ຂປລ. ໃນວັນທີ 30 ກັນຍາ 2024 ຜ່ານມາ, ສະຫາຍ ສະເຫລີມໄຊ ກົມມະສິດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະໄປອວຍພອນ ສະຫາຍ ນາງ ຟາງ ຫົງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ  ໃນໂອກາດວັນສະຖາປະນາ ສາທາລະນະລັດ ປະຊາ ຊົນຈີນ ຄົບຮອບ 75 ປີ (01/10/1949-01/10/2024) ທີ່ສະຖານເອກອັກຄະລັດຖະທູດ ສປ ຈີນ ປະຈໍາ ສປປ ລາວ.

ໃນໂອກາດນີ້, ສະຫາຍ ສະເຫລີມໄຊ ກົມມະສິດ ໄດ້ຕາງໜ້າໃຫ້ຄະນະພັກ-ຄະນະນໍາ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ສະແດງຄວາມຊົມເຊີຍ ແລະ ອວຍພອນຢ່າງຈິງໃຈຕໍ່ ສະຫາຍ ນາງ ຟາງ ຫົງ ພ້ອມດ້ວຍພະນັກງານ ສະຖານທູດທຸກສະຫາຍ ແລະ ຜ່ານສະຫາຍ ໄປຍັງຄະນະພັກ-ຄະນະນໍາ ແລະ ພະນັກງານກະຊວງການຕ່າງປະເທດ ກໍຄື ການນໍາພັກ-ລັດ ຂອງ ສປ ຈີນ ເຊິ່ງຜົນສຳເລັດອັນໃຫຍ່ຫລວງທີ່ສະຫາຍຈີນ ອ້າຍນ້ອງຍາດມາໄດ້ຕະຫລອດໄລຍະ 75 ປີຜ່ານມາ ໂດຍສະເພາະ ຜົນສຳເລັດດ້ານວຽກງານການຕ່າງປະເທດ ທີ່ໄດ້ປະກອບສ່ວນອັນສຳຄັນເຂົ້າໃນພາລະ ກິດສ້າງສັນຕິພາບ ແລະ ການຮ່ວມມື, ການພັດທະນາ ແລະ ເຊື່ອມໂຍງເຊື່ອມຈອດຂອງໂລກ ເຊິ່ງສອດຄ່ອງກັບແນວທາງ ນະໂຍບາຍການຕ່າງປະເທດ ຕາມຄວາມຄິດຂອງປະທານ ສີ ຈິ້ນຜິງ ວ່າດ້ວຍວຽກງານການຕ່າງປະເທດຂອງ ສປ ຈີນ ໃນຍຸກສະໄໝໃໝ່. ພ້ອມນີ້, ກໍມີຄວາມຍິນດີທີ່ເຫັນວ່າ ການພົວພັນຮ່ວມມື ລະຫວ່າງ ສອງປະເທດ ກໍຄື ລະຫວ່າງ ສອງກະຊວງ ການຕ່າງປະເທດພວກເຮົາ ໃນຊຸມປີທີ່ຜ່ານມາ ໄດ້ຮັບການເສີມຂະຫຍາຍເຂົ້າສູ່ລວງເລິກ ແລະ ລວງກວ້າງ; ສອງກະຊວງການຕ່າງປະ ເທດ ໄດ້ຮັກສາກົນໄກການເຮັດວຽກ, ປະສານງານ ແລະ ປຶກສາຫາລືຢ່າງໃກ້ຊິດ ເພື່ອຈັດຕັ້ງປະຕິບັດບັນດາວຽກງານ ທີ່ການນຳຂັ້ນສູງ, ສອງພັກ-ສອງລັດ ໄດ້ຕົກລົງກັນ ຢ່າງມີປະສິດທິຜົນ ແລະ ມີຄຸນນະ ພາບສູງ.

ພ້ອມນີ້, ສະຫາຍ ສະເຫລີມໄຊ ກົມມະສິດ ໄດ້ຢໍ້າຄືນຢ່າງໜັກແໜ້ນວ່າ: ຄະນະນຳ ແລະ ພະ ນັກງານກະຊວງການຕ່າງປະເທດ ສປປ ລາວ ມີຄວາມຍິນດີທີ່ຈະສືບຕໍ່ ຮ່ວມມືຢ່າງໃກ້ຊິດກັບສະຫາຍ, ບັນດາການນຳ ແລະ ພະນັກງານ ກະຊວງການຕ່າງປະເທດ ແຫ່ງ ສາທາລະນະລັດ ປະຊາຊົນຈີນ ໃນການປະກອບສ່ວນເສີມ ຂະຫຍາຍສາຍພົວພັນຮ່ວມມື ລະຫວ່າງສອງປະເທດພວກເຮົາ ແລະ ຈັດຕັ້ງປະຕິບັດບັນດາຂໍ້ຕົກລົງ ທີ່ເຫັນດີເປັນເອກະພາບຂອງ ສອງການນຳໃຫ້ປະກົດຜົນເປັນຈິງຍິ່ງໆຂຶ້ນ. ພ້ອມນັ້ນ, ກໍຈະສືບຕໍ່ຮ່ວມເຮັດວຽກກັບສະຫາຍ ໃນການກຽມຄວາມພ້ອມຕ້ອນຮັບ ການນຳຂັ້ນສູງຂອງ ສປ ຈີນ ທີ່ຈະເດີນທາງມາເຂົ້າຮ່ວມ ກອງປະຊຸມສຸດຍອດອາຊຽນທີ່ກ່ຽວຂ້ອງ ຢູ່ນະຄອນຫລວງວຽງຈັນ ໃນຕົ້ນເດືອນ ຕຸລາ 2024 ນີ້.

ໃນໂອກາດດຽວກັນ, ສະຫາຍ ນາງ ຟາງ ຫົງ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ຄໍາອວຍພອນອັນປະເສີດ, ຄໍາຊົມເຊີຍ ແລະ ຄໍາເວົ້າອັນຈົບງາມຂອງ ສະຫາຍ ສະເຫລີມໄຊ ກົມມະສິດ ແລະ ຄະນະຈາກກະຊວງການຕ່າງປະເທດລາວ ທີ່ມາອວຍພອນໃນຄັ້ງນີ້, ພ້ອມທັງສະແດງຄວາມຢືນ ຢັນວ່າ ສະຖານທູດ ກໍຄື ກະຊວງການຕ່າງປະເທດ ສປ ຈີນ ຈະສືບຕໍ່ຮັກສາມູນເຊື້ອ ການພົວພັນອັນສະໜິດແໜ້ນ ກັບກະຊວງການຕ່າງປະເທດລາວ ເພື່ອຮ່ວມກັນຈັດຕັ້ງຜັນຂະຫຍາຍ ບັນດາວຽກງານທີ່ຂັ້ນເທິງ ໄດ້ຕົກລົງຮ່ວມກັນແລ້ວນັ້ນ ໃຫ້ປະກົດຜົນເປັນຈິງ, ມີປະສິດທິພາບ ແລະ ປະສິດທິຜົນ ເພື່ອ ນໍາເອົາຜົນປະໂຫຍດສູງສຸດ ມາສູ່ປະຊາຊົນ ສອງຊາດ ລາວ-ຈີນ, ຈີນ-ລາວ.

ຂ່າວ-ພາບ: ກຕທ

KPL