ຂປລ. ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ພະແນກອຸດສາຫະກຳ ແລະ ການຄ້າແຂວງ ຫລວງນ້ຳທາ ຈັດກອງປະຊຸມປະເມີນການຈັດຕັ້ງປະຕິບັດ ແລະ ປິດໂຄງການສົ່ງເສີມຫັດຖະກຳແມ່ຍິງ ຂອງຊົນເຜົ່າແຂວງຫລວງນໍ້າທາ ໃນວັນທີ 25 ພະຈິກ 2024 ໂດຍການເປັນປະທານ ຂອງທ່ານ ຄຳລາ ຂານສະຫງ່າ ຫົວໜ້າພະແນກອຸດສາຫະກຳ ແລະ ການຄ້າແຂວງ, ທ່ານ ນາງ ແອ່ງ ພົມມະຈັນ ຫົວໜ້າສູນສົ່ງເສີມຫັດຖະກຳເຮືອນຫູກມີຖຸນາ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
  ກອງປະຊຸມຄັ້ງນີ້, ໄດ້ຜ່ານການປະເມີນໂຄງການ ແລະ ແຜນການພັດທະນາວຽກງານຫັດຖະກຳ ແລະ ການຈັດຕັ້ງປະຕິບັດໂຄງການ, ຊຶ່ງປັດຈຸບັນ ຫົວໜ່ວຍທຸລະກິດ ແລະ ກຸ່ມຜະລິດທີ່ນໍາໃຊ້ກາໝາຍໂອດັອບ ມີທັງໝົດ 17 ກາໝາຍ, 59 ລາຍການ ກວມ 14 ບ້ານ ຂອງ 5 ເມືອງ, ກໍາລັງພິຈາລະນາ 2 ກຸ່ມຜະລິດ ແລະ ແຜນສະເໜີ ມີ 3 ກາໝາຍ ໃນປີ 2025, ການປັບປຸງຜະລິດຕະພາບ ເຄື່ອງຈັກ, ການຫຸ້ມຫໍ່, ຄຸນນະພາບ ສົ່ງເສີມການເຂົ້າເຖິງຕະຫລາດ, ອອນລາຍ, ສົ່ງເສີມການເຂົ້າຫາແຫລ່ງທຶນ, ພັດທະນາຜູ້ປະກອບການ ແລະ ການສ້າງຄວາມເຂັ້ມແຂງ.
|   ໂຄງການສົ່ງເສີມຫັດຖະກຳແມ່ຍິງຂອງຊົນເຜົ່າ ແຂວງຫລວງນໍ້າທາ ແມ່ນໂຄງການທຶນຊ່ວຍເຫລືອຂະໜາດນ້ອຍ ສະຖານທູດອົດສະຕຣາລີ ຊຶ່ງສູນສົ່ງເສີມ ໄດ້ຮັບທຶນຈາກໂຄງການ 30.000 ໂດລາອົດສະຕຣາລີ ລວມມີ 6 ກິດຈະກໍາ, ທັງນີ້ກໍເພື່ອເປັນການສົ່ງເສີມຫັດຖະກໍາ ແມ່ຍິງ ແຂວງຫລວງນໍ້າທາໃຫ້ເຂັ້ມແຂງ ໃນ 5 ບ້ານ, ມີ 45 ຄອບຄົວ ໃນ 3 ເມືອງຄືື: ຫລວງນໍ້າທາ, ລອງ ແລະ ເມືອງນາແລ, ຊຶ່ງໄດ້ຝຶກອົບຮົມການສ້າງຄວາມເຂັ້ມແຂງ ດ້ານການບໍລິຫານກຸ່ມ, ເຕັກນິກການຍອມສີຜ້າທຳມະຊາດ, ການອອກແບບ, ອຸປະກອນການຕໍ່າແຜນແພ ໃຫ້ກຸ່ມຫັດຖະກຳ, ການທັດສະນະສຶກສາ, ການສົ່ງເສີມການຕະຫລາດ ແລະ ຈັດງານວາງສະແດງສິນຄ້າ ເພື່ອເປັນການຍົກລະດັບສີມືແຮງງານ ໃຫ້ສະມາຊິກມີຄວາມສາມາດ ແລະ ຄວາມຊຳນານໃນການຜະລິດກະເປົາ ທີ່ເປັນເອກະລັກລາຍສະເພາະຂອງທ້ອງຖິ່ນ, ເພື່ອຍົກລະດັບສິນຄ້າຫັດຖະກຳທ້ອງຖິ່ນ ໃຫ້ມີຫລາກຫລາຍສິນຄ້າ ແລະ ມີຫລາຍຮູບແບບ ແຕ່ຮັກສາເອກະລັກ ວັດທະນະທຳຂອງແຕ່ລະເຜົ່າໄວ້ ເພື່ອສ້າງວຽກເຮັດງານທຳໃຫ້ປະຊາຊົນບັນດາເຜົ່າ ໃຫ້ມີອາຊີບຄົງທີ່ ແລະ ສ້າງລາຍຮັບໃຫ້ຄອບຄົວ ເພື່ອຍົກລະດັບຊີວິດການເປັນຢູ່ ຂອງປະຊາຊົນບັນດາເຜົ່າໃຫ້ດີຂຶ້ນເທື່ອລະກ້າວ. ພ້ອມນີ້, ຍັງໄດ້ຝຶກອົບຮົມການອອກແບບຊຸດປະຍຸກຊົນເຜົ່າ, ການຕັດຫຍິບເຄື່ອງນຸ່ງ, ຖົງ ແລະ ກະເປົາ ທີ່ເປັນເອກະລັກຂອງຊົນເຜົ່າ ໃຫ້ບັນດາຫົວໜ່ວຍກຸ່ມຜະລິດຫັດຖະກໍາ ໄດ້ຮຽນຮູ້ການອອກແບບ ສາມາດເຂົ້າໃຈ ເພື່ອເປັນການຊຸກຍູ້ ແລະ ສົ່ງເສີມຫົວໜ່ວຍຜະລິດດັ່ງກ່າວ.
  ໃນກອງປະຊຸມ ຍັງໄດ້ມອບໃບຍ້ອງຍໍຂອງເຈົ້າແຂວງ ໃຫ້ບັນດາຫົວໜ່ວຍທຸລະກິດ ທີ່ດີເດັ່ນແຂ່ງຂັນ ແລະ ຍ້ອງຍໍ ໜ່ວຍທຸລະກິດ ຫລື ກຸ່ມຜະລິດ ທີ່ມີຜົນງານດີເດັ່ນ ໃນການຜະລິດ ແລະ ພັດທະນາສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດ ຢູ່ພາຍໃນແຂວງຫລວງນໍ້າທາ 13 ພາກສ່ວນ ຕື່ມອີກ.  

KPL