ຂປລ. ໃນວັນທີ 27 ພະຈິກ 2024 ນີ້, ບໍລິສັດ Star Telecom (Unitel) ຈັດພິທີຮັບມອບ-ໃບຮັບຮອງ ISO 9001:2015 ແລະ ISO 27001:2022 ​ຊຶ່ງສະແດງເຖິງຄວາມພະຍາຍາມຢ່າງບໍ່ຢຸດຢັ້ງ ໃນການຍົກລະດັບຄຸນນະພາບບໍລິການ ແລະ ຮັບປະກັນຄວາມປອດໄພຂໍ້ມູນ ຂອງລູກຄ້າຕາມມາດຕະຖານສາກົນ ທີ່ໄດ້ຮັບການຍອມຮັບ.

ທ່ານ ຫວງຽນ ຮວ່າງ ມິງ ຮອງອຳນວຍການໃຫຍ່ ບໍລິສັດ Star Telecom ໄດ້ກ່າວວ່າ: ການໄດ້ຮັບໃບຮັບຮອງ ISO 9001:2015 ແລະ ISO 27001:2022 ແມ່ນຫລັກຖານທີ່ສະແດ ງໃຫ້ເຫັນຄວາມພະຍາຍາມ ຂອງພວກເຮົາ ໃນການສ້າງ ແລະ ຮັກສາລະບົບຄຸ້ມຄອງຄຸນນະພາບ ແລະ ຄວາມປອດໄພຂໍ້ມູນ ໃນລະດັບສາກົນ. ນອກນັ້ນ, ຍັງເປັນແຮງຈູງໃຈໃຫ້ທຸກຄົນໃນອົງກອນຂອງພວກເຮົາ ພະຍາຍາມພັດທະນາຄຸນນະພາບ ຂອງບັນດາວຽກງານ​ຮອບດ້ານຫລາຍຂຶ້ນ, ມຸ່ງເນັ້ນໃສ່ການຄຸ້ມຄອງ ແລະ ບຸກຄະລາກອນ, ພ້ອມທັງໃຫ້ສິນຄ້າ ແລະ ບໍລິ ການຂອງພວກເຮົາ ສາມາດຕອບ​ສະໜອງ​ ຕາມຄວາມຕ້ອງການຂອງລູກຄ້າ ແລະ ມາດຕະຖານຂອງກົດໝາຍທີ່ໃຊ້ບັງຄັບ.

ໃນພິທີ, ນາງ ຫງວຽນ ເຮືອງ ຢາງ ຜູ້ອຳນວຍການຂອງອົງການຮັບຮອງ ມາດຕະຖານສາກົນ DAS Vietnam Certification Organization, ໄດ້ເປັນກຽດມອບໃບຮັບຮອງໃຫ້ກັບບໍລິສັດ Star Telecom (Unitel), ເຊິ່ງສະແດງອອກຢ່າງຈະແຈ້ງ ເຖິງຄວາມພະຍາຍາມຂອງທຸກຄົນໃນອົງ ການເພື່ອການປັບປຸງ ບໍລິການໃຫ້ດີຂຶ້ນ.

ຄວາມມຸ່ງໝັ້ນຂອງ Star Telecom (Unitel): ພັດທະນາ ແລະ ດຳເນີນລະບົບຄຸ້ມຄອງ ໃຫ້ມີປະສິດທິພາບຂຶ້ນຕາມມາດຕະຖານສາກົນ; ສົ່ງມອບຄຸນນະພາບ ແລະ ຄວາມປອດໄພຂໍ້ມູນທີ່ຍິ່ງຂຶ້ນ ໃຫ້ກັບລູກຄ້າ ແລະ ຄູ່ຄ້າ; ສ້າງຄວາມເຊື່ອໃຈ ໃຫ້ເຂົ້າເຂົ້າຫາຄວາມຮ່ວມມືໄດ້ຢ່າງຍືນຍົງ.

ໃບຮັບຮອງນີ້ບໍ່ເປັນພຽງ ແຕ່ເປັນຄວາມພາກພູມໃຈ, ແຕ່ຍັງເປັນກຸນແຈສຳຄັນໃຫ້ Star Telecom ກ້າວລົງສູ່ຕະຫລາດສາກົນ, ຢືນຢັນຄວາມເປັນຜູ້ສະໜອງບໍລິການທີ່ໜ້າເຊື່ອຖືໄດ້. ມາແບ່ງປັນຄວາມຍິນດີນີ້ກັບພວກເຮົາ ແລະ ຮ່ວມດຳເນີນສູ່ອະນາຄົດທີ່ຍືນຍົງ! Star Telecom (Unitel)-ມາດຕະຖານສາກົນ, ຄວາມເຊື່ອໃຈທີ່ຍືນຍົງ.

KPL