ຂປລ. ພິທີລົງນາມສັນຍາສໍາປະທານ ໂຄງການ ໄຟຟ້າພະລັງງານແສງຕາເວັນ 1.000 ເມກາວັດ ຢູ່ ເມືອງໄຊ ແລະ ເມືອງນາໝໍ້ ແຂວງອຸດົມໄຊ ໄລຍະທີ I ຂອງໂຄງການຖານເຊື່ອມຕໍ່ ພະລັງງານສະອາດພາກເໜືອຂອງລາວ ລະຫວ່າງ ລັດຖະບານລາວ ແລະ ບໍລິສັດ ຊີຈີເອັນ ເອເນີຈີ ເຕັກໂນໂລຢີ (ລາວ) ຈໍາກັດ ຈັດຂຶ້ນວັນທີ 12 ກັນຍາ 2024 ໂດຍມີ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ນາງ ຟາງຮົງ ເອກອັກຄະລັດຖະທູດ ສປ ຈີນ ປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ໃຫ້ຮູ້ວ່າ: ໂຄງການຖານພະລັງງານສະອາດ ເຊື່ອມຕໍ່ພາກເໜືອຂອງລາວ ເປັນໂຄງການທີ່ສຳຄັນໃນການສະໜອງໄຟຟ້າ ໃຫ້ແກ່ສາຍສົ່ງໄຟຟ້າ 500kV ລະຫວ່າງ ລາວ-ຈີນ, ທັງເປັນໂຄງການຮ່ວມມື ທີ່ສຳຄັນລະຫວ່າງ ລາວ-ຈີນ ໃນຂອບເຂດຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ແລະ ມີຄວາມໝາຍອັນໃຫຍ່ຫລວງ ໃນການຊຸກຍູ້ການເຊື່ອມຈອດກັນ ດ້ານພະລັງງານໃນພາກພື້ນ, ຊຸກຍູ້ການພັດທະນາເສດຖະກິດຂອງທ້ອງຖິ່ນ, ປັບປຸງປະສິດທິພາບດ້ານພະລັງງານ, ຝຶກອົບຮົມບຸກຄະລາກອນ ດ້ານພະລັງງານ ສະອາດໃຫ້ກັບລາວ, ຫລຸດຜ່ອນການປ່ອຍກາກບອນ, ເສີມຂະຫຍາຍສາຍພົວພັນ ມິດຕະພາບທີ່ເປັນມູນເຊື້ອລະຫວ່າງ ລາວ-ຈີນ. ພ້ອມທັງສະແດງຄວາມຫວັງວ່າ ບໍລິສັດ CGN ຈະສືບຕໍ່ຮ່ວມມືກັບບັນດາຂະແໜງການທີ່ກ່ຽວຂ້ອງ ຂອງລັດຖະບານລາວ ໃນຂັ້ນຕອນ ການກໍ່ສ້າງ ແລະ ດຳເນີນງານໃນອະນາຄົດ, ຕັ້ງໜ້າປະຕິບັດໂຄງການໄລຍະທີ I ໃຫ້ເປັນໂຄງການ ໄຟຟ້າພະລັງງານແສງຕາເວັນຂະໜາດໃຫຍ່ ເປັນໂຄງການແບບຢ່າງ ແລະ ມີມາດຕະຖານສູງ ແຫ່ງທຳອິດໃນລາວ.

ທ່ານ ຈ່າງ ຊາວສຸນ ປະທານບໍລິຫານບໍລິສັດ CGN International Holdings Co., Ltd ຂອງຈີນ ໄດ້ກ່າວວ່າ: ການພັດທະນາ, ກໍ່ສ້າງ ແລະ ການດຳເນີນງານຂອງໂຄງການ ຖານພະລັງງານສະອາດ ເຊື່ອມຕໍ່ພາກເໜືອຂອງລາວ ຈະເປັນສິ່ງສຳຄັນໃນການເພີ່ມທະວີ ການເຊື່ອມຈອດກັນ ດ້ານພະລັງງານ ແລະ ການຮ່ວມມືດ້ານເສດຖະ ກິດລະຫວ່າງຈີນກັບລາວ, ຊຸກຍູ້ການພັດທະນາ, ການນຳໃຊ້ ແລະ ການສົ່ງອອກພະລັງງານສະອາດໃນລາວ, ລວມທັງການສົ່ງເສີມການເຊື່ອມຕໍ່ໄຟຟ້າ ລະຫວ່າງ ລາວກັບປະເທດເພື່ອນບ້ານ. ໃນອະນາຄົດ, CGN ຈະພັດທະນາ ຖານພະລັງງານສະອາດ ເຊື່ອມຕໍ່ພາກເໜືອຂອງລາວຢ່າງບໍ່ຢຸດຢັ້ງ, ພ້ອມທັງປະກອບສ່ວນສະຕິປັນຍາ ແລະ ກຳລັງແຮງເຂົ້າໃນການກໍ່ສ້າງ "ຄູ່ຮ່ວມຊາຕາກໍາ ຈີນ-ລາວ" ແລະ ການພັດທະນາຄຸນນະພາບສູງຂອງຂໍ້ລິເລີ່ມ "ໜຶ່ງແລວໜຶ່ງເສັ້ນທາງ"; ຕັ້ງໝັ້ນກໍ່ສ້າງໂຄງການ ຖານພະລັງງານ ສະອາດໄລຍະທີ I ເພື່ອເຊື່ອມຕໍ່ພະລັງງານໄຟຟ້າ ຢູ່ພາກເໜືອຂອງລາວ ດ້ວຍຄຸນນະພາບສູງ, ເຮັດໃຫ້ໂຄງການດັ່ງກ່າວ, ເປັນໂຄງການທີ່ມີຄຸນນະພາບສູງ ແລະ ເປັນໂຄງການຕົວແບບຂອງ ຈີນ-ລາວ ເພື່ອລົງເລິກການພັດທະນາຂອງພາກພື້ນ ແມ່ນໍ້າລ້ານຊ້າງ-ແມ່ນໍ້າຂອງ; ພວກເຮົາຈະປະຕິບັດ ໜ້າທີ່ຮັບຜິດຊອບ ຕໍ່ສັງຄົມຢ່າງບໍ່ຢຸດຢັ້ງ ແລະ ຕັ້ງໜ້າ ເພື່ອໃຫ້ສັງຄົມທ້ອງຖິ່ນສາມາດແບ່ງປັນຜົນການພັດທະນາຢ່າງແທ້ຈິງ.

ໂຄງການຖານພະລັງງານສະອາດ ເຊື່ອມຕໍ່ພາກເໜືອຂອງລາວ ແມ່ນການປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງ CGN ແລະ ເປັນໂຄງການສໍາຄັນໃນການສ້າງ "ຄູ່ຮ່ວມຊາຕາກໍາ ຈີນ-ລາວ", ໂຄງການດັ່ງກ່າວ, ຕັ້ງຢູ່ໃນສາມແຂວງພາກເໜືອຂອງລາວ ຄື: ແຂວງອຸດົມໄຊ, ຜົ້ງສາລີ ແລະ ແຂວງ ຫລວງນ້ຳທາ ໂດຍມີແຜນຈະສ້າງຖານພະລັງງານສະອາດ ແບບປະສົມປະສານພະລັງງານລົມ, ພະລັງງານແສງຕາເວັນ ແລະ ພະລັງງານນໍ້າກັກເກັບ ທີ່ມີກຳລັງຕິດຕັ້ງລະດັບ 10 ລ້ານກິໂລວັດ.

ຂ່າວ: ກິດຕາ

KPL