*ມາພໍ້ກັນອີກເຊັ່ນເຄີຍກັບ“ຄໍລຳ້ສ້າງເສດຖະກິດເອກະລາດ ເປັນເຈົ້າຕົນເອງ ໃນໄລຍະໃໝ່” ຂອງໜັງສືພິມປະເທດລາວອີກເທື່ອໜຶ່ງ, ເຊິ່ງມາສະບັບນີ້  ຂໍສະເໜີຫົວຂໍ້ກ່ຽວກັບ “ເພີ່ມທະວີແກ້ໄຂຄວາມ ຫຍຸ້ງຍາກດ້ານເສດຖະກິດ-ການເງິນ” ຕື່ມອີກ. ຢູ່ໃນມະຕິດັ່ງກ່າວ ໄດ້ຊີ້ໃຫ້ເຫັນວ່າ: ການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ໄປພ້ອມກັບການປະສານຢ່າງກົມກຽວນັ້ນ, ຕ້ອງໄດ້ຍູ້ແຮງພາກການຜະລິດ, ການບໍລິການເພື່ອຕອບສະໜອງຄວາມຕ້ອງການຊົມໃຊ້ພາຍໃນ ແລະ ສ້າງຄວາມເຂັ້ມແຂງຂອງຖານລາຍຮັບຢູ່ພາຍໃນ ກັບການ ເພີ່ມທະວີປະສິດທິພາບໃນການ ຄຸ້ມຄອງລາຍຮັບ ແລະ ການດໍາ ເນີນມາດຕະການປະຢັດຢ່າງຈິງ ຈັງ ໂດຍການເຂົ້າຮ່ວມ ແລະ ເປັນ ເຈົ້າການຂອງທຸກພາກສ່ວນໃນ ສັງຄົມ.

    ພ້ອມນີ້, ຕ້ອງທົບທວນຄືນຍຸດທະສາດກໍ່ຄືການພັດທະນາໂຄງປະກອບເສດຖະກິດເຂດແຄວ້ນ ເພື່ອກະຈາຍຄວາມໄດ້ປຽບດ້ານທີ່ຕັ້ງ, ທ່າແຮງຂອງແຕ່ລະທ້ອງຖິ່ນ ເປັນກໍາລັງຂັບເຄື່ອນໃຫ້ແກ່ການພັດທະນາປະເທດຊາດ. ຕ້ອງສືບຕໍ່ຍູ້ແຮງການຄ້າຢູ່ປະເທດເຮົາເປັນຕ່ອງໂສ້ຕົ້ນຕໍຂອງລະບົບເສດຖະກິດ, ກະຕຸ້ນການເຕີບໂຕທາງດ້ານເສດຖະກິດໃຫ້ແຂງແຮງຕິດພັນກັບການພັດທະນາອຸດສາຫະກໍາປຸງແຕ່ງ ແຕ່ເນັ້ນໄປສູ່ການຫັນເປັນອຸດສາຫະກຳ ແລະ ທັນສະໄໝໃຫ້ກາຍເປັນສາຍພານຂອງການຜະລິດທີ່ໜຽວແໜ້ນ ແນໃສ່ເຮັດໃຫ້ການພັດທະນາເສດຖະກິດແຫ່ງຊາດມີກຳລັງແຮງ ທີ່ນັບມື້ສ້າງໄດ້ໂຄງປະກອບຂະແໜງເສດຖະກິດທີ່ເຂັ້ມແຂງຈາກສູນກາງ ໄປສູ່ເສດຖະກິດເຂດແຄວ້ນ ໄດ້ຢ່າງສະໝໍ່າສະເໝີ, ທັງເປີດກວ້າງ ໄດ້ການຜະລິດສິນຄ້າ, ເຮັດໃຫ້ເປັນແມ່ແຮງຂອງການສ້າງຖານລາຍຮັບນັບມື້ນັບຫລາຍຂຶ້ນ ແລະ ໄປຕາມທິດສັງຄົມນິຍົມ.

   ພ້ອມທັງປັບປຸງໂຄງສ້າງດ້ານງົບປະມານແຫ່ງລັດຄຸ້ມຄອງໜ້ີສາທາລະນະ, ເພີ່ມທະວີ ແລະ ການສະກັດກັ້ນ ບໍ່ໃຫ້ເກີດມີໜີ້ສິນເກີນການຄວບຄຸມ ແລະ ເປັນເຈົ້າການດຸ່ນດ່ຽງໜ້ີສິນຢ່າງມີວິທະຍາສາດ, ຖືກຕາມຫລັກເສດຖະສາດເພື່ອ ແນໃສ່ຮັບປະກັນໃຫ້ພື້ນຖານລະບົບການເງິນແຫ່ງຊາດ ມີຄວາມໝັ້ນຄົງ, ຍືນຍົງ, ຮັກສາສະຖຽນ ລະພາບເສດຖະກິດມະຫາພາກ; ສຸມໃສ່ສ້າງໃຫ້ໄດ້ຄວາມເປັນເຈົ້າດ້ານການເງິນ ໂດຍສະເພາະການເກັບລາຍຮັບ, ຄຸ້ມຄອງລາຍຈ່າຍ, ການສະສົມໃຫ້ຄັງເງິນມີຄວາມເຕີບໃຫຍ່, ເຂັ້ມແຂງ, ສ້າງພື້ນຖານ ເຮັດໃຫ້ງົບປະມານແຫ່ງລັດ ເຕີບໃຫຍ່ຂະຫຍາຍຕົວ ແລະ ເຂັ້ມແຂງ, ສາມາດສ້າງມູນຄ່າເພີ່ມ ເພື່ອຕ່ໍຍອດທຶນຮອນໃຫ້ອອກສູ່ການພັດທະນາທີ່ມີປະສິດທິຜົນ. ເພີ່ມທະວີການລະດົມ, ຄຸ້ມຄອງ, ຈັດສັນ ແລະ ນໍາໃຊ້ແຫລ່ງທຶນຢ່າງມີປະສິດ ທິຜົນ, ຊຸກຍູ້ການພັດທະນາເສດ ຖະກິດ ແລະ ແກ້ໄຂບັນຫາສັງຄົມ, ການພັດທະນາຄົນ, ການປະຕິບັດ ນະໂຍບາຍດ້ານສັງຄົມ, ເພີ່ມທະ ວີສະຫວັດດີການສັງຄົມ, ປົກປັກ ຮັກສາສິ່ງແວດລ້ອມ, ຮັບມືກັບໄພພິບັດ, ຮັບປະກັນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການພົວພັນຮ່ວມມືກັບຕ່າງປະເທດຢ່າງເປັນເຈົ້າການ.    

   ນອກຈາກທີ່ກ່າວມານັ້ນແລ້ວ, ຕ້ອງໄດ້ປັບປຸງກົນໄກການເຄື່ອນ ໄຫວຂອງທະນາຄານ ເພື່ອສ້າງຄວາມເຂັ້ມແຂງໃຫ້ແກ່ການຄຸ້ມຄອງເງິນຕາ, ວຽກງານສິນເຊື່ອເພື່ອຊຸກຍູ້ການຜະລິດ ແລະ ການບໍລິການ, ການສົ່ງເສີມວິສາຫະກິດຂະໜາດນ້ອຍ ແລະ ຂະໜາດກາງ, ກຸ່ມຜະລິດ ແລະ ສະຫະກອນ. ສຸມໃສ່ສ້າງໃຫ້ໄດ້ຄວາມເປັນເຈົ້າດ້ານວຽກງານເງິນຕາແຫ່ງຊາດ ເຊິ່ງເປັນອົງປະກອບພື້ນຖານສໍາຄັນຂອງຄວາມເປັນເຈົ້າທີ່ແທ້ຈິງ ໃນການສ້າງເສດຖະກິດ ເອກະລາດ ເປັນເຈົ້າຕົນເອງຄື: ຍົກສູງການຖືຄອງເງິນກີບ, ຄຸ້ມຄອງການຖືຄອງ ແລະ ໃຊ້ຈ່າຍທີ່ຂາດການຄຸ້ມຄອງເງິນຕາຕ່າງປະເທດໃຫ້ເຄັ່ງຄັດ, ຮັດກຸມເຂົ້າຕື່ມ, ກະຈາຍຄວາມສ່ຽງດ້ານການນໍາໃຊ້ເງິນຕາຕ່າງປະເທດ ເພື່ອບໍ່ໃຫ້ສະກຸນເງິນໃດໜຶ່ງຜູກມັດ, ຜູກຂາດ; ເຮັດໃຫ້ລະບົບການເງິນ-ເງິນຕາຂອງປະເທດເຮົາກາຍເປັນການເງິນ ເອກະລາດ ເປັນເຈົ້າຕົນເອງ, ເຮັດໃຫ້ລະບົບທະນາຄານເປັນແຫລ່ງສໍາຄັນໃນການສະສົມທຶນ ໂດຍສ້າງຄວາມເຕີບໃຫຍ່ຂອງຄັງສຳຮອງເງິນຕາຕ່າງປະເທດ ເພື່ອຄໍ້າຈູນລະບົບເສດຖະກິດ- ການເງິນຂອງປະເທດເຮົາ. ພໍ້ກັນໃໝ່ສະບັບໜ້າ. 

ໂດຍ: ຢາຕ່ົງ

KPL