ຂປລ. ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ຈັດຂະບວນການບໍລິຈາກເລືອດ ເພື່ອສະເຫລີມສະຫລອງວັນຊາດ ຄົບຮອບ 49 ປີ ພາຍໃຕ້ຫົວຂໍ້: “ບໍລິຈາກເລືອດ ແມ່ນ ຮັກຊາດ ແລະ ພັດທະນາ” ໃນວັນທີ 27 ພະຈິກ 2024 ຢູ່ສູນການຄ້າລາວ-ໄອເຕັກມໍ.

ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດ​ໄດ້​ມີ​ຄໍາ​ເຫັນວ່າ: ວັນທີ 2 ທັນວາ ແມ່ນວັນສ້າງຕັ້ງສາທາລະນະລັດ ປະຊາທິປະໄຕ ປະຊາຊົນລາວ, ແຕ່ລະປີໄດ້ມີການຈັດຕັ້ງສະເຫລີມສະຫລອງວັນດັ່ງກ່າວ ເພື່ອລະນຶກເຖິງມູນເຊື້ອ ຂອງປະຊາຊົນລາວບັນດາ ເຜົ່າ ທີ່ໄດ້ຄຽງບ່າຄຽງໄຫລ່ໃນການຕໍ່ສູ້ປົດປ່ອຍຊາດ ໃນເມື່ອກ່ອນ ກໍ​ຄື ​ໄລຍະປົກປັກຮັກສາ ​ແລະ ສ້າງສາພັດທະນາປະເທດຊາດໃນປັດຈຸບັນ. ການສະເຫລີມສະຫລອງ ວັນ​ສໍາຄັນດັ່ງກ່າວ ປະກອບດ້ວຍຫລາຍກິດຈະກໍາ ​ແລະ ໜຶ່ງໃນນັ້ນ ແມ່ນຂະບວນການຮັບບໍລິຈາກເລືອດ ໂດຍການເຊີນຊວນ, ປຸກລະ ດົມຂົນຂວາຍບັນດາ 3 ອົງການຈັດຕັ້ງມະຫາຊົນ, ພະນັກງານລັດຖະກອນ ຈາກກະຊວງ, ອົງການທຽບເທົ່າອ້ອມຂ້າງສູນກາງ, ພ້ອມທັງມວນຊົນທົ່ວໄປ ເຂົ້າຮ່ວມບໍລິຈາກເລືອດ.

ການຈັດຂະບວນການຮັບບໍລິຈາກເລືອດ ຖືວ່າເປັນກິດຈະກໍາໜຶ່ງທີ່ ມີຄວາມສໍາຄັນເພື່ອສະ ເຫລີມສະຫລອງວັນຊາດ ຄົບຮອບ 49 ປີ, ທັງເປັນການຊຸກຍູ້ຕໍ່ວຽກງານ ມະນຸດສະທໍາຂອງປະເທດເຮົາ ໂດຍສະເພາະ ການບໍລິຈາກເລືອດເພື່ອຊ່ວຍຊີວິດ ຂອງເພື່ອນມະນຸດດ້ວຍກັນ, ເພື່ອເປັນການປະກອບສ່ວນ ໃນການຫລຸດຜ່ອນອັດຕາການຕາຍຂອງແມ່ ແລະ ເດັກ. ​ເນື່ອງ​ຈາກ​ວ່າຢູ່ ສປປ ລາວ ອັດຕາການເສຍຊີວິດ ຂອງແມ່ຍິງຖືພາ-ເກີດລູກທີ່ມີອາການສົນ ແມ່ນຍັງມີຕົວເລກທີ່ສູງສົມຄວນ, ມີຫລາຍກໍລະນີແມ່ນມີອາການສົນເລືອດໄຫລ ແລະ ຈໍາເປັນຕ້ອງໄດ້ໃສ່ເລືອດ; ການມີເລືອດສໍາຮອງຢູ່ໃນລະ ດັບສະຖາບັນ ເລືອດແຫ່ງຊາດ, ສູນເລືອດແຂວງ ແລະ ບັນດາໜ່ວຍເກັບຮັກສາເລືອດຂັ້ນເມືອງ ແມ່ນມີຄວາມຈໍາເປັນ ເພື່ອຕອບສະໜອງເລືອດທີ່ປອດໄພ ໃຫ້ແກ່ຄົນເຈັບເຫລົ່ານັ້ນ ໃຫ້ທັນເວລາ.

​​ໃນໂອກາດ​ນີ້, ສະຖາບັນເລືອດແຫ່ງຊາດ ແລະ ສູນເລືອດແຂວງໃນທົ່ວປະເທດ ຂໍເຊີນຊວນ ພ ນັກງານ-ລັດຖະກອນ, ທະຫານ, ຕຳຫລວດ, ນັກຮຽນ-ນັກສຶກສາ, ພໍ່ຄ້າ-ຊາວຂາຍ ຕະຫລອດເຖິງພໍ່ແມ່ປະຊາຊົນທົ່ວນະຄອນຫລວງວຽງຈັນ ຫລື ບັນດາແຂວງທົ່ວປະເທດ ເຂົ້າຮ່ວມກິດຈະກຳການບໍລິ ຈາກເລືອດ, ຫາກທ່ານມີເງື່ອນໄຂ ອາຍຸ 17-60 ປີ, ນໍ້າໜັກ 45 ກິໂລຂຶ້ນໄປ, ຢູ່ໃນໄລຍະທີ່ມີສຸຂະພາບແຂງແຮງດີ ແມ່ນຂໍເຊີນຊວນໄປຮ່ວມບໍລິຈາກເລືອດ ທີ່ສະຖາບັນເລືອດແຫ່ງຊາດ ແລະ ສູນເລືອດແຂວງໃນທົ່ວປະເທດ ເລີ່ມແຕ່ເວລາ 08:30-18:00 ໂມງ ທຸກມື້ເປີດຮັບບໍລິຈາກປະຈຳ ບໍ່ເວັ້ນວັນພັກທາງລັດຖະການ.

ພາບ: ແສງຈັນ

KPL