່ຽວກັບ ຊີວິດທາງຈິດວິນຍານຂອງຊົນເຜົ່າລ່າສັດ ແລະ ເກັບຂອງປ່າໃນຍຸດຫີນເກົ່າ ທີ່ໃຫ້ຄວາມສຳຄັນກັບບົດບາດ ຂອງພິທີກຳ ແລະ ສັນຍາລັກໃນການສ້າງຄວາມເຊື່ອມໂຍງທາງສັງຄົມ.ໂຄງສ້າງສຳລັບ ປະກອບພິທີກຳແຫ່ງນີ້ ອ້ອມຮອບດ້ວຍຫີນງອກ, ໂດຍປະກອບດ້ວຍຫີນທີ່ມີພາບແກະສະລັກຄ້າຍກະດອງເຕົ່າ ອາດໃຊ້ເປັນສັນຍາລັກ ຂອງການເກີດໃໝ່ ແລະ ການເລີ່ມຕົ້ນໃໝ່,ພ້ອມທັງຊາກເຖົ່າຖ່ານ ທີ່ຊີ້ແຈງວ່າ ເປັນການໃຊ້ໄຟ ເພື່ອສ່ອງສະຫວ່າງ ແລະ ຄຸນສົມບັດ ສະທ້ອນຕາມທຳມະຊາດ ຂອງແຫລ່ງບູຮານນີ້ ຊີ້ແຈງວ່າຖືກໃຊ້ເພື່ອກິດຈະກຳ ຂອງຊຸມຊົນ./.
KPL
