ຂປລ. ກອງປະຊຸມຂອງຄະນະກຳມະການ ສະຖິຕິປະຊາຄົມອາຊຽນ ຄັ້ງທີ 14 (ACSS14) ໄດ້ໄຂຂຶ້ນເປັນທາງການ ໃນວັນທີ 27 ພະຈິກ 2024 ຢູ່ນະຄອນຫລວງວຽງຈັນ ພາຍໃຕ້ການເປັນປະທານໂດຍ ທ່ານ ເພັດ ພົມພິພັກ ລັດຖະມົນຕີກະຊວງ ແຜນການ ແລະ ການລົງທຶນ, ມີບັນດາຫົວໜ້າ ແລະ ຮອງຫົວໜ້າຫ້ອງການ ສະຖິຕິຈາກ 10 ປະເທດສະມາຊິກອາຊຽນ ແລະ ຕີມໍ​ແລັດສະ​ເຕ ເຂົ້າຮ່ວມສັງເກດການ.

ກອງປະຊຸມ, ຜູ້ນໍາວຽກງານສະຖິຕິ ຈາກບັນດາປະເທດໃນອາຊຽນ ຈະຮ່ວມກັນຄົ້ນຄວ້າ, ປືກສາຫາລື ແລກປ່ຽນບົດຮຽນນໍາກັນຢ່າງກົງໄປກົງມາ ເພື່ອສ້າງນະວັດຕະກໍາໃໝ່ດ້ານສະຖິຕິ, ສ້າງການຫັນປ່ຽນໃໝ່ ໃນການສັງລວມລາຍງານ ຂໍ້ມູນສະຖິຕິທາງການທີ່ຄົບຖ້ວນ, ທັນເວລາຕອບສະໜອງໃຫ້ລັດຖະບານ ໃຫ້ສາມາດ ສະດຸ້ງໄວຕໍ່ການຫັນປ່ຽນ ຂອງພາກພື້ນ ແລະ ໂລກ.

ທ່ານ ເພັດ ພົມພິພັກ ໄດ້ກ່າວວ່າ: ສປປ ລາວ ເປັນປະເທດໜຶ່ງໃນພາກພື້ນອາຊຽນ ທີ່ມີການຂະຫຍາຍຕົວຂອງເສດຖະກິດສູງ ສະເລ່ຍ 5 ປີກ່ອນການລະບາດພະຍາດໂຄວິດ-19 ຂະຫຍາຍຕົວໃນລະດັບ 7%, ປັດຈຸບັນ ຢູ່ໃນໄລຍະຟື້ນຟູຈາກຜົນກະທົບການແຜ່ລະບາດ ແລະ ສະພາບວິກີດການເສດຖະກິດ-ການເງິນ, ໃນປີ 2024 ຄາດວ່າການຂະຫຍາຍຕົວຂອງເສດຖະກິດ ຈະບັນລຸຕາມແຜນທີ່ວາງໄວ້ 4,5%. ໃນນັ້ນ, ປັດໄຈທີ່ຊຸກຍູ້ໃຫ້ເສດຖະກິດຂະຫຍາຍຕົວ ກໍຄື ການຜະລິດສິນຄ້າເພື່ອສົ່ງອອກ ເປັນຕົ້ນ ພະລັງງານໄຟຟ້າ, ຂະແໜງການບໍລິການ ທີ່ຕິດພັນກັບທາງລົດໄຟລາວ-ຈີນ ທີ່ເຊື່ອມຈອດລະຫວ່າງຊາຍແດນ ໄດ້ອໍານວຍຄວາມສະດວກ ໃນການທ່ອງທ່ຽວ, ຄົມມະນາຄົມຂົນສົ່ງ ແລະ ສົ່ງເສີມການຄ້າລະຫວ່າງປະເທດ ທີ່ບໍ່ແມ່ນແຕ່ປະເທດເຮົາ ໄດ້ຮັບຄວາມສະດວກ ແຕ່ແມ່ນບັນດາປະ ເທດໃນພາກພື້ນໄດ້ຮັບຜົນປະໂຫຍດຮ່ວມກັນ. ເຖິງຢ່າງໃດກໍຕາມ, ຍັງມີຄວາມທ້າທາຍຫລາຍດ້ານ ໂດຍສະເພາະ ການລຶບລ້າງຄວາມທຸກຍາກ ພາຍໃຕ້ເປົ້າໝາຍ ການພັດທະນາ ແບບຍືນຍົງ. ນອກນັ້ນ, ຍັງມີຄວາມທ້າທາຍກ່ຽວກັບ ສະຖຽນລະພາບຂອງຄ່າເງິນ, ອັດຕາເງິນເຟິ້ຍັງຢູ່ໃນລະດັບ 2 ຕົວເລກ, ແຮງງານຍັງມີຈຳນວນຈຳກັດ ບໍ່ພຽງພໍກັບຄວາມຕ້ອງການຂອງຕະຫລາດແຮງງານ, ຍັງຂາດທັກສະ ແລະ ສີ ມືແຮງງານ. ເມື່ອທຽບກັບບັນດາປະເທດໃນອາຊຽນ, ສປປ ລາວ ຍັງມີຄວາມທ້າທາຍ ຫລາຍດ້ານ ໃນການພັດທະນາ ທາງເສດຖະກິດ-ສັງຄົມ, ລວມເຖິງການພັດທະນາເຄື່ອງມືວັດແທກ ກໍຄື ການພັດທະ ນາລະບົບສະຖິຕິແຫ່ງຊາດ, ມີຄວາມທ້າທາຍໃນການຕອບສະໜອງ ຄວາມຕ້ອງການໃຫ້ ລັດຖະບານທັງທາງດ້ານປະລິມານ, ຄຸນນະພາບ ແລະ ເວລາ.

ປີນີ້, ເປັນປີມ້ວນທ້າຍ ຂອງແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IX (2021-2025) ເຊິ່ງກໍາລັງກະກຽມສະຫລຸບຕີລາຄາ ການຈັດຕັ້ງປະຕິບັດ ແລະ ສູນສະຖິຕິແຫ່ງຊາດ ກໍໄດ້ກະກຽມການສໍາຫລວດໃຫຍ່ ກໍຄື ການສໍາຫລວດພົນລະເມືອງ ແລະ ທີ່ຢູ່ອາ​ໄສ ທົ່ວປະເທດຄັ້ງທີ V ໃນປີ 2025, ເພື່ອກຽມສະໜອງ ຂໍ້ມູນທີ່ສໍາຄັນ ໃຫ້ແກ່ລັດຖະບານ ​ໂດຍ​ທ່ານ​ລັດຖະມົນຕີ​ ກະຊວງ​ແຜນການ ​ແລະ ການ​ລົງທຶນ ​ໄດ້ຮຽກຮ້ອງໃຫ້ບັນດາຜູ້ແທນ ກອງ​ປະຊຸມ ພ້ອມກັນຖອດຖອນບົດຮຽນ ເພື່ອນໍາໄປຜັນຂະຫຍາຍເຂົ້າໃນວຽກງານ ໂດຍສະເພາະ ການພັດທະນາ ການເກັບກໍາສັງຮວມຂໍ້ມູນສະຖິຕິ ໃນຂັ້ນກະຊວງ, ຂະແໜງການ, ຂັ້ນທ້ອງຖິ່ນ ກໍຄື ຮາກຖານ ໃຫ້ສາມາດລາຍງານຂໍ້ມູນ, ຕີລາຄາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ໃນຂັ້ນທ້ອງຖິ່ນ ໃຫ້ແທດເໝາະ ​ແລະ ຖືກຕ້ອງຕາ​ມຄວາມເປັນຈິງພາວະວິໄສ.

ຂ່າວ: ກິດຕາ

ພາບ: ອ່າຍຄຳ

KPL