*ນໍ້າງື່ມປຽບດັ່ງສາຍເລືອດ ເສັ້ນທີ 2 ຮອງຈາກແມ່ນໍ້າຂອງປະຊາຊົນລາວບັນດາເຜົ່າທີ່ບໍ່ພຽງປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ການຜະລິດກະສິກໍາເທົ່ານັ້ນ ຫາກຍັງເປັນໄມ້ງັດສໍາຄັນໃນການຂັບເຄື່ອນພາກອຸດສາຫະກໍາທ່ອງທ່ຽວລາວທີ່ໜ້າສົນໃຈບໍ່ໜ້ອຍ.

ດັ່ງທີ່ຮູ້ນໍາກັນ, ນໍ້າງື່ມມີຄວາມຍາວທັງໝົດປະມານ 350 ກວ່າກິໂລແມັດ, ມີຕົ້ນກໍາເນີດຈາກແຂວງຊຽງຂວາງໄຫລຜ່ານບັນດາບ້ານ, ເມືອງ ແລະ ແຂວງຕ່າງໆລົງສູ່ປາກແມ່ນນໍ້າຂອງຢູ່ເມືອງປາກງື່ມ ນະຄອນຫລວງວຽງຈັນ ເຊິ່ງປະຊາຊົນລາວບັນດາເຜົ່າຢູ່ລຽບຕາມແຄມແມ່ນໍ້າດັ່ງກ່າວ ໄດ້ເພີ່ງພາອາໃສ ເພື່ອລ້ຽງຊີບຄືກັບສາຍເລືອດຂອງເຂົາເຈົ້າໃນການນໍາໃຊ້ນໍ້າງື່ມອຸປະໂພກ-ບໍລິໂພກ, ການຜະລິດກະສິກໍາເປັນສິນຄ້າ-ຄໍ້າປະກັນສະບຽງອາຫານ, ສະໜອງໃຫ້ການຜະລິດເປັນພະລັງງານໄຟຟ້າ ແຕ່ສິ່ງມະຫັດສະຈັນຂອງນໍ້າງື່ມນັ້ນ ໄດ້ກໍ່ໃຫ້ເກີດເປັນດອນເປັນໂຄກປ່າທີ່ອຸດົມສົມບູນ, ເປັນແຫລ່ງອາໃສຂອງສັດນໍ້ານາໆຊະນິດ ແລະ ເປັນຫາດຊາຍສີຂາວທີ່ສວຍງາມຈົນກາຍເປັນແຫລ່ງທ່ອງທ່ຽວທີ່ມີຊື່ດໂດ່ງດັງ ເປັນຕົ້ນວ່າ 4 ແຫລ່ງທ່ອງທ່ຽວທີ່ມີຊື່ສຽງຄື: ອ່າງນໍ້າງື່ມໜ້າເຂື່ຶອນໄຟຟ້ານໍ້າງື່ມ 1-2, ຫາດຊາຍຂາວ, ພູເຂົາຄວາຍ ແລະ ປ່າແປກໄດ້ກາຍເປັນຈຸດໝາຍປາຍທາງການທ່ອງທ່ຽວຍອດນິຍົມທີ່ໜ້າຄົ້ນຫາ ແລະ ຄວນໄປສໍາຜັດທັງໃນລະດູແລ້ງ, ລະດູຝົນ ແລະ ລະດູໜາວທ່າມກາງທໍາມະຊາດທີ່ອຸດົມສົມບູນ ແລະ ມີປະຫວັດຄວາມເປັນມາເຊື່ອງຊ້ອນຢ່າງຫລວງຫລາຍ.

ມື້ນີ້ຜູ້ຂຽນຈະຍົກມາເລົ່າສູ່ຟັງບາງຕົວຢ່າງຂອງສະຖານທີ່ທອ່ງທ່ຽວທີ່ມີຄົນ ແລະ ນັກທ່ອງທ່ຽວເວົ້າສູ່ກັນຟັງຢ່າງໜາຫູຄື: ສະຖານທີ່ທ່ອງທ່ຽວດອນພູວຽງ ຫລື ຫາດຊາຍຂາວ ຕັ້ງຢູ່ໃຈກາງອ່າງນ້ຳງື່ມ. ຈຸດພິເສດຂອງດອນພູວຽງນີ້ ມີລັກສະນະເປັນເອກະລັກຄ້າຍແຄມທະເລສາບນໍ້າຈືດທີ່ສວຍງາມອີກແຫ່ງໜຶ່ງໃນປະເທດລາວ ແຕ່ຖ້າທ່ານໃດຢາກເຫັນຄວາມມະຫັດສະຈັນຂອງມັນໃຫ້ໄປໃນຍາມລະດູແລ້ງເທົ່ານັ້ນ ຖ້າເປັນລະດູຝົນນໍ້າຈະຖ້ວມໝົດເຫລືອໄວ້ແຕ່ດອນກັບປ່າໄມ້ເທົ່ານັ້ນ. ທ່ານໃດມັກສາຍທໍາມະຊາດ ແລະ ຕັ້ງແຄ້ມນອນແຮມຄືນບອກໄດ້ເລີຍວ່າ ທີ່ສຸດຂອງແຫລ່ງທ່ອງທ່ຽວທີ່ມີຄວາມສະຫງົບ, ນອນນັບດາວກາງຄືນ, ຟັງສຽງຄື້ນນໍ້າສາດໃສ່ແຄມຝັ່ງ, ລົງອາບນໍ້າຍາມແລງ ແລະ ຊົມຕາເວັນຮັບຂອບຟ້າ.

ຖ້າທ່ານໃດສົນໃຈຕ້ອງການຢາກໄປແນະນໍາດັ່ງນີ້: ໃຫ້ເດີນທາງມຸ່ງໜ້າໄປທາງສ່ວນສັດບ້ານເກີນ ແລະ ໄປຕາມເສັ້ນທາງສວນເສືອປ່າຣີເວີໄຊຈົນສຸດເສັ້ນທາງຈະເຫັນທ່ານໍ້າງື່ມເປັນທ່າເຮືອທີ່ບ້ານນາເຜີຍ ເມືອງທຸລະຄົມ ແຂວງວຽງຈັນ.

ການຂີ່ເຮືອໄປດອນພູວຽງ ແມ່ນໃຊ້ເວລາປະມານ 1-2 ຊົ່ວໂມງ, ສະນັ້ນກ່ອນຈະໄປດອນພູວຽງຕ້ອງໄດ້ໂທຈອງເຮືອກ່ອນລ່ວງໜ້າເດີ, ຕິດຕໍ່ສອບຖາມລາຄາ ແລະ ເວລາໄດ້ທີ່ເບີ 020 55510082. ໂດຍ: ເກີດຂວັນໃຈ.

KPL