ຂປລ
ຂປລ. ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ວັນທີ 23 ຕຸລາ 2024 ນີ້, ອົງການແຄຣ໌ ນານາຊາດ ປະຈໍາ ລາວ ມອບເຄື່ອງຊ່ວຍເຫລືອໃຫ້ປະຊາຊົນບ້ານເປົ້າໝາຍ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ເມືອງນາແລ ນໍາພາໂດຍ ທ່ານ ນາງ ພູວຽງ ທັນແສງສຸວັນ
ຂປລ. ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ວັນທີ 23 ຕຸລາ 2024 ນີ້, ອົງການແຄຣ໌ ນານາຊາດ ປະຈໍາ ລາວ ມອບເຄື່ອງຊ່ວຍເຫລືອໃຫ້ປະຊາຊົນບ້ານເປົ້າໝາຍ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ເມືອງນາແລ ນໍາພາໂດຍ ທ່ານ ນາງ ພູວຽງ ທັນແສງສຸວັນ ຕ່າງໜ້າອົງການແຄຣ໌ ນານາຊາດປະຈໍາລາວ, ເຄື່ອງທີ່ນໍາມາມອບໃນຄັ້ງນີ້ ປະກອບມີ: ເຄື່ອງໃຊ້ຄົວເຮືອນທີ່ຈໍາເປັນ ແລະ ອາຫານແຫ້ງ ໂດຍແມ່ນອົງການແພດທີ່ບໍ່ມີພົມແດນ ປະເທດສະວິດ ເປັນຜູ້ໃຫ້ທຶນຊ່ວຍເຫລືອ ຈໍານວນ 56.050 ໂດລາສະຫະລັດ ມອບເຄື່ອງຊ່ວຍເຫລືອໃຫ້ປະຊາຊົນໃນທົ່ວແຂວງທັງໝົດ 1.300 ຫລັງຄາເຮືອນ. ໃນນັ້ນ, ເມືອງນາແລ ມີ 15 ບ້ານ 203 ຄອບຄົວ, 1.115 ຄົນ ທີ່ໄດ້ຮັບການຊ່ວຍເຫລືອ.
ໂອກາດນີ້, ທ່ານ ບຸນແພງ ໄຊສົງຄາມ ຫົວໜ້າກອງບັນຊາການທະຫານເມືອງນາແລ ໄດ້ສະແດງຄວາມຂອບ ໃຈເປັນຢ່າງສູງມາຍັງ ອົງການແຄຣ໌ ນານາຊາດ ປະຈໍາລາວ ທີ່ເຫັນໄດ້ຄວາມສໍາຄັນໃນການຊ່ວຍປັບປຸງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃນຄັ້ງນີ້, ສະເພາະເມືອງນາແລ ມີຄອບຄົວທີ່ຖືກຜົນກະທົບ 15 ບ້ານຄື: ບ້ານທົ່ງຖອນ, ບ້ານນໍ້າແຫງ, ບ້ານພູວຽງ, ບ້ານເລົາ, ບ້ານນາແລ້ງ, ບ້ານອ້ອມ, ບ້ານຜາວີ, ບ້ານຫາດເຕາະ, ບ້ານພູລາ, ບ້ານສາງອາກ, ບ້ານສະໂຫລຍ, ບ້ານຫາດນາແລ້ງ, ບ້ານຄອນຈັນ, ບ້ານວັງມີໄຊ ແລະ ບ້ານນາແລ້ງ.
ຂ່າວ: ພອນທິບ ພິລາວັນ
KPL