ຂປລ
ສສ ຫວຽດນາມ ມີຄວາມສາມາດ ບົ່ມຊ້ອນ ກາຍເປັນປະເທດ ມະຫາອຳນາດ ກ່ຽວກັບ ການຄ້າເອເລັກໂຕນິກ ໃນພາກພື້ນ ອາຊີ ຕາເວັນອອກ ສ່ຽງໃຕ້(ອາຊຽນ)
ຂປລ.ວິທະຍຸ ກະຈາຍສຽງ ຫວຽດນາມ, ເມື່ອບໍ່ດົນມານີ້, ເວັບໄຊ ຂອງກຸ່ມບໍລິສັດ ຄົ້ນຄວ້າ ຕະຫລາດ (IMARC)ໄດ້ປະກາດ ບົດລາຍງານ ໃຫ້ຂໍ້ສັງເກດວ່າ: ສສ ຫວຽດນາມ ມີຄວາມສາມາດ ບົ່ມຊ້ອນ ກາຍເປັນປະເທດ ມະຫາອຳນາດ ກ່ຽວກັບ ການຄ້າເອເລັກໂຕນິກ ໃນພາກພື້ນ ອາຊີ ຕາເວັນອອກ ສ່ຽງໃຕ້(ອາຊຽນ) , ເມື່ອຂະແໜງການນີ້ ພວມມີການເຕີບໂຕ ຢ່າງແຮງ ແລະ ປະກອບສ່ວນ ຊຸກຍູ້ການຫັນ ເສດຖະກິດ ແຫ່ງຊາດ. ຕາມ IMARC ແລ້ວ, ດ້ວຍບັນດາເງື່ອນໄຂ ນິຕິກຳ ທີ່ອຳນວຍ ຄວາມສະດວກ, ການລົງທຶນຕ່າງປະເທດ ທີ່ເປີດກວ້າງ ແລະ ຄວາມສາມາດໃນການສຳຜັດກັບ ອິນເຕີເນັດ ໄດ້ຮັບການປັບປຸງ, ລະບົບ ນິເວດ ການຄ້າ ເອເລັກໂຕນິກຂອງ ສສ ຫວຽດນາມ ກຽມພ້ອມ ພັດທະນາ ແບບຍືນຍົງ, ຫັນຫວຽດນາມ ກາຍເປັນ ປະເທດ ມະຫາອຳນາດ ໃນພາກພື້ນໃນພື້ນຖານ ເສດຖະກິດ ດີຈີຕອນ. ການຄ້າ ເອເລັກໂຕນິກ ກວມເອົາກ່ວາ 60% ພື້ນຖານ ເສດຖະກິດ ດີຈີຕອນຂອງ ສສ ຫວຽດນາມ. ຕາມການຄາດຄະເນຂອງ IMARC ແລ້ວ, ຂະແໜງ ການຄ້າ ເອເລັກໂຕນິກຂອງ ສສ ຫວຽດນາມ ຄາດວ່າ ຈະບັນລຸຄວາມໄວ ໃນການເຕີບໂຕ ປະຈຳປີ ຢູ່ລະດັບ 28% ໃນໄລຍະ 2025 – 2033. ອະທິບາຍກ່ຽວກັບ ຄວາມສາມາດ ບົ່ມຊ້ອນ ທີ່ ສສ ຫວຽດນາມ ຈະນຳໜ້າ ການປະຕິວັດ ການຄ້າ ເອເລັກໂຕນິກຢູ່ ອາຊີ ຕາເວັນອອກ ສ່ຽງໃຕ້, IMARC ຖືວ່າ ສສ ຫວຽດນາມ ໄດ້ຮັບ ການຢັ້ງຢືນ ແມ່ນໜຶ່ງ ໃນບັນດາສະຖານທີ່ມີສະພາບແວດລ້ອມ ທາງດ້ານນິຕິກຳ ທີ່ອຳນວຍ ຄວາມສະດວກ ດີທີ່ສຸດ ໃຫ້ແກ່ ການຄ້າ ເອເລັກໂຕນິກ ໃນອາຊຽນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
