ຂປລ. ແຫລ່ງຂ່າວຈາກ ແຂວງຄຳມ່ວນ ໃຫ້ຮູ້ວ່າ: ທ່ານ ນາງ ດັງ ຖິ ຮາຍ ເຕິມ ກົງສູນໃຫຍ່ ສສ ຫວຽດນາມ ປະຈໍາແຂວງສະຫວັນນະເຂດ ພ້ອມດ້ວຍຄະນະ ເຂົ້າອວຍພອນການນໍາແຂວງຄໍາມ່ວນ ເນື່ອງໃນໂອກາດ ວັນສະຖາປະນາ ສປປ ລາວ ຄົບຮອບ 49 ປີ (2/12/1975-2/12/2024) ໃນວັນທີ 26 ພະຈິກ 2024 ໂດຍການຕ້ອນຮັບຂອງ ທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນ, ມີພະແນກການກ່ຽວຂ້ອງ ແລະ ສະມາຄົມຫວຽດນາມ ແຂວງຄໍາມ່ວນ ເຂົ້າຮ່ວມ.   ໂອກາດນີ້, ທ່ານ ວັນໄຊ ພອງສະຫວັນ ໄດ້ສະແດງຄວາມຂອບໃຈມາຍັງ ທ່ານ ນາງ ດັງ ຖິ ຮາຍ ເຕິມ ທີ່ໄດ້ສະຫລະເວລາ ນໍາເອົາຄໍາເວົ້າອັນຈົບງາມ ມາອວຍພອນຂ້າພະເຈົ້າ ພ້ອມດ້ວຍການນໍາ ແລະ ປະຊາຊົນບັນດາເຜົ່າແຂວງຄໍາມ່ວນ ໃນໂອກາດວັນຊາດທີ 2 ທັນວາ ໃກ້ຈະມາເຖິງນີ້ ຊຶ່ງເປັນກຳລັງໃຈ ໃຫ້ພວກເຮົາໄດ້ສືບຕໍ່ເຮັດໜ້າທີ່ເຄື່ອນໄຫວນໍາພາວຽກງານ, ນັບແຕ່ມື້ສອງພັກ-ສອງລັດ ກໍຄືປະຊາຊົນສອງຊາດ ລາວ-ຫວຽດນາມ ໄດ້ມີການພົວພັນຮ່ວມມືນໍາກັນ ໂດຍສະເພາະ ໃນໄລຍະ 49 ປີ ແຫ່ງການເຕີບໃຫຍ່ຂະຫຍາຍຕົວ ຂອງການພົວພັນຮ່ວມມືລະຫວ່າງ ລາວ-ຫວຽດນາມ, ຫວຽດນາມ-ລາວ ເຫັນໄດ້ວ່າການຮ່ວມມືນັບມື້ນັບເຂົ້າສູ່ລ່ວງເລິກ, ມີປະສິດທິພາບ ແລະ ປະສິດທິຜົນ, ເປັນແບບຢ່າງທີ່ດີຂອງການພົວພັນຮ່ວມມືສາກົນ. ພ້ອມທັງແຈ້ງຕໍ່ທ່ານກົງສູນຊາບກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ ໃນໄລຍະ 10 ເດືອນຜ່ານມາ, ກະກຽມການດໍາເນີນກອງປະຊຸມໃຫຍ່ 3 ຂັ້ນຂອງພັກ ຕະຫລອດເຖິງການພົວພັນຮ່ວມມື ກັບບັນດາແຂວງຕ່າງໆ ຂອງ ສສ ຫວຽດນາມ, ເວົ້າສະເພາະ ກໍຄືແຂວງແຮກສ່ຽວ ແລະ ແຂວງໃກ້ຄຽງ ແມ່ນໄດ້ສືບຕໍ່ຂະຫຍາຍເນື້ອໃນບົດບັນທຶກຊ່ວຍຈໍາ ທີ່ໄດ້ລົງນາມຮ່ວມກັນ ໂດຍໄດ້ຜັດປ່ຽນກັນເດີນທາງໄປ-ມາ ຫາສູ່ເຊິ່ງກັນ ແລະ ກັນ ເພື່ອພົບປະແລກປ່ຽນບົດຮຽນ ລວມເຖິງການມາລົງທຶນໃນຂະແໜງ ການຕ່າງໆ ແລະ ແຜນຮ່ວມມືກັບ ສສ ຫວຽດນາມໃນຕໍ່ໜ້າ.     ໃນໂອກາດນີ້, ທ່ານກົງສູນໃຫຍ່  ສສ ຫວຽດນາມ ປະຈໍາແຂວງສະຫວັນນະເຂດ ກໍໄດ້ກ່າວສະແດງຄວາມຂອບໃຈ ມາຍັງການນໍາແຂວງຄໍາມ່ວນ ທີ່ໄດ້ໃຫ້ການຊ່ວຍເຫລືອເບິ່ງແຍງປະຊາຊົນ ແລະ ພາກສ່ວນທຸລະກິດຂອງຫວຽດນາມ ທີ່ມາດຳລົງຊີວິດ ແລະ ເຄື່ອນໄຫວຢູ່ແຂວງຄໍາມ່ວນຕະຫລອດມາ ພ້ອມນີ້ໃນນາມກົງສູນ ສສ ຫວຽດນາມ ຈະຊ່ວຍເປັນຂົວຕໍ່ໃຫ້ບັນດາແຂວງຂອງ ສປປ ລາວ ແລະ ຫວຽດນາມ ໄດ້ມີການພົວພັນຮ່ວມມືກັນຫລາຍຂຶ້ນ  ລວມເຖິງການສ້າງເງື່ອນໄຂໃຫ້ບັນດາຂົງເຂດ, ຂະແໜງການຕ່າງໆ ໄດ້ພົບປະແລກປ່ຽນບົດຮຽນໃນດ້ານວຽກງານຕ່າງໆ ເພື່ອເສີມຂະຫຍາຍສາຍພົວພັນ ລະຫວ່າງສອງພັກ, ສອງລັດ ກໍຄືແຕ່ລະທ້ອງຖິ່ນ ສອງປະເທດ ໃຫ້ຈະເລີນງອກງາມຍິ່ງຂຶ້ນ.

KPL