ຂປລ. ງານວາງສະແດງ ແລະ ຈຳໜ່າຍສິນຄ້າ ໃນບຸນນະມັດສະການພະທາດຫລວງວຽງ​ຈັນ ປະຈຳປີ 2024 ຢູ່ເດີ່ນສະໜາມຫລວງ ຈະຈັດຂຶ້ນໃນ​ລະ​ຫວ່າງວັນ​ທີ 11-15 ພະຈິກ, ຄະນະ​ຮັບຜິດ ຊອບ​ໄດ້​ອອກຂໍ້​ຫ້າມ​ຕ່າງໆ ​ພາຍ​ໃນ​ງານ ​ເພື່ອ​ຮັບປະກັນ​ຄວາມ​ເປັນ​ລະບຽບ​ຮຽບຮ້ອຍ ​ແລະ ຮັກສາ​ໄດ້​ຄວາມ​ສະຫງົບ ​ແລະ ມູນ​ເຊື້ອ​ວັດທະນະ​ທໍາ ຮີດຄອງ​ປະ​ເພນີ​ອັນ​ດີງາມ​ຂອງ​ຊາດ.

ສຳລັບ ຂໍ້ຫ້າມຕ່າງໆພາຍໃນງານ ປະກອບ​ມີ: ຫ້າມຂາຍ ແລະ ນຳເອົາຢາເສບຕິດ, ສິ່ງມຶນເມົາ, ອາວຸດ, ມີດ, ງ້າວ, ໜ້າ, ກະຖຸນ, ສາຍແອວຫົວໃຫຍ່ ແລະ ສະນັບມື, ສິ່ງຂອງລອກຮຽນແບບ, ສິນຄ້າລາມົກອະນາຈານ ແລະ ສິນຄ້າທີ່ຜິດກົດໝາຍ ເຂົ້າມາໃນງານ ແລະ ມາວາງຂາຍພາຍໃນງານຢ່າງເດັດຂາດ; ຫ້າມໂຄສະນາ ຂາຍສິນຄ້າເກີນຄວາມເປັນຈິງ, ບໍ່ອະນຸຍາດນຸ່ງເຄື່ອງລາມົກອະນາຈານ ເຂົ້າໃນງານບຸນ; ຫ້າມດື່ມສິ່ງມຶນເມົາ, ຫລິ້ນການພະນັນ ແລະ ອາລະວາດຕີກັນ; ຫ້າມຂາຍເຄື່ອງຊະຊາຍ, ວາງສິນຄ້າອອກມານອກຮ້ານ ແລະ ຊື້ຂາຍສິນຄ້າເປັນເງິນຕາຕ່າງປະເທດ; ຫ້າມ​​ບຸກຄົນ, ວັດ, ສຳນັກ ງານ​, ອົງການ​ປົກຄອງ​ບ້ານ ​ກີດ​ຂວາງ​ການ​ຈັດ​ສັນ​ສະຖານທີ່​ວາງສະແດງ-ຂາຍສິນຄ້າ ຂອງ​ຄະນະ​ກຳມະການຈັດງານ. ສໍາລັບ​ນັກສະ​ແດງ​ສິລະປະ​ ຢູ່​ໃນ​ງານ​ແຕ່ລະ​ຈຸດ​ຕ້ອງ​​ແຕ່ງ​ກາຍ​ ແລະ ​ນຸ່ງເຄື່ອງສຸພາບຮຽບຮ້ອຍໃຫ້ຖືກ ຕ້ອງ​ຕາມ​ຮີດຄອງ​ປະ​ເພນີ​ລາວ; ຫ້າມສວຍໂອກາດຂຶ້ນລາຄາຄ່າເຊົ່າຫ້ອງ, ຄ່າບໍລິການຕາມລໍາພັງໃຈ, ການເປັນນາຍໜ້າຈັບຈ່ອງຫ້ອງຂາຍສິນຄ້າ ແລະ ບໍລິການ ເພື່ອເກງກໍາໄລເດັດຂາດ; ຫ້າມນຳເອົາເຄື່ອງສຽງຂະໜາດໃຫຍ່ ທີ່ມີຄວາມດັງເກີນ 85 ດີຊີເບວ ເຂົ້າມານຳໃຊ້ ໂດຍບໍ່ມີໃບອະນຸ ຍາດ, ຖ້າພົບເຫັນຈະຖືກປັບໄໝ ໃນລາຄາ ເຄື່ອງລະ 10.000.000 ກີບ.

ການເປີດຮ້ານ ວາງສະແດງ ແລະ ຂາຍສິນຄ້າ ຢູ່ ສະໜາມຫລວງ ແລະ ພະທາດຫລວງ ບໍ່ໃຫ້ເກີນ 23:00 ໂມງ, ຖ້າລະເມີດຂໍ້ຫ້າມ ຄະນະກໍາມະການກວດກາການຄ້າຈະໄດ້ໃຊ້ມາດຕະການສຶກສາອົບຮົມ, ປັບໄໝ ຕາມລະບຽບການ.

ໃນຂະນະທີ່ ລາຄາຄ່າບໍລິການຝາກ​ລົດຈັກ, ລົດໃຫຍ່ ແລະ ລົດປະເພດອື່ນໆ ໄດ້ກໍານົດລາຄາ ໃຫ້ຜູ້ມອບເໝົາ ຫລື ປະມູນເກັບຄ່າບໍລິການຄື: ລົດ​ໃຫຍ່ 30.000 ກີບ/ຄັນ/ຄັ້ງ, ລົດ​ຕຸກໆ 15.000 ກີບ/ຄັນ/ຄັ້ງ, ລົດຈັກ 10.000 ກີບ/ຄັນ/ຄັ້ງ. ສ່ວນຄ່າ​ບໍລິການ​ຫ້ອງ​ນ້ຳ: 5.000 ກີບ/ຄັ້ງ/ຄົນ ສໍາລັບ ຄະນະ​ກຳມະ​ການ, ​ແຂກ​ທີ່​ຖືກ​ເຊີນ ​ແລະ ໜ່ວຍ​ງານຮັບຜິດຊອບ​ການຈັດງານ ​​ແມ່ນບໍ່​ໃຫ້​ເກັບຄ່າບໍລິການ.

 ຂ່າວ: ທະນູທອງ

KPL