ຂປລ. ສະຖາບັນຄົ້ນຄວ້ານິຕິກໍາສະ ພາແຫ່ງຊາດ (ສນສ) ຈັດສໍາມະນາປັບປຸງເນື້ອໃນຮ່າງຄູ່ມື ການຄົ້ນຄວ້າບົດຄັດຫຍໍ້ກົດໝາຍ ​ໃນວັນທີ 12-13 ຕຸລາ 2024 ຜ່ານ​ມາ, ທີ່ເມືອງວັງວຽງ ແຂວງວຽງຈັນ ໂດຍການເປັນ ປະທານຂອງ ທ່ານ ສິນທະລາ ຫລ້າສຸກສະໄໝ ຫົວໜ້າສະຖາບັນ ຄົ້ນຄວ້ານິຕິກໍາ ,ມີຮອງຫົວໜ້າ ສນສ, ຫົວໜ້າ-ຮອງຫົວ ໜ້າກົມ ແລະ ສູນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ທັງ​ນີ້, ກໍເພື່ອປັບປຸງຮ່າງຄູ່ມື, ແບບໂຄງຮ່າງບົດຄົ້ນຄວ້າຄັດຫຍໍ້ກົດໝາຍ ແລະ ລາຍການປະເມີນ-ກວດກາຄຸນນະພາບ ການຄົ້ນຄວ້າຄັດຫຍໍ້ກົດໝາຍ.

ການສໍາມະນາຄັ້ງນີ້, ມີຄວາມໝາຍສໍາຄັນ ແລະ ຈໍາເປັນຢ່າງພາວະວິໄສ ເພາະວ່າວຽກງານຄົ້ນ ຄວ້າຄັດຫຍໍ້ ຮ່າງກົດໝາຍ ເພື່ອເປັນຂໍ້ມູນໃຫ້ແກ່ຄະນະປະຈໍາສະພາແຫ່ງຊາດ ແລະ ສະມາຊິກສະພາແຫ່ງຊາດ ໃນການປະກອບຄໍາເຫັນ ແລະ ພິຈາລະນາຮັບຮອງເອົາກົດໝາຍຕ່າງໆ ໃນກອງປະຊຸມ ສະໄໝສາມັນ ຂອງສະພາແຫ່ງຊາດ. ນອກນັ້ນ, ຍັງເປັນບ່ອນອີງພື້ນຖານ ໃນການເຄື່ອນໄຫວວຽກງານຕົວຈິງ, ເຮັດໃຫ້ເນື້ອໃນມີຄວາມຮັດກຸມ, ຄົບຖ້ວນ ແລະ ສົມບູນ ກ່ອນຈະນໍາໄປທາບທາມ ລະດົມຄວາມເຫັນຈາກພາກສ່ວນກ່ຽວຂ້ອງ ພາຍໃນສະພາແຫ່ງຊາດ (ສພຊ); ປຶກສາຫາລືການກໍານົດແຜນ ການຈັດກອງປະຊຸມທາບທາມ ລະດົມຄວາມເຫັນ ຈາກພາກສ່ວນກ່ຽວຂ້ອງພາຍໃນ ສພຊ ແລະ ພາຍນອກ.

ທ່ານ ສິນທະລາ ຫລ້າສຸກສະໄໝ ​ໄດ້ມີຄໍາເຫັນວ່າ: ຕະຫລອດການຈັດຕັ້ງປະຕິບັດວຽກງານຄົ້ນ ຄວ້າຄັດຫຍໍ້ຂອງສະຖາບັນຄົ້ນຄວ້າ ນິຕິກໍາສະພາແຫ່ງຊາດ ແມ່ນຍັງບໍ່ທັນມີນິຕິກໍາເປັນບ່ອນອ້າງອີງ ໃນການຈັດຕັ້ງປະຕິບັດ ເປັນຕົ້ນ ການສະໜອງບົດຄົ້ນຄວ້າ, ຂໍ້ມູນການສົມທຽບກົດໝາຍ ໃຫ້ຄະນະປະຈໍາສະພາແຫ່ງຊາດ ແລະ ສະມາຊິກສະພາແຫ່ງຊາດ. ສະນັ້ນ, ຈຶ່ງຮຽກຮ້ອງໃຫ້ບັນດາທ່ານຜູ້ເຂົ້າຮ່ວມ ກອງປະຊຸມສຸມເນື້ອໃນຈິດໃຈ ໃນການປະກອບຄໍາເຫັນ, ແລກປ່ຽນກັບວິທະຍາກອນ ເພື່ອໃຫ້ຄູ່ມືສະບັບນີ້ ເປັນວິທະຍາສາດໄປຕາມໂຄງຮ່າງ, ຮູບແບບ ແລະ ຈຸດພິເສດຂອງ ສະພາແຫ່ງຊາດ.

ສໍາມະນາກອນ ໄດ້ຮັບຟັງການສະເໜີ ແລະ ແລກປ່ຽນຄວາມເຫັນຕໍ່ເນື້ອໃນສຳຄັນຄື: ຮ່າງຄູ່ມືການຄົ້ນຄວ້າຄັດຫຍໍ້ ກົດໝາຍຂອງສະຖາບັນຄົ້ນຄວ້າ ນິຕິກຳສະພາແຫ່ງຊາດ, ແບບໂຄງຮ່າງບົດຄົ້ນ ຄວ້າຄັດຫຍໍ້ກົດໝາຍ, ລາຍການປະເມີນ-ກວດກາຄຸນນະພາບ ການຄົ້ນຄວ້າຄັດຫຍໍ້ກົດໝາຍ, ປຶກສາຫາລື ແລະ ກຳນົດແຜນຈັດກອງປະຊຸມ ທາບທາມລະດົມ ຄວາມຄິດເຫັນໃສ່ຮ່າງຄູ່ມື ຈາກພາກສ່ວນກ່ຽວຂ້ອງພາຍໃນ ສະພາແຫ່ງຊາດ ແລະ ພາຍນອກ.

ຂ່າວ-ພາບ: ບຸນເກີດ ວົງໄຊຍາ

KPL