ຂປລ. ລັດຖະບານແຫ່ງ ສປປ ລາວ ຮ່ວມກັບ ລັດຖະບານອົດສະຕຣາລີ ແລະ ອົງການອຸຍນີເຊັບ ມອບອຸປະກອນຊ່ວຍເຫລືອ ສຳລັບເດັກພິການ 239 ຄົນ ແລະ ຄອບຄົວພວກເຂົາ ຢູ່ເມືອງແປກ, ເມືອງພູກູດ ແລະ ເມືອງຄູນ ແຂວງຊຽງຂວາງ ໃນວັນທີ 25 ພະຈິກ 2024 ຜ່ານມາ, ຊຶ່ງປະກອບມີ: ລໍ້ນັ່ງແບບພິເສດ, ອຸປະກອນຊ່ວຍຢືນ, ເກີບປັບລະດັບ ແລະ ອຸປະກອນການຮຽນ.

ການຊ່ວຍເຫລືອໃນຄັ້ງນີ້ ເປັນສ່ວນໜຶ່ງຂອງໂຄງການອຸດໜຸນເງິນສົດ ໃຫ້ເດັກພິການ ປັດຈຸບັນ ໄດ້ໃຫ້ການຊ່ວຍເຫລືອເດັກ 496 ຄົນ ແລະ 464 ຄອບຄົວ ໂດຍຜ່ານການສະໜອງເງິນຊ່ວຍເຫລືອລ້າເປັນລາຍເດືອນ ແລະ ອຸປະກອນການຊ່ວຍເຫລືອທີ່ຈໍາເປັນອື່ນໆ, ຊຶ່ງອຸປະກອນເຫລົ່ານີ້ ມີຄວາມສຳຄັນຫລາຍ ຕໍ່ການອຳນວຍຄວາມສະດວກ ແກ່ເດັກພິການ ເພື່ອໃຫ້ພວກເຂົາສາມາດເຂົ້າເຖິງການສຶກສາ, ການດູແລສຸຂະພາບ ແລະ ກິດຈະກຳພາຍໃນຊຸມຊົນ.

ທ່ານ ລີປາວ ຢາງ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ຍົກໃຫ້ເຫັນເຖິງຄວາມເອົາໃຈໃສ່ຂອງລັດຖະບານ ໃນການສະໜັບສະໜູນເດັກທຸກໆຄົນທົ່ວປະເທດ. ຊຶ່ງການຊ່ວຍເຫລືອຄັ້ງນີ້ ເປັນການພິສູດ ເຖິງຄວາມຕັ້ງໃຈທີ່ບໍ່ເສື່ອມຖອຍຂອງພວກເຮົາ ເພື່ອຮັບປະກັນວ່າເດັກທຸກໆຄົນ ມີຄວາມສາມາດທີ່ຈະໄດ້ຮັບໂອກາດຈະເລີນເຕີບໃຫຍ່. ການສະໜອງອຸປະກອນ ການຊ່ວຍເຫລືອເຫລົ່ານີ້, ບໍ່ພຽງແຕ່ຕອບສະໜອງ ຕໍ່ຄວາມຕ້ອງການຢ່າງທັນທີທັນໃດ, ແຕ່ຍັງເປັນການລົງທຶນ ໃນອະນາຄົດຂອງຊຸມຊົນຕື່ມອີກ.

ທ່ານ ບີລາລ ດູຣານິ ຜູ້ຕາງໜ້າອົງການອຸຍນີເຊັບ ປະຈຳ ສປປ ລາວ, ກໍໄດ້ສະແດງເຖິງຄວາມຍຶດໝັ້ນ ຂອງອົງການອຸຍນີເຊັບ ໃນການສະໜັບສະໜູນສິດທິ ແລະ ສະຫວັດດີການ ຂອງເດັກນ້ອຍທຸກໆຄົນ ໂດຍການມອບອຸປະກອນການຊ່ວຍຄັ້ງນີ້ ສະແດງໃຫ້ເຫັນເຖິງການກ້າວໄປສູ່ ການມີສ່ວນຮ່ວມຫລາຍຂຶ້ນ. ຄວາມພະຍາຍາມຮ່ວມກັນຂອງອົງການອຸຍນີເຊັບ ກັບລັດຖະບານລາວ ແລະ ສະຖານທູດອົດສະຕຣາລີ ສະແດງໃຫ້ເຫັນເຖິງພະລັງແຫ່ງການຮ່ວມມື ໃນການສ້າງການປ່ຽນແປງ ໃນທິດທາງບວກທີ່ຍືນຍົງສຳລັບເດັກພິການ.

KPL