ຂປລ.ວິທະຍຸສາກົນແຫ່ງ ສປ ຈີນ, ງານວາງສະແດງ ສິນຄ້າ ນຳເຂົ້າສາກົນຈີນ ຄັ້ງທີ 7 ໄດ້ຈັດຂຶ້ນ ຢູ່ນະຄອນຊຽງໄຮ້ຂອງ ສປ ຈີນລະຫວ່າງວັນທີ 5 ຫາ 10 ພະຈິກນີ້ ໂດຍມີວິສາຫະກິດ 3.496 ແຫ່ງຈາກ 129 ປະເທດ ແລະ ເຂດແຄວ້ນໃນໂລກເຂົ້າຮ່ວມ, ຈຳນວນວິສາຫະກິດ ແລະ ປະເທດລ້ວນ ແຕ່ຫລາຍກວ່າຄັ້ງຜ່ານມາ; ໃນ 500 ອັນດັບສຸດຍອດ ວິສາຫະກິດ ລະດັບໂລກ ແລະ ບໍລິສັດ ນຳໜ້າ ຂະແໜງການ ເຂົ້າຮ່ວມງານວາງສະແດງຄັ້ງນີ້ ມີເຖິງ 297 ແຫ່ງ ເຊິ່ງໄດ້ສ້າງສະຖິຕິສູງສຸດໃນປະຫວັດສາດ ຂອງງານວາງສະແດງດັ່ງກ່າວໃນນັ້ນ, ມີວິສາຫະກິດປະເທດ ພວມພັດທະນາ ໃນພາກພື້ນ ອາຊີ ຕາເວັນອອກສຽງໃຕ້ ໄດ້ເຂົ້າຮ່ວມງານ ເປັນປະຈຳ. ແຕ່ລະປີ, ວິສາຫະກິດ ຫລາຍແຫ່ງ ຂອງປະເທດເຫລົ່ານີ້ ລ້ວນແຕ່ ໄດ້ນຳເອົາ ຜະລິດ ຕະພັນ ທີ່ມີເອກະລັກ ພິເສດຂອງຕົນ ມາເຂົ້າຮ່ວມ ງານວາງສະແດງ ເຊິ່ງເປັນທັງຜູ້ເຂົ້າຮ່ວມ ແລະ ເປັນສັກຂີພິຍານ ພ້ອມທັງແມ່ນ ຜູ້ໄດ້ຮັບຜົນປະໂຫຍດ ຈາກງານວາງສະແດງ ສິນຄ້ານຳເຂົ້າ ສາກົນຈີນ. ສຳລັບ ປີນີ້ ກໍເຊັ່ນດຽວກັນ.ໃນງານວາງສະແດງຄັ້ງນີ້, ຫໍວາງສະແດງແຫ່ງຊາດລາວ ໄດ້ເນັ້ນໃສ່ “ທາງລົດໄຟຈີນ-ລາວ” ໂດຍໄດ້ວາງ ສະແດງຜະລິດຕະພັນ ທີ່ມີເອກະລັກພິເສດຂອງ ສປປ ລາວ ຈະເລັ່ງການເຂົ້າສູ່ ຕະຫລາດຈີນ ໂດຍຜ່ານທາງລົດໄຟຈີນ-ລາວ ເພື່ອເພີ່ມພະລັງຂັບເຄື່ອນໃໝ່ ໃຫ້ແກ່ ການພັດທະນາ ເສດຖະກິດ ພາກພື້ນ. ຢູ່ໜ້າຫໍວາງສະແດງແຫ່ງຊາດລາວ ແມ່ນວິສາຫະກິດ ທີ່ດຳເນີນທຸລະກິດ ເອເລັກໂຕຣນິກ ຜະລິດ ຕະພັນ ກະສິກຳຂ້າມຊາດ ເປັນການສະເພາະ. ຕາມຂ່າວແຈ້ງວ່າ ວິສາຫະກິດແຫ່ງນີ້ ເປັນໜຶ່ງໃນໂຄງການ ທຸລະກິດ ເອເລັກໂຕຣນິກ ຊົນນະບົດ ທີ່ ສປ ຈີນ ຊ່ວຍເຫລືອ ສປປ ລາວ ພັດທະນາ. ໂດຍຜ່ານວິສາຫະກິດແຫ່ງນີ້, ນັກທຸລະກິດຈີນ ຈະສາມາດເລືອກຊື້ ຜະລິດ ຕະພັນກະສິກຳລາວ ທາງອອນລາຍ ແລະ ຊຳລະບັນຊີ ດ້ວຍບັດທະນາຄານຈີນ.ໃນຊຸມປີຜ່ານມາ, ຄຽງຄູ່ກັບການເປີດນຳໃຊ້ທາງລົດໄຟຈີນ-ລາວ, ປະສິດທິພາບ ການຂົນສົ່ງສິນຄ້າລາວໄດ້ຮັບການຍົກສູງຂຶ້ນ ແລະ ໄດ້ຫລຸດຕົ້ນທຶນ ດ້ານການຈໍລະຈອນສິນຄ້າ ຂອງວິສາຫະກິດ ເຊິ່ງເຮັດໃຫ້ຜະລິດ ຕະພັນກະສິກຳ ທີ່ມີເອກະລັກ ພິເສດ ຂອງ ສປປ ລາວ ຊະນິດຕ່າງໆ ເຊັ່ນ: ໝາກກ້ວຍ, ໝາກຖົ່ວລຽນ, ມັນຕົ້ນ ແລະອື່ນໆໄດ້ເຂົ້າສູ່ຕະຫລາດຈີນ ນັບມື້ນັບຫລາຍຂຶ້ນ. ເພື່ອຕອບສະໜອງ ຕາມຄວາມຕ້ອງການ ຂອງຕະຫລາດຈີນ, ລັດຖະບານລາວ ຫວັງວ່າ ຈະສາມາດຊຸກຍູ້ ການພັດທະນາ ກະສິກຳ ແບບຍືນຍົງ ໂດຍຜ່ານທາງລົດໄຟຈີນ-ລາວ ແລະ ສົ່ງເສີມໃຫ້ຊາວກະສິກອນ ເພີ່ມການສົ່ງອອກ ຜະລິດຕະພັນ ກະສິກຳສູ່ ສປ ຈີນ. ໂດຍຜ່ານຈາກການເຂົ້າຮ່ວມ ງານວາງສະແດງ ສິນຄ້ານຳເຂົ້າ ສາກົນຈີນ, ຊາພັນປີ, ເບຍລາວ, ກາເຟລາວເປັນຕົ້ນ ລ້ວນແຕ່ໄດ້ຮັບຄວາມນິຍົມຊົມຊອບ ຈາກລູກຄ້າຈີນ.ຂະນະທີ່ ໄທ ໄດ້ເຂົ້າຮ່ວມ ງານວາງສະແດງສິນຄ້າ ນຳເຂົ້າ ສາກົນຈີນ ເປັນ 7 ຄັ້ງລຽນຕິດແລ້ວ, ປີນີ້ ມີວິສາຫະກິດໄທ ຫລາຍກວ່າ 80 ແຫ່ງໄດ້ມາເຂົ້າຮ່ວມງານ ໂດຍໄດ້ພົວພັນເຖິງ ຂະແໜງການ ອາຫານ, ຮູບເງົາ, ການທ່ອງທ່ຽວ, ເຄື່ອງປະດັບ, ຜະລິດຕະພັນໝູນວຽນ ໃນດ້ານການອະນຸລັກ ສິ່ງແວດລ້ອມ, ຜະລິດຕະພັນ ບຳລຸງ ສຸຂະພາບ ແລະ ອື່ນໆ. ທ່ານ ພິໄຊ ນາຣິບທະພັນ, ລັດຖະມົນຕີກະຊວງການຄ້າຄົນໃໝ່ຂອງໄທ ໄດ້ໃຫ້ສຳພາດຕໍ່ນັກຂ່າວ ໃນງານວາງສະແດງສິນຄ້ານຳເຂົ້າສາກົນຈີນ ຄັ້ງນີ້ວ່າ: ການຮ່ວມມື ແບບຊ່ວຍຊູຍູ້ໜູນກັນ ລະຫວ່າງ ປະເທດ ພວມພັດທະນາແມ່ນສຳຄັນທີ່ສຸດ. ງານວາງສະແດງສິນຄ້ານຳເຂົ້າສາກົນຈີນ ໄດ້ເສີມຂະຫຍາຍບົດບາດ ຢ່າງຕັ້ງໜ້າ ໃນການຊຸກຍູ້ໃຫ້ຜະລິດຕະພັນໄທ ເຂົ້າສູ່ຕະຫລາດຈີນ ໃຫ້ຫລາຍກວ່າເກົ່າ, ໄທ ຈະສຸມໃສ່ ເພີ່ມທະວີ ການຮ່ວມມືດ້ານການຄ້າກັບ ສປ ຈີນ ຕື່ມອີກ.ສິ່ງທີ່ຄວນເວົ້າເຖິງນັ້ນກໍຄື: ມີ 37 ປະເທດທີ່ດ້ອຍພັດທະນາໃນໂລກໄດ້ເຂົ້າຮ່ວມງານວາງສະແດງສິນຄ້າ ນຳເຂົ້າສາກົນຈີນ ປີນີ້, ຝ່າຍເຈົ້າພາບຍັງໄດ້ສະໜອງ ຮ້ານວາງສະແດງ ທີ່ບໍ່ເສຍຄ່າເຊົ່າ 120 ກວ່າບ່ອນ ໃຫ້ແກ່ ວິສາຫະກິດ ຂອງປະເທດເຫລົ່ານີ້. ທີ່ຈິງແລ້ວ, ນັບແຕ່ຄັ້ງປະຖົມມະລືກເປັນຕົ້ນມາ, ງານວາງສະແດງດັ່ງກ່າວ ກໍໄດ້ອຳນວຍຄວາມສະດວກ ໃຫ້ແກ່ ປະເທດ ດ້ອຍພັດທະນາ ມາໂດຍຕະຫລອດ. 7 ປີຜ່ານມາ, ຜະລິດຕະພັນ ຂອງປະເທດ ດ້ອຍພັດທະນາ ໄດ້ເຂົ້າສູ່ຕະຫລາດຈີນ ນັບມື້ ນັບຫລາຍຂຶ້ນ ໂດຍຜ່ານງານວາງສະແດງ ສິນຄ້ານຳເຂົ້າ ສາກົນຈີນ ເຊິ່ງໄດ້ນຳພາ ການພັດທະນາ ຂອງຂະແໜງ ການທີ່ກ່ຽວຂ້ອງ ແລະ ປັບປຸງຊີວິດ ການເປັນຢູ່ ຂອງປະຊາຊົນ ປະເທດ ເຫລົ່ານີ້ ໃຫ້ສູງຂຶ້ນ.ນອກນີ້, ຈີນຍັງຈະເປີດກວ້າງການເປີດປະຕູ ສູ່ພາຍນອກ ຕໍ່ປະເທດດ້ອຍພັດທະນາ ໃນໂລກຕື່ມອີກ. ນັບແຕ່ວັນທີ 1 ທັນວາປີນີ້ເປັນຕົ້ນໄປ. ສປຈີນ ຈະຍົກເວັ້ນພາສີ 100% ຕໍ່ຜະລິດຕະພັນ ທີ່ນຳເຂົ້າຈາກປະເທດ ດ້ອຍພັດທະນາໃນໂລກ ເຊິ່ງລວມທັງ ສປປ ລາວ. ນີ້ແມ່ນມາດຕະການສຳຄັນ ທີ່ທ່ານ ສີ ຈິ້ນຜິງ, ປະທານປະເທດຈີນ ໄດ້ປະກາດໃນພິທີໄຂກອງປະຊຸມສຸດຍອດປັກກິ່ງ ຂອງເວທີປຶກສາຫາລື ຈີນ-ອາຟຣິກາ ປີ 2024.ສປ ຈີນ ແມ່ນປະເທດ ພວມພັດທະນາ ທີ່ໃຫຍ່ທີ່ສຸດ ແລະ ເປັນສະມາຊິກ ສົມບູນຂອງ “ເຂດໂລກໃຕ້”, ສປ ຈີນໄດ້ຍຶດໝັ້ນສະໜັບສະໜູນ ການຮ່ວມມືໃຕ້-ໃຕ້ຢ່າງສະເໝີຕົ້ນ ສະເໝີປາຍ, ຍຶດໝັ້ນເປີດປະຕູ ສູ່ພາຍນອກ ແລະ ຮ່ວມມືກັນ ແບບຕ່າງຝ່າຍ ຕ່າງໄດ້ຮັບຜົນປະໂຫຍດ ເພື່ອເຮັດໃຫ້ໝາກຜົນ ການພັດທະນາ ສ້າງຜົນປະໂຫຍດໃຫ້ແກ່ ປະຊາຊົນ ປະເທດຕ່າງໆ ໃຫ້ໄດ້ຢ່າງທ່ຽງທຳ ກວ່າເກົ່າ. ໂດຍຜ່ານຈາກ ງານວາງສະແດງ ສິນຄ້າ ນຳເຂົ້າສາກົນຈີນ ທີ່ເປີດປະຕູສູ່ພາຍນອກ ແລະ ເນັ້ນໃສ່ການຮ່ວມມືກັນ, ບັນດາປະເທດ “ເຂດໂລກໃຕ້” ຈະສາມາດຄົ້ນຫາໂອກາດຫຼາຍກວ່າເກົ່າ ແລະ ໄດ້ຮັບການພັດທະນາໃຫຍ່ກວ່າເກົ່າ ຈາກຕະຫລາດຈີນ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL